ដោយគង់ សូរិយា
ព្រះសីហនុៈ ក្រសួងដែនដី នគរូបនីយកម្ម និងសំណង់បាននិងកំពុងរៀបចំប្លង់គោលប្រើប្រាស់ដី ដើម្បីជំរុញការអភិវឌ្ឈនៅតាមបណ្តាកោះនានា មួយចំនួននៅខេត្តព្រះសីហនុ ពិសេសតំបន់សមុទ្រនៃខេត្តជាប់មាត់សមុទ្រទាំង៤របស់កម្ពុជា។
យោងតាមសេចក្តីប្រកាសព៌តមានរបស់ក្រសួងនេះ ដែលបានចេញផ្សាយក្នុងអង្គសន្និបាតរបស់ខ្លួនកាលពីពេលថ្មីៗនេះបានឲ្យដឹងថា ក្រសួងនឹងជំរុញការរៀបចំជំរុញការអនុម័តប្លង់មេឆ្នេរគំរូអូរត្រេស ក្រុងព្រះសីហនុ ខេត្តព្រះសីហនុ និងប្លង់មេប្រើប្រាស់ដីធ្លីនៅតាមបណ្តាកោះចំនួន៧ទៀត ដូចជា កោះឬស្សី កោះក្របី ខេត្តព្រះសីហនុ។ កោះគី កោះសេះ ខេត្តកំពត កោះទន្សាយ ស្ថិតក្នុងខេត្តកែប និងកោះអំពិលទាំងបីនិងកោះឈ្មោះពុសារកណ្តាល ស្ថិតក្នុងខេត្តកោះកុង។
រដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់បានអនុម័តរួចផងដែរ នូវប្លង់គោលរាជធានី ក្រុងចំនួន៦ នៅកម្ពុជា។
លោកបណ្ឌិតវ៉ាន់ វ៉ាតអ្នកឯកទេសផ្នែកនគរូបនីយកម្ម និងសំណង់បានឲ្យដឹងថា ការរៀបចំប្លង់គោល ប្រើប្រាស់ដីធ្លីមានសារៈសំខាន់ណាស់ ដើម្បីជំរុញការអភិវឌ្ឍប្រកបដោយនិរន្តរភាព និងជំរុញផែនការអភិវឌ្ឍន៍ឲ្យចំទិសដៅ មានសណ្តាប់ធ្នាប់របៀបរៀបរយ និងដើម្បីធ្វើការអភិវឌ្ឍប្រកបដោយនិរន្តរភាព។
លោកបន្តថា “ប្លង់គោលប្រើប្រាស់ដីធ្លី ក៏នឹងរៀបចំឲ្យមានហេដ្ឋារចនាសម្ព័ន្ឋសមស្រប ដើម្បីធ្វើយ៉ាងណាឲ្យការអភិវឌ្ឍន៍នៅតំបន់នោះ មានភាពបៃតង ប្រកបដោយសុខ ពិសេសសំដៅលើកកំពស់សុខមាលភាព និងសេដ្ឋកិច្ចសង្គមបានល្អប្រសើរ”៕
