ដោយ វុត្ថា
ព្រះសីហនុៈ ក្រុមហ៊ុនអាកាសចរណ៍ចិន 9Air បានចាប់ផ្តើមហោះហើរត្រង់ពីខេត្ត Guangzhou មកកាន់ព្រលានយន្តហោះអន្តរជាតិ ខេត្តព្រះសីហនុថ្មីមួយទៀត ខណៈព្រលានយន្តនេះ ទើបតែទទួលស្វាគមន៍ហោះហើរត្រង់របស់ក្រុមហ៊ុន Air Asia មកពីក្រុងបានកកប្រទេសថៃកាលពីពេលថ្មីៗនេះ។
យោងតាមការចុះផ្សាយរបស់គេហទំព័រហ្វេសបុក Cambodia Airports នៅថ្ងៃទី ៩ ខែកក្កដា ឆ្នាំ ២០១៩ នេះ បានឱ្យដឹងថា ក្រុមហ៊ុនអាកាសចរណ 9Air បានចាប់ផ្តើមហោះហើរត្រង់នៅថ្ងៃនេះ ពី ខេត្ត Guangzhou របស់ប្រទេសចិន មកកាន់ព្រះលានយន្តហោះអន្តរជាតិខេត្តព្រះសីហនុ៣ជើងក្នុងមួយសប្តាហ៍ រៀងរាល់ថ្ងៃចន្ទ ថ្ងៃពុធ និងថ្ងៃសុក្រ។
-->
ព្រលានយន្តហោះអន្តរជាតិខេត្តព្រះសីហនុ ទើបតែទទួលស្វាគមន៍ជើងហោះហើរត្រង់របស់ក្រុមហ៊ុន Air Asia របស់ប្រទេសថៃជាលើកដំបូង កាលពីថ្ងៃទី១ ខែកក្កដា ឆ្នាំ២០១៩នេះ ដែលក្លាយជាជើងហោះហើរអន្តរជាតិទី៤ មកកាន់ខេត្តព្រះសីហនុបន្ទាប់ពីចិន ម៉ាឡេស៊ី និងវៀតណាម។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា (CATA) ធ្លាប់បានឱ្យដឹងថា ការបង្កើនជើងហោះហើរត្រង់ពីបណ្តាខេត្តនានា របស់ប្រទេសចិនមកកាន់កម្ពុជា គឺជារឿងល្អប្រសើរបំផុត ក្នុងការបង្កើនភ្ញៀវទេសចរណ៍ចិនមកកាន់កម្ពុជាឱ្យមានចំនួនច្រើនឡើង។
លោកបន្តថា “វាជាចំណែកមួយដែលជួយជំរុញបង្កើនវិស័យសេដ្ឋកិច្ច តាមរយៈការធ្វើពាណិជ្ជកម្ម និងវិនិយោគដល់ប្រទេសទាំងពីរផងដែរ”។
យោងតាមរបាយការណ៍របស់អាជ្ញាធរខេត្តព្រះសីហនុបានឱ្យដឹងថា គម្រោងវិនិយោគរបស់ក្រុមហ៊ុនចិនជាច្រើន បានហូរចូលទៅកាន់ខេត្តព្រះហនុ តាមគោលនយោបាយរបស់ប្រធានាធិបតីចិន ស៊ី ជីនពីង (ផ្លូវ និងខ្សែក្រវាត់) ដែលធ្វើឱ្យជនជាតិចិនកាន់កាប់មុខជំនួញប្រមាណ ៩០ភាគរយ លើវិស័យអាកាសចរណ៍ សណ្ឋាគារ កាស៊ីណូ ភោជនីយដ្ឋាន និងហាងម៉ាស្សាជាដើម ហើយបានប្រែក្លាយខេត្តមាត់សមុទ្ររបស់កម្ពុជាកម្ពុជាមួយនេះ មានសន្ទុះរីកចម្រើនយ៉ាងខ្លាំងក្នុងរយៈពេលប៉ុន្មានឆ្នាំកន្លងមកនេះ៕
