ដោយ: សហសេវិក
អន្តរជាតិ: ទ្រព្យសម្បត្តិសរុបបញ្ចូលគ្នារបស់មហាសេដ្ឋីឥណ្ឌូនេស៊ី ដែលមានទ្រព្យសម្បត្តិច្រើនបំផុតទាំង៣នាក់បានធ្លាក់ចុះពាក់កណ្តាលមកនៅត្រឹម ៤៣,៦ ពាន់លានដុល្លារនៅឆ្នាំនេះ ខណៈទីផ្សារភាគហ៊ុនរបស់ប្រទេសនេះបានដាំក្បាលចុះ។
មហាសេដ្ឋីមានជាងគេបំផុតនៅក្នុងប្រទេសនេះ លោក Robert Budi Hartono អាយុ៨៦ឆ្នាំ បច្ចុប្បន្ន មានទ្រព្យសម្បត្តិចំនួន១៥,៧ពាន់លានដុល្លារ ដាំក្បាលចុះ៦៦ភាគរយបើធៀបនឹងចុងឆ្នាំមុន។
តម្លៃភាគហ៊ុនរបស់ធនាគារ Bank Central Asia ដែលលោក Robert គ្រប់គ្រង បានដាំក្បាលចុះ២៤ភាគរយ។ តម្លៃភាគហ៊ុនរបស់ក្រុមហ៊ុនផ្សេងទៀតដែលលោកមានចំណែកភាគហ៊ុន ដូចជាក្រុមហ៊ុនពាណិជ្ជកម្មអេឡិចត្រូនិក និងលក់រាយ Blibli និងក្រុមហ៊ុនទូរគមនាគមន៍ Sarana Menara Nusantara បានដាំក្បាលចុះ៣១ភាគរយ និង២៤ភាគរយរៀងៗគ្នា។
ចំណាត់ថ្នាក់ទីពីរបានទៅលើលោក Low Tuck Kwong អាយុ៧៨ឆ្នាំ។ ទ្រព្យសម្បត្តិរបស់លោកបានធ្លាក់ចុះ៣៤ភាគរយមកនៅត្រឹម១៤,៧ពាន់លានដុល្លារ។ ភាគហ៊ុនរបស់ក្រុមហ៊ុនរុករករ៉ែធ្យូងថ្ម Bayan Resource របស់លោកបានដាំក្បាលចុះ៣៨ភាគរយ។
លោក Kwong បានធ្វើការនៅក្នុងអាជីវកម្មសំណង់របស់ឪពុកលោកនៅប្រទេសសិង្ហបុរី មុនពេលផ្លាស់ទៅរស់នៅប្រទេសឥណ្ឌូនេស៊ីក្នុងឆ្នាំ១៩៧២ ដើម្បីស្វែងរកឱកាសកាន់តែប្រសើរ។ ដំបូងឡើយ លោកបានបង្កើតក្រុមហ៊ុនម៉ៅការសំណង់ Jaya Sumpiles Indonesia ក្នុងឆ្នាំ១៩៧៣ បន្ទាប់មកបានផ្លាស់ប្តូរទៅជាក្រុមហ៊ុនធ្យូងថ្ម ដោយទទួលបានសម្បទានរុករករ៉ែដំបូងនៅតំបន់ Kalimantan ក្នុងទសវត្សរ៍ឆ្នាំ១៩៩០។
លោក Prajogo Pangestu អាយុ ៨៤ ឆ្នាំ ដែលជាបុរសមានបំផុតនៅក្នុងប្រទេសឥណ្ឌូនេស៊ីកាលពីឆ្នាំមុន បច្ចុប្បន្ន បានស្ថិតនៅលំដាប់ទី៣ ដោយមានទ្រព្យសម្បត្តិសុទ្ធចំនួន១៣,២ពាន់លានដុល្លារ ធ្លាក់ចុះ៦៧%។ តម្លៃភាគហ៊ុនរបស់ក្រុមហ៊ុន Barito Pacific របស់លោកបានដាំក្បាលចុះ ៥៣%៕ប្រភព: Vnexpress៕
