ដោយ ស៊ីវ ម៉េង
ភ្នំពេញៈ ផ្លូវជាតិសំខាន់ៗចំនួន៣ នឹងមានជំនន់់នៃការកកស្ទះចរាចរណ៍ខ្លាំងនារយៈពេល៥ឆ្នាំខាងមុខ ដោយសារកំនើនប្រជាសាស្រ្តក្នុងទីក្រុង និងប្រព័ន្ឋហេដ្ឋារចនាសម្ព័ន្ឋក្នុងទីក្រុងមិនទាន់បានរៀបចំបានប្រសើរនៅឡើយ។
មន្រ្តីជំនាញក្រសួងសាធារណៈការ និងដឹកជញ្ជូនបានមានប្រសាសន៍ក្នុងលក្ខខ័ណ្ឌមិនបញ្ចេញឈ្មោះថា កំនើននៃការវិនិយោគលើវិស័យអចលនទ្រព្យ សំណង់លំនៅដ្ឋាននៅតាមបណ្តោយផ្លូវជាតិលេខ១ ផ្លូវជាតិលេខ៤ និងផ្លូវជាតិលេខ៦អាបាននិងកំពុងធ្វើឲ្យប្រជាជនចូលមករស់នៅទីក្រុង និងលំហូរប្រជាជនក្នុងរាជធានីភ្នំពេញកើនឡើងយ៉ាងគំហុក។លោកបន្តថា ការរីកចម្រើននេះ ដោយសារសុខសន្តិភាព និងកំនើនសេដ្ឋកិច្ចរបស់ប្រទេស ប៉ុន្តែការរៀបចំប្រព័ន្ឋហេដ្ឋារចនាសម្ព័ន្ឋហាក់មិនទាន់ឆ្លើយតបនៅឡើយ។
-->
លោកបន្តថា “ខ្ញុំមានការព្រួយបារម្ភទៅលើរឿងនេះ ហើយបញ្ហានេះក្រសួងធ្លាប់បានរៀបចំគោលនយោបាយ ដើម្បីដោះស្រាយហើយ ប៉ុន្តែវាទាមទារនូវពេលវេលា និងធនធានដ៏ច្រើន”។លោកបន្តថា “យើងអាចអនុវត្តន៍នយោបាយដូចនៅប្រទេសជប៉ុន និងប្រទេសអង់គ្លេស ដែលអនុញ្ញាត្តឲ្យប្រជាពលរដ្ឋទិញរថយន្ត តែពួកគេមិនអាចបើកបរចូលទីក្រុងនោះទេ បើពួកគេបើកបរចូលទីក្រុង ពួកគេត្រូវបង់ថ្លៃខ្ពស់ លើសពីការប្រើប្រាស់សេវាកម្មសាធារណៈរបស់រដ្ឋ”។
នៅប្រទេសជឿនលឿនបែបនេះ គេមានប្រព័ន្ឋរថភ្លើងលើអាកាស រថយន្តក្រុងសាធារណៈ មានរថភ្លើងក្រោមដីជាដើម តែកម្ពុជាមិនទាន់មានលទ្ឋភាពធ្វើបាននៅឡើយទេ។
ប៉ុន្តែកាលពីពេលថ្មីៗនេះ ថ្នាក់ដឹកនាំក្រុមហ៊ុនចិនបានបង្ហាពីចេតនា ដើម្បីជួយដោះស្រាយបញ្ហានេះនៅកម្ពុជា ពិសេសរាជធានីភ្នំពេញ ដោយក្រុមហ៊ុនCRCCគ្រោងសិក្សាប្រព័ន្ឋរថភ្លើងលើអាកាស ក្រោមដីនៅរាជធានីភ្នំពេញ និងគ្រោងសិក្សាសាងសង់ខ្សែរថភ្លើងពីភ្នំពេញទៅកាន់ខេត្តសៀមរាប ប៉ោយប៉ែត និងព្រំដែនបាវិតក្នុងខេត្តស្វាយរៀងផងដែរ។
លោកបណ្ទិតវ៉ាន់ វ៉ាតអ្នកឯកទេសផ្នែកនគរូបនីយកម្ម និងជាអនុប្រធានមន្ទីររៀបចំដែនដី នគរូបនីយកម្ម និងសំណង់់ខេត្តកណ្តាលបានមានប្រសាសន៍ថា សំរាប់ប្រទេសកំពុងអភិវឌ្ឍន៍ប្រទេសណា ដូចប្រទេសណាដែរ ពេលសេដ្ឋកិច្ចរីកចម្រើន ប្រជាជនតែងតែបន្លាស់ទីចូលទីក្រុង ដើម្បីស្វែងរកប្រាក់ចំណូល។លោកបន្តថា ដោយសារផ្លូវមានទំហំមានកម្រិត ហើយប្រជាជនមានចំណូលកើនឡើង ពួកគេមានលទ្ឋភាពទិញរថយន្ត ហេតុនេះការកកស្ទះចរាចរណ៍ជារឿងធម្មតា។
