ក្រសួងមុខងារសាធារណៈ ប្រកាសផ្អាកជ្រើសរើសមន្ត្រីក្របខណ្ឌថ្មីឆ្នាំ២០២០ ជាបណ្តោះអាសន្ន

ដោយ ៖ រ៉ាណេត

ភ្នំពេញ ៖ ដោយហេតុមានផលប៉ះពាល់ពីវិបត្តិនៃជំងឺ Covid-19 ក្រសួងមុខងារសាធារណៈ បានធ្វើការជូនដំណឹងស្ដីពីការផ្អាកជ្រើសរើសមន្ត្រីក្របខណ្ឌថ្មី សម្រាប់ឆ្នាំ២០២០ ឱ្យចូលបម្រើការងារនៅតាមស្ថាប័នរដ្ឋទាំងអស់។

តាមរយៈសេចក្ដីជូនដំណឹងដែលចេញដោយក្រសួងមុខងារសាធារណៈ កាលពីរសៀលថ្ងៃទី២៣ ខែមេសា ឆ្នាំ២០២០ម្សិលមិញនេះបានបញ្ជាក់ថា ក្រសួងមុខងារសាធារណៈ សូមជូនដំណឹងដល់សាធារណៈជនមេត្តាជ្រាបថា អាស្រ័យដោយផលប៉ះពាល់ពីវិបត្តិនៃជំងឺ Covid-19 ការជ្រើសរើក្របខណ្ឌថ្មី សម្រាប់ឆ្នាំ២០២០ ឱ្យចូលបម្រើការងារជាមន្ត្រីរាជការនៅតាមក្រសួង ស្ថាប័ន អង្គភាពនៅថ្នាក់ជាតិ និងថ្នាក់ក្រោមជាតិ ត្រូវបានផ្អាកជាបណ្តោះអាសន្ន រហូតដល់មានការជូនដំណឹងជាថ្មី។

នៅក្នុងសេចក្ដីជូនដំណឹងដដែលនេះបានបញ្ជាក់ថា ក្នុងន័យដូចដែលបានជម្រាបជូនខាងលើនេះ កាលពីពេលកន្លងមក ក្រសួងមុខងារសាធារណៈក៏បានធ្វើនិរាករណ៍លើសេចក្ដីសម្រេចស្ដីពីការជ្រើសរើសមន្ត្រីថ្មីក្នុងឆ្នាំ២០២០នេះផងដែរ។

អាស្រ័យដូចបានជម្រាបជូនខាងលើនេះ ក្រសួងមុខងារសាធារណៈ សូមសាធារណជនមេត្តាយោគយល់ចំពោះការលំបាករួមជាបណ្តោះអាសន្នក្នុងកាលៈទសៈបច្ចុប្បន្ននេះ និងសូមចូលរួមជាមួយរដ្ឋាភិបាល ដើម្បីប្រយុទ្ធប្រឆាំងនឹងជំងឺ Covid-19 សំដៅការពារសុខភាព និងសុខមាលភាពសាធារណៈ រួមចំណែកបន្តរក្សាការពាររឹងមាំនូវសុខសន្ដិភាព ការអភិវឌ្ឍ និងអនាគតរុងរឿងរបស់ប្រទេសជាតិ ៕