ដោយ ៖ រ៉ាណេត
ភ្នំពេញ ៖ ស្ថិតនៅក្នុងស្ថានការណ៍ដែលកម្ពុជាកំពុងតែអនុវត្តយុទ្ធនាការប្រយុទ្ធប្រឆាំងជាមួយការរីករាលដាលនៃជំងឺ Covid-19 គម្រោងវិនិយោគធំៗចំនួន២នៅក្នុងវិស័យឧស្សាហកម្មមានទុនសរុបជាង៨លានដុល្លារ ត្រូវបានរដ្ឋាភិបាលគាំទ្រ និងអនុម័តជាស្ថាពរឱ្យដំណើរការសង្វាក់ផលិតកម្មស្ថិតនៅខេត្តចំនួន២ផ្សេងគ្នា។
តបតាមសំណើសុំវិនិយោគរបស់ក្រុមហ៊ុនចំនួន២ ដែលដំណើរការនៅក្នុងវិស័យឧស្សាហកម្ម គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញវិញ្ញាបនបត្រចុះបញ្ជីជាស្ថាពរ ដែលក្រុមហ៊ុនទាំង២នេះមានឈ្មោះដូចខាងក្រោម ៖
១- ក្រុមហ៊ុន CAMBODIAN FG-XN PACKAGING INDUSTRIAL CO., LTDប្រតិបត្តិការលើគម្រោងបង្កើតរោងចក្រផលិតកាបូប និងថង់យួរគ្រប់ប្រភេទ (ពីក្រណាត់) ដែលមានទីតាំងស្ថិតនៅភូមិទួលធ្នង់ ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ ក្រោមទុនវិនិយោគប្រមាណ ៤,៧លានដុល្លារអាមេរិក និងអាចបង្កើតការងារបានចំនួន ៥១៦កន្លែង។
២-ក្រុមហ៊ុន NAMPER PACKAGING (CAMBODIA) CO., LTDប្រតិបត្តិការលើគម្រោងបង្កើតរោងចក្រផលិតកេសកាតុង ដែលមានទីតាំងស្ថិតនៅផ្លូវជាតិលេខ២ ភូមិល្វេថ្មី ឃុំប្រាំបីមុំ ស្រុកទ្រាំង ខេត្តតាកែវ មានទុនវិនិយោគប្រមាណ ៣,៩លានដុល្លារអាមេរិក និងអាចបង្កើតការងារបានចំនួន ២២២កន្លែង។
