ដោយ វុត្ថា
ភ្នំពេញ៖ កម្ពុជានិងភាគីម៉ាឡេស៊ីនឹងចុះអនុស្សរណៈនៃការយោគយល់គ្នា (MoU) ផ្តោតលើកិច្ចសហប្រតិបត្តិការក្នុងវិស័យទេសចរណ៍ជាមួយគ្នាជាផ្លូវការ នៅពេលដែលនាយករដ្ឋមន្ត្រីម៉ាឡេស៊ី អញ្ជើញមកទស្សនកិច្ចនៅកម្ពុជា នាអំឡុងចុងឆ្នាំ២០១៩ ខាងមុខនេះ។
ក្នុងជំនួបពិភាក្សាការងាររវាងលោក ថោង ខុន រដ្ឋមន្ត្រីក្រសួងទេសចរណ៍ ជាមួយលោក Eldeen Husaini BINMOHDHASHIM ឯកអគ្គរាជទូតម៉ាឡេស៊ីថ្មីប្រចាំកម្ពុជាកាលពីថ្ងៃទី២៦ ខែមិថុនា ឆ្នាំ២០១៩ នេះ បានឱ្យដឹងថា ភាគីទាំងពីរបានឯកភាពគ្នាក្នុងការបង្កើតក្រុមការងារពិសេសកម្ពុជា-ម៉ាឡេស៊ី ដើម្បីរៀបចំអនុស្សរណៈនៃការយោគយល់គ្នា ដោយផ្តោតលើកិច្ចសហប្រតិបត្តិការក្នុងវិស័យទេសចរណ៍ ក្នុងនោះរួមមាន ការផ្លាស់ព័ត៌មានទេសចរណ៍ ការផ្សព្វផ្សាយពីវិស័យទេសចរណ៍ ការជំរុញការបណ្ដុះបណ្ដាធនធានមនុស្សក្នុងវិស័យទេសចរណ៍។
លោក Eldeen Husaini BINMOHDHASHIM ឯកអគ្គរាជទូតម៉ាឡេស៊ីថ្មីប្រចាំកម្ពុជា បានស្នើសុំកិច្ចសហការពីភាគីកម្ពុជា ០៤ចំនុច៖ ទី១-ការជំរុញវិស័យទេសចរណ៍សុខាភិបាល ដោយផ្សព្វផ្សាយដល់ប្រជាពលរដ្ឋកម្ពុជាឲ្យទៅពិនិត្យព្យាបាលជំងឺ ភ្ជាប់ជាមួយដំណើរទេសចរណ៍ (ដោយម៉ាឡេស៊ីនឹងផ្ដល់ជូននូវតម្លៃពិសេស) ទី២-ការជំរុញទេសចរណ៍វាយកូនគោល (Golf Tourism) ដោយកីឡាប្រភេទនេះមានការពេញនិយមខ្លាំងនៅម៉ាឡេស៊ី ហើយម៉ាឡេស៊ីក៏ចាប់អារម្មណ៍ការនិយមលេងនៅកម្ពុជាផងដែរ។
ទី៣-រៀបចំពិធីពិព័រណ៍ម្ហូបអាហារបែបមូស្លីមនៅកម្ពុជា ឬហៅថា Food Festival និងទី៤- ស្នើភាគីកម្ពុជាបង្កើនការបណ្ដុះបណ្ដាលមគ្គុទ្ទេសក៍ទេសចរណ៍និយាយភាសាម៉ាឡេស៊ី ដើម្បីបំពេញតម្រូវទីផ្សារ និងការរៀបចំសេវាកម្មម្ហូបអាហារហាឡាល់។
លោក ថោង ខុន រដ្ឋមន្ត្រីក្រសួងទេសចរណ៍ បានគាំទ្រ និងឯកភាពចំពោះសំណើទាំងនេះ ហើយក៏បានអញ្ជើញភាគីម៉ាឡេស៊ីចូលរួមសន្និសីទស្តីពីម្ហូបអាហារ (Conference on Gastronomy) ដែលនឹងធ្វើឡើងអំឡុងខែកញ្ញា ឆ្នាំ២០១៩ ខាងមុខ និងបានលើកឡើងពីបំណងរៀបចំឱ្យមានដំណើរកម្សាន្តឆ្លងដែនតាមម៉ូតូ ដែលជាផលិតផលទេសចរណ៍ដ៏ទាក់ទាញមួយ ដែលអាចផ្ដល់ផលប្រយោជន៍សម្រាប់ប្រទេសទាំងពីរ ដោយអាចធ្វើដំណើរឆ្លងពីកម្ពុជាទៅថៃ ហើយបន្តទៅកាន់ម៉ាឡេស៊ី៕
