ដោយ ហ្សូលី
ប៉េកាំង៖ សេដ្ឋកិច្ចរបស់ប្រទេសចិនត្រូវបានគេរំពឹងថា នឹងងើបឡើងវិញនៅក្នុងត្រីមាសទី ២ បន្ទាប់ពីបានធ្លាក់ចុះនៅក្នុងត្រីមាសទី ១ ចំពេលដែលការរីករាលដាលនៃជំងឺ Covid-19។ នេះបើតាមការព្យាករណ៍របស់សេដ្ឋវិទូ កាលពីថ្ងៃអង្គារ ទី ២២ ខែមេសា ឆ្នាំ២០២០នេះ។
លោក Piao Renjin អ្នកវិភាគប្រចាំក្រុមហ៊ុន NH Investment & Securities នៅទីក្រុងសេអ៊ូល បាននិយាយថា ប្រទេសចិនបានឆ្លើយតបយ៉ាងឆាប់រហ័សចំពោះការរីករាលដាលនៃការគ្របដណ្តប់លើជំងឺ Covid-19 ដោយមានកញ្ចប់ថវិកាជំរុញសេដ្ឋកិច្ចនិងហិរញ្ញវត្ថុនាំឱ្យមានការស្ទុះងើបឡើងវិញយ៉ាងឆាប់រហ័សនៅក្នុងទីផ្សារហិរញ្ញវត្ថុ។
អ្នកវិភាគរូបនេះបាននិយាយថា “រដ្ឋាភិបាលចិនត្រូវបានគេព្យាករណ៍ថា នឹងពង្រីកវិធានការជំរុញសារពើពន្ធនិងរូបិយវត្ថុ ហើយអ្នកអាចមើលឃើញការងើបឡើងវិញនៅក្នុងប្រទេសចិនក្នុងត្រីមាសទី ២” ។
នេះបើយោងតាមទិន្នន័យដែលចេញផ្សាយដោយការិយាល័យស្ថិតិជាតិរបស់ចិនបានឱ្យដឹងថា ផលិតផលក្នុងស្រុកសរុបរបស់ប្រទេសចិនបានធ្លាក់ចុះ ៦,៨ ភាគរយ នៅក្នុងត្រីមាស ខែមករា – មីនា ចំពេលមានការថយចុះសេដ្ឋកិច្ចពីការរាតត្បាតវីរុសនេះ។ ទោះបីជាមានការធ្លាក់ចុះក៏ដោយក៏ប្រទេសចិនត្រូវបានគេរំពឹងថា នឹងក្លាយជាប្រទេសមួយក្នុងចំណោមប្រទេសមានសេដ្ឋកិច្ចធំ ៗ មួយចំនួន ដែលមានកំណើនសេដ្ឋកិច្ចនៅឆ្នាំនេះ។
សេដ្ឋកិច្ចរបស់ប្រទេសចិនត្រូវបានគេព្យាករណ៍ថានឹងកើនឡើង ១,២ ភាគរយនៅឆ្នាំនេះស្របពេលដែលសេដ្ឋកិច្ចសហរដ្ឋអាមេរិកនិងតំបន់អ៉ឺរ៉ុបត្រូវបានគេព្យាករណ៍ថានឹងធ្លាក់ចុះ ៥,៩ ភាគរយនិង ៧,៥ ភាគរយ។
លោក Han Jae-jin អ្នកគ្រប់គ្រងផ្នែកសេដ្ឋកិច្ចរបស់ចិនមានទស្សនវិស័យថា “ការនាំចេញរបស់ចិនភាគច្រើនពឹងផ្អែកលើសហគមន៍អ៊ឺរ៉ុបនិងសហរដ្ឋអាមេរិក។ ការរីកដុះដាលនៃសេដ្ឋកិច្ចរបស់ចិនអាចត្រូវបានគេមើលឃើញ លុះត្រានៅពេលដែលសេដ្ឋកិច្ចរបស់សហភាពអ៊ឺរ៉ុបនិងសហរដ្ឋអាមេរិកងើបឡើងវិញ” ។
រោងចក្រនៅទូទាំងប្រទេសចិនបានឈប់សម្រាកក្នុងត្រីមាសទី ១ ប៉ុន្តែស្ទើរតែ ៩០ ភាគរយបានបន្តប្រតិបត្តិការ។ទោះយ៉ាងណាអតិថិជននៅតែមិនចំណាយប្រាក់ឡើយព្រោះពួកគេនៅមានក្តីបារម្ភអំពីវីរុស ខណៈហាងមួយចំនួនបើកដំណើរការជាបណ្តើរៗ៕
(Xinhua News)
