ដោយ ហ្សូលី
ភ្នំពេញៈ ទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូនស៊ុន ចាន់ថុល បានឱ្យដឹងថា ការស្ថាបនាហេដ្ឋារចនាសម្ព័ន្ធផ្លូវថ្នល់នៅតែជាកត្តាសំខាន់ និងមានសកម្មភាព ទោះបីជាពិភពលោកស្ថិតក្នុងវិបត្តិជំងឺឆ្លងCovid-19 ក៏ដោយ។
លោកទេសរដ្ឋមន្ត្រីបានថ្លែងក្នុងកិច្ចប្រចុំពិភាក្សាស្តីពី ថវិការជំពូក២១ កាលពីថ្ងៃចន្ទ ទី១៣ មេសា ឆ្នាំ ២០២០កន្លងមកថា ក្រសួងផ្តោតលើការចំណាយតែលើការជួសជុល ថែទាំ និងសាងសង់ហេដ្ឋារចនាសម្ព័្ធន្ធតែប៉ុណ្ណោះ ស្របតាមយុទ្ធសាស្រ្តរបស់រាជរដ្ឋាភិបាល និងបម្រើផលប្រយោជន៍ទូទៅដល់ជាតិមាតុភូមិ។
លោកបន្តថា “ការស្ថាបនាហេដ្ឋារចនាសម្ព័ន្ឋ ដើម្បីចូលរួមចំណែកក្នុងការកាត់បន្ថយភាពក្រីក្រ និងលើកកម្ពស់កំណើនសេដ្ឋកិច្ចជាតិ តាមរយៈការបង្កើនការដឹកជញ្ជូន និងបង្កើតការងារជូនប្រជាពលរដ្ឋទូទៅ”។
លោកស៊ុន ចាន់ថុលបានលើកទឹកចិត្ត និងជម្រុញឱ្យថ្នាក់ដឹកនាំដែលស្ថិតនៅក្រោមឱវាទរបស់ក្រសួង ដែលទទួលបន្ទុកការងារបច្ចេកទេសសាងសង់ ជួសជុល និងថែទាំផ្លូវ ត្រូវត្រួតពិនិត្យលក្ខណៈបច្ចេកទេសឱ្យបានទៀងទាត់ ទៅលើក្រុមហ៊ុនវិនិយោគទាំងអស់ដែលវិនិយោគនៅកម្ពុជា។
ជាពិសេសត្រូវជម្រុញដល់ក្រុមហ៊ុនវិនិយោគទាំងនោះ ឱ្យអនុវត្តតាមស្តង់ដាគុណភាពរបស់ក្រសួងដែលបានដាក់ចេញជាដាច់ខាត។
យ៉ាងណាមិញ ដោយបង្ហាញពីឆន្ទៈនិងការគោរពតាមបទបញ្ជារបស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ដែលដាក់ចេញឱ្យគ្រប់មន្ត្រីជាន់ថ្នាក់ និងបុគ្គលិកបម្រើការងារ ត្រូវតែមកបំពេញការងារជាធម្មតា ក្នុងឱកាសបុណ្យចូលឆ្នាំខ្មែរ នៅថ្ងៃទី ១៤ ខែមេសា ឆ្នាំ ២០២០នេះ ក្រុមការងាររបស់មន្ទីរសាធារណការ និងដឹកជញ្ជូនខេត្តនៅតែបន្តការសាង់សង់ ជួសជុល និងថែទាំផ្លូវនៅតាមបណ្តារឃុំ ស្រុក ភូមិ និងខេត្តមួយចំនួនដូចធម្មតា៕
