ដោយ វុត្ថា
ភ្នំពេញៈ ស្របពេលមានគម្រោងស្តារឡើងវិញ នូវព្រលានយន្តហោះខេត្តកោះកុង នៅក្នុងឆ្នាំ២០២០ ខាងមុនេះបានធ្វើឲ្យតម្លៃដីធ្លី នៅខេត្តកោះកុង បន្តហក់ឡើងខ្ពស់នៅឆ្នាំនេះ និងនៅពេលអនាគតនឹងមានអគារខ្ពស់ៗច្រើនផងដែរ។
លោក ឃុត ពុធ អតីតអ្នកគ្រប់គ្រងព្រលានយន្តហោះក្នុងទីរួមខេត្តកោះកុង បានថ្លែងប្រាប់ក្រុមអ្នកសារព័ត៌មានកាលពីពេលថ្មីនេះថា លោកស្វាគមន៍ចំពោះការស្តារឡើងវីញនូវខេត្តកោះកុងនេះ នឹងធ្វើមានទេសចរណ៍មកលេងកម្សាន្តកាន់តែច្រើន និងអចលនទ្រព្យ ទាំងដីធ្លីនៅក្នុងខេត្តជាប់ព្រុំដែនថៃមួយនេះ មានឡើងថ្លៃ រួមជាមួយនឹងអគារខ្ពស់ៗក៏នឹងដុះឡើងផងដែរ។
លោកបន្ថែមថា ប្រជាពលរដ្ឋនៅក្នុងខេត្ត នឹងទទួលបានផលពីការលក់ដីធ្លីរបស់ពួកគេ ព្រោះនឹងមានក្រុមហ៊ុនវិយោគមកបណ្តាក់ទុននៅក្នុងខេត្តនេះ កាន់តែច្រើនឡើងថែមទៀត។ បន្ថែមពីនេះលោក ក៏បានស្នើរដល់អាជ្ញារខេត្តរៀងចំ រមណីយដ្ឋានឱ្យបានកាន់តែច្រើនថែមទៀត ដើម្បីបង្កើនការទាក់ទាញការវិនិយោគ និងទេសចរណ៍ ខណៈបច្ចុប្បន្ននេះ ខេត្តមិនសូវសម្បូរតំបន់ទេសចរណ៍ច្រើននៅឡើយ។
អនុប្រធានសភាពាណិជ្ជកម្មខេត្តកោះកុង លោកជឹង សុខម៉េងបានមានប្រសាសន៍ឲ្យដឹងដែរថា ការរៀបចំស្តារឡើងវិញនូ ព្រលានយន្តហោះក្នុងខេត្ត ដោយក្រុមហ៊ុនក្រុមហ៊ុន Bangkok Airway និងក្រុមហ៊ុន LYP Group នឹងធ្វើឲ្យតម្លៃដីនៅក្នុងទីរួមខេត្តកើនឡើងបន្ថែមទៀត។
លោកបន្តថា ដីធ្លីនៅទីរួមខេត្តជុំវិញផ្សារទីរួមខេត្ត មានតម្លៃចន្លោះពី២៥០០ទៅ៣០០០ដុល្លារក្នុងមួយម៉ែត្រការ៉េ និងនៅតំបន់លំនៅដ្ឋានមានតម្លៃចន្លោះពី១០០ទៅ៣០០ដុល្លារក្នុងមួយម៉ែត្រការ៉េ។ ក្រៅពីទីរួមខេត្ត តំបន់បាក់ខ្លងមានតម្លៃ២០០ដុល្លារ នៅតាមផ្លូវតភ្ជាប់ ទៅកាន់ព្រំដែនថៃមានតម្លៃចន្លោះពី២០០ ទៅ៣០០ដុល្លារក្នុងមួយម៉ែត្រការ៉េ និងតំបន់កោះស្តេចដែលស្ថិតក្នុងតំបន់តារាសាគរ ដែលវិនិយោគដោយក្រុមហ៊ុន Union Development Group តម្លៃដីបានហក់ឡើងខ្ពស់ផងដែរ។
ព្រលានយន្តហោះខេត្តកោះកុង នឹងត្រូវបានស្តារឡើងវិញនៅឆ្នាំ២០២០ បន្ទាប់ពីបានផ្អាកដំណើរជើងហោះហើរ អស់រយ:ពេលជាច្រើនឆ្នាំមកហើយនោះ ប៉ុន្តែព្រលាននេះនឹងអាចបើកដំណើរការឡើងវិញនៅឆ្នាំ២០២០ ដើម្បីដាក់ឲ្យដំណើរការហោះហើរជាថ្មីម្តងទៀត ដោយការវិនិយោគរួមគ្នារវាងក្រុមហ៊ុនលោកឧកញ៉ា លី យ៉ុងផាត់ និងក្រុមហ៊ុន Bangkok Airway របស់ថៃ ដែលមានទំហំទឹកប្រាក់ប្រមាណ ៤០លានដុល្លាអាមេរិក៕
