រោងភាពយន្តលំដាប់អន្តរជាតិនឹងបង្ហាញខ្លួននៅក្នុងផ្សារទំនើប FURI Times Square ក្រុងព្រះសីហនុ ឆាប់ៗនេះ

ដោយ ៖ រ៉ាណេត

ព្រះសីហនុ ៖ ជាបទពិសោធន៍ថ្មីនៃការផ្តល់ជូននូវអារម្មណ៍រីករាយ សប្បាយ សប្បាយ ជាមួយការទស្សនាខ្សែភាពយន្តល្បីៗលំដាប់អន្តរជាតិនៅក្នុងរោងភាពយន្តដ៏ទំនើប និងលើកដំបូងនៅក្រុងព្រះសីហនុ តាមរយៈផ្សារទំនើប FURI Times Square ដែលនឹងចាប់ដំណើរការក្នុងពេលឆាប់ៗខាងមុខនេះ។

ជាមួយនឹងដំណើរការយ៉ាងរលូនក្រោមកិច្ចគាំទ្រពីសំណាក់អតិថិជនជាតិ និងអន្តរជាតិ ក៏ដូចជាបណ្តាភ្ញៀវទេសចរផងដែរនោះ ផ្សារទំនើប FURI Times Square បាននាំមកជូននូវបទពិសោធន៍ថ្មីនៃការរស់នៅបែបទាន់សម័យ និងស៊ីវិល័យ ក្រោមការកៀងគរនូវរាល់បណ្តាផលិតផល សម្ភារៈប្រើប្រាស់ និងការផ្គត់ផ្គង់ចំណីអាហារយ៉ាងសម្បូរបែប ដែលប្រាកដថាមានគុណភាព និងសុវត្ថិភាពខ្ពស់ជាងគេនៅក្នុងក្រុងព្រះសីហនុ។

បន្ថែមពីនេះ ដើម្បីបង្កើនភាពទាក់ទាញ និងបង្កើនសេវាទេសចរណ៍នៅក្នុងតំបន់ឱ្យកាន់តែមានភាពទាក់ទាញ នៅក្នុងពេលឆាប់ៗខាងមុខនេះ ផ្សារទំនើប FURI Times Square នឹងនាំមកជូនលោកអ្នក ក៏ដូចជាអតិជនទូទៅជាមួយនឹងវត្តមានថ្មីនៃរោងភាពយន្តបែបទំនើបនាសម័យចុងក្រោយ ដែលស្ថិតនៅជាន់ទី៤នៃផ្សារទំនើបមួយនេះតែម្ដង។

បុគ្គលិកផ្នែកទីផ្សារ និងការលក់ជាន់ខ្ពស់ប្រចាំនៅផ្សារទំនើប FURI Times Square កញ្ញា ប៉ែន ម៉ារ៉ា បានប្រាប់ឱ្យដឹងកាលពីរសៀលថ្ងៃទី១៤ ខែឧសភា ឆ្នាំ២០២០នេះថា គម្រោងដំណើរការរោងភាពយន្តទំនើបនៅក្នុងផ្សារ FURI Times Square ត្រូវបានគណៈគ្រប់គ្រងកំណត់ពេលវេលារួចហើយ ដោយពេលនេះកំពុងតែយកចិត្តទុកដាក់ទៅលើការរៀបចំផ្នែកខាងក្នុងបន្ថែម និងបំពាក់បណ្តាញអគ្គិសនី រួមនឹងប្រព័ន្ធការពារសុវត្ថិភាព។

កញ្ញាបានបញ្ជាក់ថា “តាមគម្រោង រោងភាពយន្តមួយនេះនឹងដាក់ដំណើរការក្នុងពេលឆាប់ៗនេះ ដោយការនាំមកជូននូវផ្ទាំងទស្សនីយភាពដ៏អស្ចារ្យជាមួយការប្រើប្រាស់បច្ចេកវិទ្យាបែបទំនើប ជាពិសេសគ្រប់ខ្សែភាពយន្តទាំងអស់សុទ្ធតែជាប់ចំណាត់ថ្នាក់កំពូល និងល្បីល្បាញលំដាប់អន្តរជាតិ ជាប្រភេទ 2D និងប្រភេទ 3D ផ្តល់រូបភាពកាន់តែច្បាស់ ត្រជាក់ភ្នែក ហាក់បីដូចជាស្ថិតនៅក្នុងពិភពពិតនៃសាច់រឿងយ៉ាងដូច្នោះ”។

បច្ចុប្បន្ន ផ្សារទំនើប FURI Times Square កំពុងមានការចាប់អារម្មណ៍ពីសំណាក់មជ្ឈដ្ឋានទូទៅនៅក្នុងក្រុងព្រះសីហនុ ក៏ដូចជាបណ្តាភ្ញៀវទេសចរយ៉ាងខ្លាំង។ នៅក្នុងនោះ តាមរយៈផ្សារទំនើប FURI Times Square បានផ្តល់ជូននូវបទពិសោធន៍នៃរស់នៅបែបទាន់សម័យ ជាមួយនឹងការប្រមូលផ្តុំនូវក្រុមហ៊ុន និងហាងលក់ទំនិញ សម្ភារៈប្រើប្រាស់ និងចំណីអាហារច្រើនជាង៣០ ហើយនឹងបន្តបង្កើនកំណើននៃចំនួនហាងទំនើបបន្ថែមទៀត។

ក្រុមហ៊ុនដែលកំពុងប្រតិបត្តិការ និងទទួលបានការគាំទ្រច្រើនពីអិតិថិជន រួមមានដូចជាក្រុមហ៊ុន KFC , ក្រុមហ៊ុន Starbucks , ក្រុមហ៊ុន Amazone Café ,ក្រុមហ៊ុន KOI , ក្រុមហ៊ុន Dakasi Tea , ហាងអាហារមកពីសាំងហ្គាពួរ ក្រុមហ៊ុនលក់សម្លៀកបំពាក់ LEVI’s , ក្រុមហ៊ុន NIKE ក្រុមហ៊ុន Samsonite , ក្រុមហ៊ុននាឡិកាដ៏ល្បីឈ្មោះ G-Shock ក្រុមហ៊ុនលក់រថយន្ត HGB Group ក្រុមហ៊ុនសេវាទូរស័ព្ទចល័ត Smart ក្រុមហ៊ុន Park Café ក្រុមហ៊ុនដ៏ល្បីរបស់ចិន Hauwei ក្រុមហ៊ុន BURGER KING ក្រុមហ៊ុន ARROW រួមជាមួយក្រុមហ៊ុនល្បីៗជាច្រើនទៀត ដោយរាប់បញ្ចូលទាំងគ្រឿងសំអាងផងដែរ៕