ដោយៈ រ៉ាណេត
ភ្នំពេញៈ អ្នកណាៗក៏សុទ្ធតែមានក្ដីស្រមៃរបស់ខ្លួនទាស់ត្រង់ថា ក្ដីស្រមៃមានទំហំប៉ុនណា ហើយក្ដីប្រាថ្នាទៅលើអ្វីឱ្យពិតប្រាកដ រហូតមានអ្នកខ្លះហ៊ានលះបង់ និងព្យាយាមជំនះឧបសគ្គច្រើនរាប់មិនអស់ ដើម្បីអាចសម្រេចបាន។
នៅក្នុងប្រធានបទនេះ ត្រូវបានអ្នកជំនាញអះអាងថា ភាពជោគជ័យដែលអាចធ្វើឱ្យក្ដីស្រមៃក្លាយជាការពិតភាគច្រើន ត្រូវបានគេអនុវត្ត៣ចំណុចខាងក្រោមនេះ។
១. ចាប់ផ្ដើមបំបែកគោលដៅជាផ្នែកតូចៗ
ការបំបែកគោលដៅជាផ្នែក/កំណាត់តូចៗ ជាគនឹ្លះមួយដ៏ល្អក្នុងការត្រៀមខ្លួនដើម្បីទទួលយកភាពជោគជ័យ។ ការដែលអ្នកមិនបំបែកគោលដៅជាផ្នែកៗតូច ដើម្បីយកមកធ្វើ វានឹងធ្វើឱ្យអ្នកមានការឈឺក្បាល និងស្មុគស្មាញខ្លាំងនៅក្នុងការធ្វើការងារមួយឱ្យបានសម្រេចលទ្ធផលធំ។ បើសិនអ្នកមានគោលដៅធំ គួរតែបំបែកវាជាផ្នែកតូចៗដើម្បីឱ្យអ្នកមានភាពងាយស្រួល ក្នុងការសម្រេចគោលដៅទាំងនោះមួយដំណាក់កាលម្តងៗ។
២. ផ្ដល់អនុភាពចំពោះការធ្វើការជាប្រព័ន្ធ
ប្រសិនបើអ្នកចង់ទទួលបានជោគជ័យ អ្នកត្រូវតែធ្វើការងារជាលក្ខណប្រព័ន្ធ ពីព្រោះការប្រើប្រាស់ប្រព័ន្ធ នឹងជួយឱ្យអ្នកមានភាពងាយស្រួល ក្នុងការធ្វើការងារយ៉ាងមានប្រសិទ្ធភាព។ ចូរពឹងផ្អែកលើប្រព័ន្ធ ឱ្យបានច្រើនជាងការពឹងផ្អែកតែទៅលើមនុស្ស។
៣. ត្រូវស្វែងរកជំនួយនៅពេលជួបបញ្ហា
យើងទាំងអស់គ្នា មិនមែនសុទ្ធតែពូកែគ្រប់រឿងនោះទេ ដោយមានពេលខ្លះក៏មានរឿងដែលធ្វើឱ្យយើងខកចិត្តដែរ។ នោះហើយគឺជាផ្នែកដ៏សាមញ្ញ នៅក្នុងជីវិតរបស់មនុស្ស។ គន្លឹះក្នុងការទទួលបានភាពជោគជ័យ គឺជាការដែលយើងត្រូវចេះស្វែងរកជំនួយនៅពេល ដែលជួបបញ្ហាមិនអាចដោះស្រាយបាន។ មនុស្សឆ្លាត និងពូកែតែងតែស្វែងរកជំនួយពីអ្នកដទៃ នៅពេលដែលពួកគេជួបបញ្ហាពិបាកដោះស្រាយ៕
