ដោយ វុត្ថា
សៀមរាប៖ ក្រុមហ៊ុន Angkor Eye Company Limited បានបើកការដ្ឋានសាងសង់កន្ត្រកវិលជាផ្លូវការដែលមានកម្ពស់ ៨៥ម៉ែត្រ ក្នុងបរិវេណផ្សារ និងសួនកម្សាន្ត Box Vill ស្ថិតក្នុងភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប។
លោកទៀ សីហា អភិបាលនៃគណៈអភិបាលខេត្តបានអញ្ជើញចូលរួមក្នុងពិធីសម្ពោធបើកការដ្ឋានសាងសង់នៅថ្ងៃទី៣០ ខែមិថុនា ឆ្នាំ២០១៩នេះបានថ្លែងថាតាមរយៈនៃការមក វិនិយោគរបស់ក្រុមហ៊ុនអង្គរ អាយ ខមភេនី លីមីធីត អាជ្ញាធរខេត្តសង្ឃឹមថា ក្រុមហ៊ុន នឹងបន្តបង្កើននូវការវិនិយោគបន្ថែមទៀតនៅព្រះរាជាណាចក្រកម្ពុជា ជាពិសេសខេត្តសៀមរាប លើវិស័យ ផ្សេងៗទៀត ដើម្បីចូលរួមដល់កិច្ចអភិវឌ្ឍន៍ព្រះរាជាណាចក្រកម្ពុជា ក៏ដូចជាខេត្តសៀមរាប និងបានរួមចំណែកដល់ការផ្សព្វផ្សាយអំពីវប្បធម៌ អារិយ្យធម៌ខ្មែរទៅកាន់ភ្ញៀវទេសចរនៅទូទាំងពិភពលោកឱ្យចូលមកទស្សនាខេត្តសៀមរាបកាន់តែច្រើនឡើង។
សកម្មភាពទាំងនេះពិតជាបានដើរតួនាទីយ៉ាងសំខាន់ ក្នុងការផលិតផលទេសចរណ៍ ដែលមិនអាចខ្វះបាន។លោកបានបន្តថា ដើម្បីឆ្លើយតបទៅនឹងកំណើនសេដ្ឋកិច្ច ដែលមានការកើនឡើង ឥតឈប់ឈរពីមួយឆ្នាំទៅមួយឆ្នាំ អាជ្ញាធរខេត្តបានជម្រុញនូវការអភិវឌ្ឍខេត្តតាមរយៈការកែ លម្អហេដ្ឋារចនាសម្ព័ន្ធរូបវ័ន្ត ផ្លូវថ្នល់ ប្រព័ន្ធធារាសាស្រ្ត ប្រឡាយ លូ និងប្រព័ន្ធចម្រោះទឹកកខ្វក់ ការពង្រីក បណ្តាញ ទឹកស្អាត អគ្គិសនី ការបំពាក់ ភ្លើងបំភ្លឺផ្លូវសាធារណៈ និង ការរៀបចំសួនច្បារសាធារណៈ ប្រកបដោយកិច្ចការពារបរិស្ថានល្អ ជាបន្តបន្ទាប់ ដើម្បីបម្រើដល់តំរូវការចាំបាច់អប្បរមាក្នុងលក្ខខ័ណ្ឌរស់នៅរបស់ប្រជាជន និងភ្ញៀវទេសចរ ។
ជាមួយគ្នានេះដែរ លោកក៏បានថ្លែងអំណរគុណចំពោះលោក ថាកិយូសិ សិណុមីយ៉ា (Tahey o s hi Shinomiya) ប្រធានក្រុមប្រឹក្សាភិបាល លោក ម៉េង ហៀង អគ្គនាយកក្រុមហ៊ុន អង្គរអាយ ខមភេនី លីមីធីត ដែល បានជ្រើសរើសយកខេត្តសៀមរាប សម្រាប់វិនិយោគមណ្ឌលកំសាន្តកន្រ្តកវិលលំដាប់អន្តរជាតិនេះ។ខេត្តសៀមរាបមានសក្តានុពលយ៉ាងខ្លាំង បើប្រៀបទៅនឹងខេត្តនានាទូទាំង ប្រទេស និងជាតំបន់ប៉ូលសេដ្ឋកិច្ច បន្ទាប់ពីរាជធានីភ្នំពេញ។
ខេត្តសៀមរាប គឺជាខេត្តមួយ ពោរពេញទៅ ដោយសក្តានុពល បំផុតខាងវិស័យទេសចរណ៍ ដែលភ្ញៀវទាំងឡាយបានទៅ លេងម្តងហើយ ពិតជាចង់ទៅម្តងទៀត ព្រោះថាប្រាង្គប្រាសាទបុរាណដែលជាបេតិកភណ្ឌជាតិ នៅក្នុងខេត្តបានទាក់ទាញ ភ្ញៀវទេសចរមកពីគ្រប់ទិសទីនៅលើភពផែនដី ។
ម៉្យាងទៀត ក្រៅពីប្រាសាទអង្គរវត្ត និងប្រាសាទបុរាណរាប់រយទៀត សៀមរាបមានតំបន់ទេសចរណ៍ ជាច្រើនកន្លែងផ្សេងៗដូចជា ផ្សាររាត្រី អង្គរឃ្យុងយូ ភូមិវប្បធម៌ និងបារាយណ៍ ទឹកថ្លាជាដើម ៘
កងបង្វិល-កន្ត្រក-វិល ធំជាងគេ និងខ្ពស់ជាងគេនៅព្រះរាជាណាចក្រកម្ពុជា នាំចូលពីប្រទេសជប៉ុន សម្រាប់ទីផ្សារទី៣ នៅអាស៊ីអាគ្នេយ៍ នេះគឺជាការវិនិយោគដ៏ធំមួយ ក្នុងទំហំទឹកប្រាក់ប្រមាណជា ជាង ៧ លានដុល្លាអាមេរិក ក្រោមការទទួលឯកភាពពីរាជរដ្ឋាភិបាលកម្ពុជា ដោយក្រុមហ៊ុន Angkor Eye Co.,Ltd. ដែលជាក្រុម ហ៊ុនវិនិយោគក្នុងស្រុក ។
ក្រសួងរៀបចំដែនដី នគរូបនីយកម្ម និងសំណង់ បានអនុញ្ញាតិឲ្យមានកិច្ចសហការជាមួយក្រុម ហ៊ុនវិនិយោគជប៉ុន ( CQ Amenic Co. ) ផងដែរ ។ បើយោងតាមរបាយការណ៍ស្វាគមន៍របស់លោក ម៉េង ហៀង អគ្គនាយកក្រុមហ៊ុន Angkor Eye Co.,Ltd. ។
លោក បានឲ្យដឹងថា កងបង្វិលកន្ត្រក-វិលនេះ មានកម្ពស់ ៨៥ម៉ែត្រ មានកន្ត្រកសណ្តោងចំនួន ៤៨កន្ត្រក ។ នៅក្នុងកន្ត្រកសណ្តោងទាំងនោះមានបំពាក់ដោយម៉ាស៊ីនត្រជាក់ អាចផ្ទុកភ្ញៀវទេសចរអាចជិះបាន១៩២ នាក់ ហើយការធ្វើដំណើរលើកន្ត្រកវិលមួយជុំ មានរយៈពេល១៨នាទី និងអាចមើលឃើញទេសភាពជុំវិញក្រុងសៀមរាប តំបន់បឹងទន្លេសាប និងទេសភាពរម្មណីយដ្ឋានអង្គរ ពីលើអាកាសផងដែរ ៕
