ដោយៈ ម៉ាណា
សៀមរាបៈ រដ្ឋបាលខេត្តសៀមរាបបានឲ្យដឹងថា ដើម្បីពង្រឹងសមត្ថភាពកីឡាកអុំទូក និងឈានទៅរៀបចំការប្រកួតអន្តរជាតិ ក្នុងខេត្ត រដ្ឋបាលខេត្តនឹងរៀបចំការប្រកួតអុំទូកផ្កាចារ ទូកនាគ និងទូកង រយៈពេល២ថ្ងៃ ថ្ងៃទី១៤-១៥ មេសា ២០២៦។
យោងតាមផេកផ្លូវការរបស់រដ្ឋបាលខេត្តបានឲ្យដឹងថា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខ រដ្ឋបាលខេត្តនឹងរៀបចំសៀមរាបសង្ក្រាន្ត ដោយមានកម្មវិធីប្រពៃណីជាច្រើន ក្នុងនោះដែរ ដើម្បីចូលរួមចំណែកលើកស្ទួយវិស័យកីឡាអុំទូក រដ្ឋបាលខេត្តសៀមរាបសហការជាមួយសហព័ន្ធកីឡាទូកកានូ និងរ៉ូអ៊ីងកម្ពុជា និងវិស័យឯកជន រៀបចំការប្រកួតអុំទូកផ្កាចារ ទូកនាគ និងទូកង រយៈពេល២ថ្ងៃ(១៤-១៥ មេសា ២០២៦) ក្នុងពិធីបុណ្យចូលឆ្នាំប្រពៃណីខ្មែរខាងមុខនេះ ដែលមានចំនួន៤ក្រុមស្មើនឹង ១២០នាក់(សូទ្រនិគម១ក្រុម ស្រុកពួក១ក្រុម និងក្រុងសៀមរាប ២ក្រុម)។
ការរៀបចំពង្រឹងសមត្ថភាពនេះ ក៏ដើម្បីត្រៀមសហការជាមួយសហព័ន្ធកីឡាទូកកានូ និងរ៉ូអ៊ីងកម្ពុជារៀបចំការប្រកួតកីឡាអុំទូកអន្តរជាតិ នៅក្នុងខេត្តសៀមរាបនាពេលខាងមុខ។
ដើម្បីឱ្យការការប្រកួតអុំទូកខាងលើ មានភាពអធិកអធម សូមបងប្អូនចូលរួមទស្សនាកម្សាន្ត ឱ្យបានច្រើនកុះករ នៅតាមបណ្តោយស្ទឹងសៀមរាប៕
