ដោយ ហ្សូលី
ភ្នំពេញ៖ យ៉ាងហោចណាស់ រោងចក្រចំនួន ៩១ នៅក្នុងប្រទេសកម្ពុជា ត្រូវផ្អាកបណ្តោះអាសន្ន ដោយសារការរីករាលដាលនៃវិបត្តិជំងឺកូវីដ ១៩ ក្នុងនោះកម្មករ កម្មការរិនី ចំនួន ៦១៥០០នាក់ រងផលប៉ះពាល់។ នេះបើតាមការលើកឡើងរបស់ អ្នកនាំពាក្យក្រសួងការងារនិងបណ្តុះវិជ្ជាជីវៈកាលពីពេលថ្មីៗនេះ។
លោក ហេង សួរ អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈ បានថ្លែងប្រាប់ទីភ្នាក់ងារសារព័ត៌មាន Reuters ថា «គិតមកទល់សប្តាហ៍នេះ មានរោងចក្រប្រមាណ ៩១ រោងចក្រ ដែលស្ថិតនៅក្រោមការព្យួរបណ្តោះអាសន្ន។»
លោកបន្តថា រដ្ឋាភិបាលកម្ពុជាបានផ្តល់ប្រាក់ខែជំនួសដល់កម្មករចំនួន ៦១៥០០នាក់ ដែលក្នុងមួយខែចំនួន ៣៨ ដុល្លារផងដែរ។
ការបិទរោងចក្រនៅក្នុងប្រទេសកម្ពុជាមានចំនួនស្មើ ១ភាគ៦ តែប៉ុណ្ណោះ ដែលរួមមានឧស្សាហកម្មដេរស្បែកជើងនិងសម្លៀកបំពាក់មានតម្លៃប្រមាណ ៧ពាន់លានដុល្លារ។
វិស័យឧស្សាហកម្មនេះបានបម្រើការផ្គត់ផ្គង់ផលិតផលទៅលើម៉ាកល្បីៗមួយចំនួននៅសកលោកដូចជា H&M Adidas Puma និង Levi Strauss ដែលសុទ្ធសឹងជាវិនិយោគិនដែលមកពីបណ្តារប្រទេសធំលើសកលលោក។ រីឯនិយោជិតដែលបម្រើការងារនេះវិញមានចំនួន ៨៥០,០០០ នាក់។
ជាមួយគ្នានេះ បើតាមការប្រកាសរបស់សម្តេចតេជោ រដ្ឋាភិបាលបានត្រៀមថវិកាចន្លោះប្រមាណពី ៨០០លាន ទៅ ២ពាន់លានដុល្លារ ដើម្បីជួយសង្គ្រោះសេដ្ឋកិច្ចកម្ពុជា ឱ្យមានស្ថេរភាពនិងរក្សាលំនឹង។ មិនតែប៉ុណ្ណោះ ដើម្បីជួយសម្រួលដល់ជីវភាពរបស់កម្មករកម្មការិនី សម្តេចក៏បានស្នើដល់អគ្គិសនីកម្ពុជា និងរដ្ឋាករទឹកត្រូវផ្តល់ការយោគយល់ឱ្យកម្មកររោងចក្រដែលព្យួរការងារជំពាក់សិនផងដែរ៕
(Reuters)
