ដោយៈ និស្ស័យ
ភ្នំពេញៈ ក្រសួងទេសចរណ៍ត្រៀមរៀបចំ ទិវារត់ប្រណាំងម៉ារ៉ាតុងចក្រភពអង្គរ លើកទី១១ នឹងប្រព្រឹត្តទៅនៅថ្ងៃទី២ ខែសីហា ឆ្នាំ២០២៦ វេលាម៉ោង ៤:១០នាទីព្រឹក។
ព្រឹត្តិការណ៍នេះ នឹងធ្វើឡើងនៅបរិវេណ មុខប្រាសាទអង្គរវត្ត ខេត្តសៀមរាប ដោយមានភ្ញៀវទេសចរជាតិ និងអន្តរជាតិចូលរួមយ៉ាងច្រើនកុះករ ក្នុងនោះរំពឹងថា នឹងមានភ្ញៀវទេសចរចិនប្រមាណ ១៥០នាក់។
ព្រឹត្តិការណ៍ដ៏អស្ចារ្យនេះ រៀបចំឡើងនៅក្នុងអំឡុងពេលនៃរដូវកាលបៃតងដ៏ស្រស់បំព្រង និងចំពេលនៃការអនុវត្តគោលនយោបាយលើកលែងទិដ្ឋាការជូនពលរដ្ឋចិន។
ព្រឹត្តិការណ៍អន្តរជាតិនេះ នឹងជួយលើកកម្ពស់វិស័យកីឡា និង ជួយជំរុញវិស័យទេសចរណ៍ ព្រមទាំងផ្សព្វផ្សាយកិត្តិនាមកម្ពុជាទៅកាន់ពិភពលោក ដែលជាគោលដៅទេសចរណ៍សុខសុវត្ថិភាព ផ្តល់ភាពកក់ក្តៅ និងបដិសណ្ឋារកិច្ចល្អ។
ព្រឹត្តិការណ៍រត់ប្រណាំងម៉ារ៉ាតុងចក្រភពអង្គរ បានជាប់ឈ្មោះក្នុងចំណោមព្រឹត្តិការណ៍រត់ម៉ារ៉ាតុងទាំង១២ ដែលស័ក្តិសមនឹងចូលរួមក្នុងឆ្នាំ២០២៦ នេះបើយោងតាមការចេញផ្សាយ ដោយទស្សនាវដ្ដីដ៏ល្បីល្បាញForbes៕
