ដោយវុត្ថា
សៀមរាបៈ ក្រសួងព្រះបរមរាជវាំង កំពុងចាប់ដំណើរការសាងសង់គម្រោងកែលម្អសួនច្បារព្រះរាជដំណាក់ខេត្តសៀមរាប ហើយគ្រោងនឹងបញ្ចប់ទាំងស្រុងនៅដើមឆ្នាំ២០២១ ដើម្បីទាក់ទាញភ្ញៀវទេសចរណ៍។
យោងតាមការផ្សាព្វផ្សាយរបស់រដ្ឋបាលខេត្តសៀមរាបបានឱ្យដឹងនៅថ្ងៃទី ២៧ ខែកុម្ភៈ ឆ្នាំ ២០២០ នេះ បានឱ្យដឹងថា ក្រសួងព្រះបរមរាជវាំង បានរៀបចំពិធីក្រុងពាលីដើម្បីចាប់ដំណើរការជួសជុលកែលម្អ សួនច្បារព្រះរាជដំណាក់ខេត្តសៀមរាប ចាប់ពីថ្ងៃទី២៦ ខែកុម្ភៈ ឆ្នាំ២០២០ ហើយគ្រោងនឹងបញ្ចប់ទាំងនៅដើម ឆ្នាំ២០២១។
ប្រភពដដែលបញ្ជាក់ថា គម្រោងកែលម្អនេះ នឹងមានរៀបចំនៅរបង ក្លោងទ្វារ សួនច្បារ ការសាងសង់ផ្លូវថ្មី ដើម្បីសម្រួលចរាចរ ដែលគម្រោងនេះ នឹងបញ្ចប់ជាដំណាក់កាលៗ តាមផ្នែកនីមួយៗផងដែរ។
បើតាមមន្ត្រីសាលាខេត្តសៀមរាបបានឲ្យដឹងថា ក្រោយពីបញ្ចប់ការសាងសង់ សំណង់ខ្លោងទ្វារនេះ នឹងក្លាយទៅជាសមិទ្ធផល និងរមណីយដ្ឋានមួយថ្មីបន្ថែមទៀត សម្រាប់លើកមុខមាត់របស់ខេត្តសៀមរាប ដែលជាខេត្តទេសចរណ៍ធំបំផុតរបស់កម្ពុជាបន្ទាប់ពីរាជធានីភ្នំពេញ។
បន្ថែមពីនេះវានឹងធ្វើឲ្យសោភ័ណភាពរបស់ក្រុងសៀមរាប កាន់មានភាពស្រស់ស្អាត កាន់តែមានភាពទាក់ទាញបន្ថែមទៀត ចំពោះអ្នកទេសចរណ៍ ទាំងអ្នកទេសចរជាតិ និង អន្តរជាតិ ខណៈបច្ចុប្បន្នតំបន់នេះ ជាតំបន់ដែលមានការទាក់ទាញរួចជាស្រចទៅហើយសម្រាប់ភ្ញៀវទេសចរ ពិសេសគឺជាកន្លែងសម្រាប់កម្សាន្តលំហែកាយ និងកន្លែងហាត់ប្រាណរបស់ប្រជាពលរដ្ឋ ដែលកំពុងរស់នៅក្នុងក្រុងសៀមរាប ៕
