ដោយ ម៉ាណេត
ភ្នំពេញៈ ក្រុមហ៊ុនអាកាសចរណ៍ Go Air គ្រោងនឹងបន្ថែមភ្នំពេញ និងហាណូយចូលជាគោលដៅហោះហើរខ្លួន ក្នុងបណ្តាញអន្ដរជាតិរបស់ខ្លួននៅដំណាច់ឆ្នាំនេះ។ នេះបើយោងតាមការចុះផ្សាយរបស់ក្រុមហ៊ុនកាលពីពេលថ្មីៗនេះ។
ក្រុមហ៊ុនអាកាសចរណ៍ ដែលកំពុងពង្រីកវត្តមាននៅអន្ដរជាតិរបស់ខ្លួន យ៉ាងឆាប់រហ័សនេះ ក៏នឹងពង្រីកខ្លួននៅប៊ូតានផងដែរនៅក្នុងប៉ុន្មានថ្ងៃខាងមុខ។ រហូតមកដល់ពេលថ្មីៗនេះ ក្រុមហ៊ុនអាកាសចរណ៍នេះ បានហោះហើរទៅកាន់ទិសដៅអន្តរជាតិត្រឹមតែបួនប៉ុណ្ណោះគឺភូកេត ម៉ាឡេ ម៉ាសឆាត និងអាប៊ូដាប៊ី។
កាលពីពេលថ្មីៗនេះ ក្រុមហ៊ុនបានចាប់ផ្តើមបើកការហោះហើរទៅកាន់គោលដៅអន្តរជាតិថ្មីៗរួមមាន Delhi-Abu Dhabi, Mumbai-Abu Dhabi, Mumbai-Muscat, Delhi-Bangkok និង Kannur-Kuwait ។
ទោះជាយ៉ាងណាក៏ដោយ ការហោះហើរអន្តរជាតិថ្មីទាំងនេះមួយចំនួន កំពុងត្រូវបានដំណើរការនៅទីផ្សារ ដែលត្រូវបានបម្រុងទុករបស់ក្រុមហ៊ុន Jet Airways ។
អនុប្រធានក្រុមហ៊ុន Go Air ផ្នែកប្រតិបត្តិការអន្តរជាតិ លោក Arjun Dasgupta បានប្រាប់សារព័ត៌មាន IANS ថា ក្រុមហ៊ុនអាកាសចរណ៍នេះកំពុងពិចារណាពីការពង្រីកបន្ថែមទៀតនៅអាស៊ីអាគ្នេយ៍ និងបណ្តាប្រទេសផ្សេងៗទៀត។
លោក Dasgupta បានបង្ហាញថា ទិសដៅនឹងត្រូវបានជ្រើសរើសដោយក្រុមហ៊ុនអាកាសចរណ៍យើង។ បច្ចុប្បន្នក្រុមហ៊ុនអាកាសចរណ៍នេះ កំពុងប្រតិបត្តិការយន្តហោះ Airbus A320Neos ដែលមានភាពធនក្នុងរយៈពេលហោះហើរប្រហែល៦ម៉ោង។
ដោយសារតែផែនការពង្រីករបស់ខ្លួន ក្រុមហ៊ុនអាកាសចរណ៍នេះបានបង្កើនចំនួនយន្តហោះរបស់ខ្លួន ហើយថ្មីៗនេះបានដឹកជញ្ជូនយន្តហោះទី៥១របស់ខ្លួន។ នាខាងមុខ ក្រុមហ៊ុន នឹងត្រូវបានបន្ថែមយ៉ាងហោចណាស់យន្តហោះមួយជារៀងរាល់ខែ។
ជាមួយគ្នានេះដែរលោក Dasgupta បាននិយាយថា ក្រុមហ៊ុនមានគូប្រកួតប្រជែងជាច្រើនដូចជា ក្រុមហ៊ុនអាកាសចរណ៍ Jet Airways ផងដែរ។
គូប្រជែងមួយចំនួនរបស់ក្រុមហ៊ុន Go Air បានភ្ជាប់ទំនាក់ទំនងជាមួយក្រុមហ៊ុនអាកាសចរណ៍ទួរគី និងអេមីរេត។ ទោះយ៉ាងណាក្រុមហ៊ុន Dasgupta បាននិយាយថា ក្រុមហ៊ុនអាកាសចរណ៍ទាំងនេះ ក៏អាចមានការភ្ជាប់បន្ថែមទៀតផងដែរ។
កិច្ចព្រមព្រៀងលេខកូដ និងកិច្ចព្រមព្រៀងអន្តរទ្វីបរវាងក្រុមហ៊ុនអាកាសចរណ៍អនុញ្ញាតឱ្យមានបទពិសោធន៍ ធ្វើដំណើរសម្រាប់អ្នកដំណើរឆ្លងកាត់បណ្តាញសកល។
លើសពីនេះទៅទៀត លោក Dasgupta បានបញ្ជាក់ថា ចំនួនអ្នកប្រកួតប្រជែងអន្តរជាតិកើនឡើងកាន់តែច្រើន កំពុងសម្លឹងមើលទីផ្សារឥណ្ឌា សម្រាប់ការបង្កើនសក្តានុពល។
ក្រុមហ៊ុន Go Air បានដឹកជញ្ជូនអ្នកដំណើរប្រមាណ ៧៣,៣ លាននាក់ចាប់តាំងពីការចាប់ផ្តើម។ ក្រុមហ៊ុននេះមានបំណងទាក់ទាញអ្នកធ្វើដំណើរឲ្យបាន ១០០ លាននាក់នៅក្នុងរយៈពេលពីរឆ្នាំខាងមុខ។
លោកស្រីឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានមានប្រសាសន៍ឱ្យដឹងកាលពីពេលថ្មីៗនេះថា ឥណ្ឌាមានភ្ញៀវទេសចរណ៍ច្រើន ជាជាភ្ញៀវដែលចំណាយប្រាក់ច្រើននៅតាមបណ្តាប្រទេសនានា ប៉ុន្តែកម្ពុជាទាក់ទាញភ្ញៀវទេសចរណ៍ឥណ្ឌាបានក្នុងកម្រិតទាបនៅឡើយ ដោយសារកម្ពុជា និងឥណ្ឌាមិនទាន់មានការភ្ជាប់ជើងហោះហើរច្រើន ហេតុនេះទើបសមាគមចង់ឱ្យមានការហោះហើរត្រង់ រវាងប្រទេសទាំងពីរ។
លោកស្រីបន្តថា “ទោះជាយ៉ាងណាសេវាបដិសណ្ឋារកិច្ច សម្រាប់ភ្ញៀវឥណ្ឌានៅមានកម្រិតនៅកម្ពុជា ដោយយើងមិនទាន់មានភោជនីយដ្ឋានឥណ្ឌា ច្រើននៅឡើយទេ ហេតុនេះនៅពេលមានភ្ញៀវក្រុមធំៗមកដល់ យើងជួបការលំបាក”៕
