ដោយៈ រ៉ាណេត
ភ្នំពេញៈ ក្នុងនាមជាអ្នកដឹកនាំអ្នកត្រូវការនិយាយច្រើន អនុវត្តន៍ជាគំរូច្រើន ហត់នឿយបន្តិចហើយ ។ នៅលើផ្លូវមួយនេះ អ្នកប្រហែលជាត្រូវជួបគ្រោះភ័យជាច្រើនយ៉ាង។ អ្នកត្រូវជួបភាពភ័យខ្លាច ការបាក់ទឹកចិត្ត ហើយមានបញ្ហាជីវិតជាច្រើនទៀត ដែលចូលខ្លួនមកតាមរំខានអ្នកមិនឱ្យទទួលបានជោគជ័យ។
អ្នកជោគជ័យលើលោកទាំងអស់ ភាគច្រើនសុទ្ធតែកើតចេញមកពីស្ថានភាពលំបាក ហើយក៏កើតចេញមកពីការប្រឹងប្រែងយ៉ាងអស់ពីសមត្ថភាព ដើម្បីពុះបំបែកគ្រោះកាចទាំងឡាយ ប្រកបទៅដោយក្តីសង្ឃឹម រហូតដល់ឃើញពន្លឺយ៉ាងត្រចះត្រចង់ នៃលទ្ធផលដែលមនុស្សគ្រប់គ្នាមិនអាចធ្វើបាន។
តើអ្នកដឹងទេ! មានតែការដែលហ៊ានប្រឈមជាមួយនឹងបញ្ហាទេ ទើបអាចធ្វើឱ្យអ្នកសម្រេចជោគជ័យបានដោយក្តីអស្ចារ្យ! មានតែការដែលអ្នកហ៊ានបំបែកនូវរបាំងនៃភាពភ័យខ្លាច ដើម្បីចូលខ្លួនមកច្បាំងជាមួយនឹងភាពលំបាកទាំងឡាយ ហើយប្រឈមមុខជាមួយវាគ្រប់កាលលៈទេ ទើបអាចធ្វើឱ្យអ្នកទទួលបាននូវស្នាមញញឹម និងវីរៈភាពអមតៈ។ មនុស្សភាគច្រើនតែងតែខ្លាចឧបសគ្គ ចង់គេចចេញពីស្ថានភាពលំបាក និងមិនចង់តស៊ូក្នុងជីវិត តែពួកគេភ្លេចទៅហើយថា ពួកគេជាមនុស្ស! ពួកគេមិនអាចគេចផុតពីស្ថានភាពប្រែប្រួលនៃធម្មជាតិរបស់មនុស្សបានទេ។
បើគិតឱ្យល្អិតជាងនេះ ទៅទៀតយើងនឹងឃើញថា ដរាបណាផែនដីនៅតែវិល ជីវិតរបស់អ្នកនៅតែមានសុខ និងទុក្ខ ក៏ប្រាកដជាផ្លាស់ប្តូរវេនគ្នា ចូលមកក្នុងអារម្មណ៍របស់អ្នកជាដរាប ហាក់ដូចជាដំណើរវិវត្តនៃថ្ងៃដូចច្នោះដែរ។
ច្បាប់ធម្មជាតិបានកំណត់ថា គ្មានអ្នកណាសុខរហូតនោះទេ តែក៏គ្មានអ្នកណាទុក្ខរហូតនោះដែរ ហេតុនេះទុក្ខដែលអ្នកកំពុងប្រឈមប្រាកដជា នឹងរលត់នៅពេលណាមួយជាក់ជាមិនខាន ហើយអ្វីដែលអ្នកត្រូវធ្វើនោះ គឺមិនមែនអង្គុយចិញ្ចឹមទុក្ខនោះទេ តែត្រូវក្រោកឈរឡើងហើយដើរសំដៅទៅរកពន្លឺថ្មីនៃជីវិត។
ប្រសិនបើអ្នកចង់ក្លាយទៅជាអ្នកដឹកនាំពិតប្រាកដមែន នោះអ្នកនឹងអាចក្លាយទៅជាអ្នកដឹកនាំជាក់ជាមិនខាន ព្រោះថាប្រសិនបើអ្នកអាចអនុវត្តតាមចំណុចវិជ្ជមានទាំងអស់នេះ ទោះជាមិនអាចក្លាយទៅជាអ្នកដឹកនាំសង្គម យ៉ាងហោចណាស់អ្នកក៏ក្លាយជាអ្នកដឹកនាំខ្លួនឯង ឬគ្រួសារដ៏ល្អម្នាក់ដែរ៕
