ដោយ: សហសេវិក
អន្តរជាតិ: យោងតាមក្រុមហ៊ុន Colliers ទីផ្សារអាផាតមិននៅទីក្រុងហ្សាការតានៃប្រទេសឥណ្ឌូណេស៊ីកាន់តែមានការបែងចែកច្បាស់លាស់រវាងក្រុមអ្នកទិញដែលផ្តល់អាទិភាពលើកេរ្តិ៍ឈ្មោះរបស់ក្រុមហ៊ុនអភិវឌ្ឍន៍ និងក្រុមអ្នកទិញដែលស្វែងរកលំនៅឋានក្នុងតម្លៃសមរម្យ។
នៅក្នុងត្រីមាសទី៣ ឆ្នាំ ២០២៦ អាផាតមិនប្រភេទប្រណិត មានតួលេខលក់ចេញបានល្អប្រសើរ ខណៈដែលអត្រានៃការទិញ/ជួលអាផាតមិនសរុបបានថយចុះបន្តិចមកនៅត្រឹម ៨៧,៧ភាគរយ។
គម្រោងអចលនទ្រព្យប្រណីតមួយដែលទើបដាក់លក់ថ្មីៗនៅតំបន់ភាគខាងត្បូងទីក្រុងហ្សាការតា (South Jakarta) ទទួលបានជោគជ័យយ៉ាងខ្លាំងលើការលក់ ទោះបីជាគម្រោងនេះកំពុងស្ថិតក្នុងដំណាក់កាលសាងសង់ និងមិនទទួលបានការលើកទឹកចិត្តផ្នែកពន្ធពីសំណាក់រដ្ឋាភិបាល។
ការណ៍នេះបង្ហាញឱ្យឃើញថា អ្នកទិញកាន់តែមានឆន្ទៈក្នុងការចំណាយប្រាក់សម្រាប់គម្រោងដែលអភិវឌ្ឍដោយក្រុមហ៊ុនដែលមានកេរ្តិ៍ឈ្មោះល្អ មានប្រវត្តិសាងសង់ប្រកបដោយទំនុកចិត្ត និងមានទីតាំងយុទ្ធសាស្ត្រល្អប្រសើរ។
ផ្ទុយទៅវិញ គម្រោងដែលសាងសង់រួចរាល់ហើយនោះ នៅតែពឹងផ្អែកខ្លាំងលើការបញ្ចុះតម្លៃ និងការលើកទឹកចិត្តពីរដ្ឋាភិបាល ដើម្បីទាក់ទាញអ្នកទិញ។
ក្រុមហ៊ុន Colliers រំពឹងថា តម្រូវការអាផាតមិនដែលមានតម្លៃសមរម្យនឹងមានភាពប្រសើរឡើងនៅក្នុងត្រីមាសទី៤ ដោយសារអ្នកទិញទទួលបានអត្ថប្រយោជន៍ពីការលើកទឹកចិត្តពន្ធលើតម្លៃបន្ថែមរបស់រដ្ឋាភិបាលមុនចុងឆ្នាំ។
វិនិយោគិនក៏កំពុងជំរុញទីផ្សារលំនៅឋានប្រណីតផងដែរ ជាពិសេសអាផាតមិននៅជិតតំបន់ពាណិជ្ជកម្មដែលទាក់ទាញជនបរទេស និងនាយកប្រតិបត្តិជាន់ខ្ពស់។ ផ្ទុយទៅវិញ អ្នកទិញដែលងាយរងគ្រោះនឹងតម្លៃកំពុងសម្លឹងមើលអចលនទ្រព្យដែលមានតម្លៃសមរម្យជាងមុននៅក្នុងតំបន់នៅខាងក្រៅកណ្តាលទីក្រុង។
ជារួម ទីផ្សារអាផាតមិនរបស់ទីក្រុងហ្សាការតាកំពុងត្រូវបានជំរុញដោយកត្តាសំខាន់ពីរគឺ សក្តានុពលវិនិយោគនៅក្នុងទីតាំងសំខាន់ៗ និងលទ្ធភាពទិញនៅក្នុងតំបន់កណ្តាល និងតំបន់ជាយទីក្រុង៕
