ដោយវុត្ថា
ភ្នំពេញៈ រដ្ឋាភិបាលកម្ពុជាបានស្នើឱ្យអ្នកបញ្ជាទិញ លើមុខទំនិញធ្វើដំណើរ វាយនភណ្ឌ និងស្បែកជើងពីប្រទេសកម្ពុជា ឱ្យគោរតាមកិច្ចសន្យា និងមិនត្រូវលុបចោលនៃការបញ្ជាទិញរបស់ខ្លួន ដើម្បីប្រយោជន៍ដល់កម្មករនិយោជិតរាប់លាននាក់។
នៅក្នុងលិខិតមួយច្បាប់ដែលចុះហត្ថលេខា ដោយ លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា ផ្ញើរជូនអ្នកបញ្ជាទិញនៅថ្ងៃទី១៣ ខែមេសា ឆ្នាំ២០២០ នេះ បានឱ្យដឹងថា ការរីករាលដាលជាសកលនៃជំងឺCovid-19ជាសកល បានធ្វើឱ្យប៉ះពាល់ដល់ការរស់នៅ រួមជាមួយនឹងការធ្វើអាជីវកម្ម និងការផ្គត់ផ្គង់។
លោកបន្តថា កម្ពុជា គឺជាប្រទេសតែមួយគត់ក្នុងពិភពលោក ដែលមានពាណិជ្ជកម្ម ជាមួយស្តង់ដារពលកម្មល្អ ចាប់តាំងពីឆ្នាំ២០០១ និងជាដៃគូជាមួយអង្គការពលកម្មអន្តរជាតិ (ILO) ដែលដាក់ឱ្យដំណើរការរោងចក្រកាន់តែប្រសើរនៅកម្ពុជា ដែលតម្រូវឱ្យការនាំចេញទាំងអស់ របស់រោងចក្រកាត់ដេរក្នុងប្រទេសកម្ពុជា មានការត្រួតពិនិត្យដោយ ILO ដើម្បីធានាដល់ការគោរពច្បាប់ស្តង់ដារពលកម្មជាតិ និងអន្តរជាតិ។
លោកប៉ាន សូរស័ក្តិបានបន្តថា “យើងមានមោទនភាពចំពោះកិច្ចការនេះ និងបន្ត ធានាដល់សិទ្ធិសង្គម និងពលកម្មរបស់កម្មកររបស់យើង ដែលត្រូវបានលើកកម្ពស់ ខណៈដែលយើងកំពុងកសាងបណ្តាញនៃការផ្គត់ផ្គង់”។ លោកបន្ថែមថា “ខ្ញុំសូមអំពាវនាវដល់ដល់ដៃគូ និងអ្នកបញ្ជាទិញលើមុខទំនិញធ្វើដំណើរ វាយនភ័ណ្ឌ និងស្បែកជើងពីប្រទេសកម្ពុជា រក្សាការប្តេជ្ញាចិត្តរបស់កម្ពុជា និងជាពិសេសកម្មករកម្មរិនី និងសូមទទួលយកនូវកិច្ចសន្យា និងមិនត្រូវលប់ចោលនូវការបញ្ជាទិញ ដែលបានរៀបចំរួចហើយ និងទំនិញដែលត្រូវបានផលិតរួចហើយ ឬ កំពុងផលិតនាពេលបច្ចុប្បន្ននេះ”។
លោកបន្ថែមថា “អ្នកទាំងអស់គ្នាបានចែករំលែកនូវ ការអភិវឌ្ឍសង្គមដល់ប្រជាពលរដ្ឋសកម្ពុជារាប់លាននាក់ ដែលពឹងផ្អែកលើវិស័យមួយនេះ សម្រាប់ការរស់នៅរបស់ពួកគេ”។
សមាគមរោងចក្រកាត់ដេរនៅកម្ពុជា (GMAC) កាលពីពេលថ្មីៗនេះ ក៏បានអំពាវនាវដល់អ្នកបញ្ជាទិញទាំងអស់ ដែលទិញពីកម្ពុជាធ្វើការជាមួយគ្នា ដើម្បីអាចដោះស្រាយបញ្ហាលំបាកនានាបាន ក្នុងអំឡុងមានវិបត្តិនៃការរីករាលដាលជាសកល នូវជំងឺឆ្លងCovid-19។
GMACបញ្ជាក់តថា ការឆ្លងរាលដាលជាសកលនៃជំងឺCovid-19 បានធ្វើឱ្យមានចលាចលដល់ជីវិតរស់នៅ និងអាជីវកម្មរបស់យើងទាំងអស់គ្នា ដែលតម្រូវឱ្យរួមគ្នាដោះស្រាយបញ្ហាលំបាកទាំងនេះបាន។
សមាគមសូមជំរុញអ្នកបញ្ជាទិញមេត្តា គោរពតាមលក្ខណ្ឌនៃកិច្ចសន្យារបស់ខ្លួន ហើយបំពេញកាតព្វកិច្ចរបស់ខ្លួន ដោយទទួលយកការដឹកទំនិញ ហើយទូទាត់ប្រាក់សម្រាប់ទំនិញដែលបានផលិតរួចហើយ និងទំនិញដែលបច្ចុប្បន្នកំពុងផលិត។
GMACបានបន្តថា នេះនឹងធ្វើឱ្យយើងអាចបន្ត ផ្តល់ការងារដល់កម្មករ និយោជិត៧៥ម៉ឺននាក់របស់យើង និងធ្វើឱ្យយើងមានសមត្ថភាពបើកប្រាក់ឈ្នួល ជូនកម្មករនិងធានាដល់ជីវភាពរបស់ប្រជាពលរដ្ឋកម្ពុជារាប់លាននាក់។
សមាគមកសូមអំពាវនាវដល់អ្នកបញ្ជាទិញទាំងអស់ មេត្តារក្សាការទទួលខុសត្រូវចំពោះអ្នកផ្គត់ផ្គង់ និងកម្មករដែលបំរើការងារ នៅក្នុងវិស័យកាត់ដេររបស់យើង។ តាមរយៈការរួមគ្នា ប្រាកដណាស់ យើងអាចពុះពារឈ្នះជំងឺឆ្លងរាលដាលជាសកលនេះ ហើយអាចការពារជីវិតរបស់កម្មករយើង និងគ្រួសាររបស់ពួកគេ ហើយធានាដល់ការរស់រាននៃអាជីវកម្មរបស់យើង៕
