ដោយៈ រ៉ាណេត
ភ្នំពេញៈ មិនថាការទោះជាប្រកបមុខជំនួញប្រភេទណានោះទេ មុនពេលចាប់ផ្តើមដំណើរអាជីវកម្មក្រៅពីមានដើមទុនបម្រុង ដែលជាចំណុចមួយក្នុងចំណោមទាំង៤ រួចរាល់ហើយនោះ អ្នកចាំបាច់ត្រូវតែមានចំណុចសំខាន់ៗទាំង៣បន្ថែមទៀត ហើយត្រូវតែអនុវត្តឱ្យបានត្រឹមត្រូវទើបអាជីវកម្មរបស់អ្នកមិនជួបហានីភ័យ។
ផ្អែកតាមអ្នកជំនាញដែលមានបទពិសោធន៍ខ្ពស់ ក្នុងបង្កើតអាជីវកម្មខ្នាតតូច និងមធ្យម ដែលទទួលបានជោគជ័យជាបន្តបន្ទាប់នោះ បានលើកយកចំណុចសំខាន់ៗដែលជាគោលការណ៍ក្នុងការដំណើរការអាជីវកម្ម ដើម្បីបញ្ចៀសនូវរាល់ហានិភ័យផ្សេងៗក្រោមការប្រកួតប្រជែងពីសំណាក់ដៃគូនៅលើទីផ្សារ។ ចំណុចសំខាន់ៗដែលធ្វើជាសរសរស្តម្ភទាំង៤នោះរួមមាន។
១) ដើមទុន
តាមធម្មតាការធ្វើអាជីវកម្ម អាចទទួលបានជោគជ័យ ឬជួបនឹងហានិភ័យដើរទន្ទឹមគ្នា។ ដូច្នេះដើម្បីឱ្យប្រាកដថាអាជីវកម្ម អាចដំណើរការទៅមុខបានដោយរលូន លុះត្រាតែអ្នកជំនួញមានថវិកាគ្រប់គ្រាន់ សម្រាប់រៀបចំដំណើរការក្រុមហ៊ុន និងមានថវិកាបម្រុងមួយចំនួន នៅពេលដែលក្រុមហ៊ុនមានតម្រូវការចាំបាច់ ឬបន្ទាន់ណាមួយ។
២) ពេលវេលា
អ្នកជំនួញត្រូវចេះមើលឱកាស និងពេលវេលាស័ក្ដិសម សម្រាប់ដំណើរការអាជីវកម្មរបស់ខ្លួន។ ថ្វីត្បិតថាអាជីវកម្មប្រភេទខ្លះ មានច្រើននៅលើទីផ្សារួចហើយ ប៉ុន្តែយើងនៅតែអាចមើលឃើញឱកាស ដើម្បីបញ្ជ្រៀតផលិតផលរបស់ខ្លួនចូលក្នុងទីផ្សារបាន ។ ការប្រកួតប្រជែងត្រូវបានធ្វើឡើងទាំងតម្លៃ និងគុណភាព ធ្វើយ៉ាងណាទទួលបានការគាំទ្រពីអតិថិជន ។ អ្នកជំនួញវ័យឆ្លាតមិនមែនគិតតែពីការយកពេលវេលា និងចំណាយដើមទុនទៅប្រជែងជាមួយគេនោះទេ តែត្រូវទុកឱកាសស្វែងរកយុទ្ឋសាស្រ្តល្អៗ ដើម្បីពង្រឹងគុណភាពផលិតផលដើម្បីអាជីវកម្មរបស់ខ្លួន។
៣) ជំនាញ
ចង់ធ្វើអាជីវកម្មអ្វីមួយត្រូវប្រាកដថា ខ្លួនឯងមានជំនាញច្បាស់លាស់ ទើបអាជីវកម្មដំណើរទៅមុខដោយរលូន បើគ្មានជំនាញរវល់តែរឿងស្វែងរកឱ្យគេជួយ វាអាចនឹងមិនមានលទ្ធផល ឬអាចអូសទាញអាជីវកម្មបស់អ្នក ឱ្យធ្លាក់ដាំក្បាលចុះក៏អាចថាបាន ដូច្នេះអ្នកត្រូវតែមានជំនាញដែលពាក់ព័ន្ធធ្វើជាបង្អែក មិនថាជំនាញអ្នកគ្រប់គ្រងឬជំនាញដែលប្រភេទអាជីវកម្មនោះទេ។ ប៉ុន្តែទោះជាអ្នកមានជំនាញផ្ទាល់ខ្លួន អ្នកក៏ត្រូវរកអ្នកជំនាញមកធ្វើការជាមួយនោះដែរ ដើម្បីជាជំនួយការដល់ការងាររបស់ខ្លួន។
បន្ថែមពីនេះ អ្នកក៏ត្រូវដាក់មនុស្សឱ្យធ្វើការទៅតាមជំនាញ និងសមត្ថភាពរបស់ពួកគេផងដែរ ទើបសង្វាក់ផលិតកម្មក្រុមហ៊ុនដំណើរការទៅមុខបានលឿន។
៤) ការសម្រេចចិត្ត
មុននឹងសម្រេចចិត្តបើកអាជីវកម្ម ត្រូវតែប្រាកដក្នុងចិត្តឱ្យច្បាស់លាស់ ពិសេសស្វែងរកមិត្តភក្រ្ត ឬអ្នកជំនាញ ធ្វើការប្រឹក្សាយោបល់ លើមុខជំនូញ ដើម្បីប្រាកដថាអាជីវកម្មដែលចង់រកស៊ី អាចដំណើរការទៅបានដោយរលូន។ នៅពេលដែលមានការប្រឹក្សាយោបល់ច្បាស់លាស់ហើយ យើងត្រូវពិនិត្យពេលវេលាបន្ថែមទៀត បើគិតថាពេលវេលាមកដល់ហើយ ឱកាសបានហុចមកឱ្យហើយគួរចាប់ឱ្យជាប់ ដើម្បីយកឱកាសទាំងនោះមកធ្វើជាប្រយោជន៍ ធ្វើជាមាសពេជ្រសម្រាប់ក្រុមហ៊ុនឱ្យបាន៕
