ដោយវុត្ថា
ភ្នំពេញៈ រដ្ឋមន្ត្រីក្រសួងប្រៃសណីយ៍ និងទូរសគមន៍ថ្មី លោក ជា វ៉ាន់ដេតបានឱ្យដឹងថា ហេដ្ឋារចនាសម្ព័ន្ធរបស់ក្រុមហ៊ុនCambodia Fiber Optic Communication Network Co., Ltd (CFOCN) ដែលបានវិនិយោគនៅកម្ពុជាអស់ជាង១០ឆ្នាំកន្លងមកនេះ បានរួមចំណែកជួយជំរុញដល់កំណើនសេដ្ឋកិច្ចកម្ពុជា។
លោកជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ នៅក្នុងជំនួបពិភាក្សាជាមួយ លោក Huang Xinglong ប្រធានក្រុមប្រឹក្សាភិបាលក្រុមហ៊ុន HyalRoute Group ជាក្រុមហ៊ុនមេរបស់ក្រុមហ៊ុនCFOCN នៅថ្ងៃទី ៦ ខែមេសា ឆ្នាំ ២០២០ នេះឱ្យដឹងថា ការចូលរួមចំណែករបស់ក្រុមហ៊ុនCFOCNនៅកម្ពុជា ជាការគាំទ្រដល់ដំណាក់កាលថ្មីនៃការអភិវឌ្ឍបែបសេដ្ឋកិច្ចឌីជីថល និងរដ្ឋាបាលឌីជីថល ដើម្បីបម្រើដល់បដិវត្តន៍ឧស្សាហកម្មទី៤។
លោករដ្ឋមន្ត្រីថ្មី ក៏បានស្នើដល់ក្រុមហ៊ុនផ្តល់កិច្ចសហការ ជាមួយក្រុមហ៊ុនទូរគមនាគមន៍កម្ពុជា (Telecom Cambodia – TC ) ក្នុងការអនុញ្ញាតឲ្យក្រុមហ៊ុន TC អាចប្រើប្រាស់នូវបណ្តាញខ្សែកាប្លិ៍អុបទិករបស់ក្រុមហ៊ុន CFOCN ដើម្បីកុំឲ្យមានការរំខានដល់អ្នកប្រើប្រាស់ ដោយសារតែការពង្រីក និងសាងសង់ផ្លូវជាតិលេខ 2,3,4 និង5 បានធ្វើឱ្យខូចខាតបណ្តាញរបស់ខ្សែកាប្លិរបស់ TC។
ក្រសួងប្រៃសណីយ៍និងទូរគមនាគមន៍ នឹងសហការជាមួយក្រសួងស្ថាប័នផ្សេងៗទៀត ដើម្បីត្រៀមខ្លួនទទួលយកនូវបច្ចេកវិទ្យាថ្មីឲ្យបានទូលំទូលាយ នៅតាមគ្រឹះស្ថានអប់រំ សាលារៀន ក្រុមហ៊ុនធុរកិច្ច អង្គការសង្គមស៊ីវិល អង្គការមិនមែនរដ្ឋាភិបាល និងឈានទៅដល់ក្រសួង ស្ថាប័នរដ្ឋ។
លើសពីនេះទៀត ក្រសួងនឹងជំរុញឲ្យមានអភិបាលកិច្ចល្អ តាមរយៈការរៀបចំនូវក្របខណ្ឌច្បាប់ លិខិតបទដ្ឋានគតិយុត្ត គោលនយោបាយ និងRoad Map ដើម្បីគាំទ្រដល់សេដ្ឋកិច្ចឌីជីថល និងរដ្ឋបាលឌីជីថល ព្រមទាំងធ្វើការកែទម្រង់របៀបរបបធ្វើការរបស់មន្ត្រី ដើម្បីបម្រើដល់ប្រយោជន៍ជាតិ និងធ្វើឲ្យក្រុមហ៊ុនធុរកិច្ចនានាសប្បាយចិត្ត និងបង្កើនការវិនិយោគក្នុងប្រទេសកម្ពុជា៕
