ដោយ: សហសេវិក
អន្តរជាតិ: យោងតាមប្រភពព័ត៌មានពី Reuters បានឱ្យដឹងថា ក្រុមហ៊ុន ROSHN Group របស់រដ្ឋាភិបាលអារ៉ាប៊ីសាអូឌីត កំពុងស្វែងរកវិនិយោគិនឯកជនសម្រាប់ពហុកីឡដ្ឋាន Aramco ដែលនឹងធ្វើជាម្ចាស់ផ្ទះនៃការប្រកួតបាល់ទាត់ពិភពលោក FIFA World Cup ឆ្នាំ ២០៣៤។
ក្រុមហ៊ុន ROSHN ត្រូវបានគេរាយការណ៍ថា បានជួលក្រុមហ៊ុន JPMorgan ដើម្បីជួយស្វែងរកសម្រាប់ពហុកីឡដ្ឋានដែលមានកៅអីចំនួន ៤៧.០០០។
ការណ៍នេះនឹងអនុញ្ញាតឱ្យក្រុមហ៊ុន ROSHN រៃអង្គាសមូលនិធិថ្មី និងប្រើប្រាស់ដើមទុនផ្ទាល់ខ្លួនសម្រាប់គម្រោងផ្សេងទៀតក្រោមចក្ខុវិស័យឆ្នាំ២០៣០ ដែលជាផែនការរបស់ប្រទេសអារ៉ាប៊ីសាអូឌីតដើម្បីធ្វើពិពិធកម្មសេដ្ឋកិច្ចចេញពីវិស័យប្រេង។
ពហុកីឡដ្ឋាននេះ នឹងត្រូវបានអភិវឌ្ឍដោយក្រុមហ៊ុន ROSHN និងត្រូវបានគ្រប់គ្រងដោយក្រុមហ៊ុន Saudi Aramco ក្រោមកិច្ចព្រមព្រៀងសម្បទានរយៈពេល២៥ឆ្នាំ។
ប្រទេសអារ៉ាប៊ីសាអូឌីតកំពុងវិនិយោគយ៉ាងច្រើនលើហេដ្ឋារចនាសម្ព័ន្ធ ទេសចរណ៍ និងកីឡា មុនព្រឹត្តិការណ៍បាល់ទាត់ពិភពលោកឆ្នាំ២០៣៤ រួមទាំងការសាងសង់ ឬជួសជុលពហុកីឡដ្ឋានចំនួន ១៥ និងទីលានហ្វឹកហាត់ចំនួន ១៣២។
ទោះជាយ៉ាងណា ការធ្លាក់ចុះនៃប្រាក់ចំណូលប្រេង សម្ពាធថវិកា និងការពន្យារពេលចំពោះគម្រោងធំៗ បានជំរុញឱ្យរដ្ឋាភិបាលអារ៉ាប៊ីសាអូឌីតងាកទៅរកការវិនិយោគឯកជន៕ប្រភព:Reuters៕
