ដោយ ម៉ាណេត
ខេត្តព្រះសីហនុៈ អន្តរក្រសួងបានគាំទ្រដល់គម្រោងបង្កើតតំបន់សេដ្ឋកិច្ចពិសេសខេមបូឌាន-ស៊ីណូ មេធលលីក មេធៀរៀលទៀតនៅខេត្តព្រះសីហនុ ខណៈបច្ចុប្បន្នខេត្តព្រះសីហនុមានគម្រោងសាងសង់ជិត១០០០ គម្រោង។
លោកសូត យា អនុរដ្ឋលេខាធិការប្រចាំការ នៃក្រសួងបរិស្ថាន បានដឹកនាំកិច្ចប្រជុំអន្តរក្រសួងលើកទី២កាលពីថ្ងៃទី១ សីហាកន្លងមកនេះ ដើម្បីពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលញ (ESIA) សម្រាប់គម្រោងបង្កើតតំបន់សេដ្ឋកិច្ចពិសេស ខេមបូឌាន-ស៊ីណូ មេធលលីក មេធៀរៀល។
គម្រោងសេដ្ឋកិច្ចពិសេសនឹងរៀបចំលើផ្ទៃដីទំហំ៥៥ហិកតា ដែលមានទីតាំងភូមិសាស្ត្រស្ថិតនៅភូមិឬទ្ធី១ ឃុំកែវផុស ស្រុកស្ទឹងហាវ ខេត្តព្រះសីហនុ របស់ក្រុមហ៊ុន ខេមបូឌាន-ស៊ីណូ មេធលលីក មេធៀរៀល អ៊ិនដាស្ទ្រៀល ផាក ឯ.ក (ម្ចាស់គម្រោង) និងរៀបចំរបាយការណ៍ ESIA ដោយក្រុមហ៊ុនទីប្រឹក្សា E & A CONSULTANT CO., LTD.។
លទ្ធផលនៃកិច្ចប្រជុំនេះរួមមាន ទី១. អង្គប្រជុំគាំទ្រលើគម្រោងបង្កើតតំបន់សេដ្ឋកិច្ចពិសេសនេះ ទី២ ម្ចាស់គម្រោងត្រូវអនុវត្តតាមអនុក្រឹត្យស្តីពីការបង្កើត និងការគ្រប់គ្រងតំបន់សេដ្ឋកិច្ចពិសេស ទី៣ ម្ចាស់គម្រោងត្រូវអនុវត្តតាមអនុក្រឹត្យស្តីពីការដាក់ឱ្យប្រើប្រាស់បញ្ជីមុខទំនិញហាមឃាត់ និងទំនិញជាប់កម្រិតកំណត់។ ទី៤. បញ្ហាគ្រប់គ្រងសំណល់រឹង-រាវ ម្ចាស់គម្រោងត្រូវរៀបចំអាងប្រព្រឹត្តិកម្មសំណល់រាវ ដែលមានសមត្ថភាពសម្អាតសំណល់រាវ ដោយអនុលោមតាមស្តង់ដារកំណត់របស់ក្រសួងបរិស្ថាន។ ចំពោះសំណល់រឹងក៏ត្រូវរៀបចំកន្លែងទុកដាក់ និងគ្រប់គ្រងឱ្យបានត្រឹមត្រូវ។
ទី ៥. ម្ចាស់គម្រោងត្រូវរៀបចំប្រព័ន្ធលូ និងប្រព័ន្ធទឹកភ្លៀងឱ្យដាច់ដោយឡែកពីគ្នា ទី៦. ការប្រើប្រាស់ទឹក៖ ម្ចាស់គម្រោងត្រូវពិចារណាជីកស្រះទឹកបន្ថែម សម្រាប់ប្រើប្រាស់ក្នុងតំបន់ សេដ្ឋកិច្ចពិសេស ជៀសវាងប៉ះពាល់ដល់ការប្រើប្រាស់ទឹករបស់ប្រជាជន ទី៧. ម្ចាស់គម្រោងត្រូវយកចិត្តទុកដាក់លើសុខភាព និងសុវត្ថិភាពកម្មករ និងនិយោជិត ដោយត្រូវ បំពាក់ឧបករណ៍ការពារសុវត្ថិភាព រៀបចំកន្លែងស្នាក់នៅ និងអាហារដ្ឋានឱ្យបានសមរម្យជាដើម។
វិស័យសំណង់នៅក្នុងខេត្តព្រះសីហនុ មានការអភិវឌ្ឍរីកចម្រើនយ៉ាងគំហុក ក្នុងនោះចាប់ពីឆ្នាំ២០០៧ ដល់ខែកក្កដា ឆ្នាំ២០១៩ មានគម្រោងសាងសង់ជិត១០០០ គម្រោង។ អគារកម្ពស់ចាប់ពី៥ជាន់រហូតដល់ ៤២ជាន់សរុបមានចំនួន២១៨គម្រោង។
គិតត្រឹមថ្ងៃទី២២ ខែកក្កដា ឆ្នាំ ២០១៩ នៅមាន ១១៥ ការដ្ឋានទៀតដែលមិនទាន់មានរបាយការណ៍វាយតម្លៃ និងមានការដ្ឋានចំនួន ៣០៧ ការដ្ឋានទៀតសម្រាប់ដាក់ជូនក្រុមការងារបច្ចេកទេសទាំង២៣ ក្រុមរបស់គណៈកម្មការត្រួតពិនិត្យសំណង់នៅខេត្តព្រះសីហនុ ដើម្បីពិនិត្យក្នុងដំណាក់កាលទី៥បន្តទៀត។
ដើម្បីគ្រប់គ្រងការដ្ឋានសំណង់នៅខេត្តព្រះសីហនុ ឱ្យមានប្រសិទ្ធភាព រដ្ឋបាលខេត្តក៏បានបង្កើតក្រុមការងារចុះត្រួតពិនិត្យ តាមដាន ទប់ស្កាត់លើការដ្ឋានសាងសង់នៅក្នុងខេ្តតដែលមិនទាន់មានលិខិតអនុញ្ញាត ឬការសាងសង់ខុសពីលិខិតអនុញ្ញាត និងបទដ្ឋានគតិយុត្តិសម្រាប់គម្រោងផ្សេងៗទៀត៕