លោកបន្តថា “ការដោះស្រាយបញ្ហានេះ បាននិងកំពុងធ្វើឡើង ដោយរដ្ឋាភិបាលកំពុងថ្លឹងថ្លែងការអភិវឌ្ឍនៅតាមបណ្តាខេត្ត ដែលមានសក្តានុពលសេដ្ឋកិច្ច ដើម្បីកាត់បន្ថយលំហូរប្រជាជនចូលមករស់នៅទីក្រុងភ្នំពេញ”។លោកបន្តថា “ដើម្បីដោះស្រាយបញ្ហានេះ យើងមានជម្រើសច្រើនណាស់ ប៉ុន្តែប្រទេសយើងមានការអភិវឌ្ឍលឿន ស្ទើរមិននឹកស្មានដល់ ហេតុនេះយើងជួបបញ្ហាប្រឈមនៅទីណា យើងដោះស្រាយនៅកន្លែងនោះ”។
អ្នកនាំពាក្យរដ្ឋបាលរាជធានីភ្នំពេញ លោម៉េត មាសភ័ក្តីបានមានប្រសាសន៍ថា អ្នកនាំពាក្យរដ្ឋបាលរាជធានីភ្នំពេញ បានមានប្រសាសន៍ឲ្យដឹងផងដែរថា ស្របពេលដែលវិស័យហេដ្ឋារចនាសម្ព័ន្ធក្នុងរាជធានី មានការអភិវឌ្ឍយ៉ាងលឿន ជាពិសេសវត្តមាននៃសំណង់អាគារមជ្ឈមណ្ឌលពាណិជ្ជកម្មធំៗជាច្រើន និងកំពុងតែបន្តកើនឡើងនោះ ចំនួនប្រជាពលរដ្ឋក៏មានការកើនឡើងផងដែរ។ លោកបានបន្តថា ចំនួនប្រជាជនដែលកំពុងរស់នៅអចិន្ត្រៃយ៍ ក្នុងរាជធានីភ្នំពេញមានចំនួនប្រមាណ១,៨លាននាក់កាលពីឆ្នាំមុន ហើយបើសរុបទាំងចំនួនអ្នកចេញចូលក្នុងទីក្រុងជាប្រចាំ មានរហូតដល់ជាង២លាននាក់ជាប្រចាំ។
លោកបន្តថា ចំណែកចំនួនយានយន្ត ដែលកំពុងចរាចរណ៍នៅក្នុងរាជធានីភ្នំពេញវិញមានរហូតដល់ជាង២លានគ្រឿង ដោយចំនួនរថយន្តមានរហូតដល់ជាង៥០ម៉ឺនគ្រឿង ហើយចំនួនទោចក្រយានយន្តមានរហូតដល់ទៅប្រមាណ១,៧លានគ្រឿង ដែលចំនួនដ៏ច្រើនលើសលប់។ លោកបន្តថា “ទាំងអស់នេះហើយជាមូលហេតុបង្កឱ្យមានការកកស្ទះជាប្រចាំ រួបផ្សំជាមួយនឹងកក្តារចនាសម្ព័ន្ធផ្លូវថ្នល់ និងការបើកបរមិនគោរពច្បាប់ផងដែរ”។
លោកម៉េត មាសភ័ក្តីបានបញ្ជាក់ថា ជាដំណោះស្រាយ រដ្ឋបាលរាជធានីភ្នំពេញបានខិតខំស្វែងរកដំណោះស្រាយក្រោមរូបភាពជាច្រើន ដូចជា គម្រោងការពង្រីកក្រុងឱ្យមានវិសាលភាពធំទូលាយជាងមុន ការពង្រីកផ្លូវថ្នល់ ការបង្កើតមធ្យាបាយដឹកជញ្ជូនសាធារណៈ (ទាំងផ្លូវគោក និងផ្លូវទឹក) ការហាមឃាត់នូវប្រភេទរថយន្តធំមុនឱ្យចូលក្រុង ក៏ដូចជាការរៀបចំសណ្ដាប់ធ្នាប់នៅតាមចិញ្ជើមផ្លូវថ្នល់ផងដែរ។ យ៉ាងណាក៏ដោយ ទាំងអស់នេះ គឺគ្រាន់តែជាការបង្កើតនូវមធ្យោបាយ ក្នុងការកាត់បន្ថយការកកស្ទះតែប៉ុន្តែ អ្វីដែលសំខាន់ គឺសុំទទូចឱ្យមានការចូលរួមពីសំណាក់ប្រជាពលរដ្ឋទូទៅ ជាពិសេសអ្នកដែលធ្វើដំណើរប្រើប្រាស់ផ្លូវថ្នល់រួម គួរមានការយោគយល់ និងបើកបរដោយគោរពច្បាប់ទាំងអស់គ្នា ទើបអាចកាត់បន្ថយបញ្ហាទាំងនេះបាន៕
