ដោយវុត្ថា
ភ្នំពេញ៖ រដ្ឋាភិបាលប្រទេសអូស្ត្រាលីតាមរយ:មជ្ឈមណ្ឌលសន្តិសុខសុខភាពនៃតំបន់ឥណ្ឌូប៉ាស៊ីភិចរបស់ខ្លួនបានប្រកាសផ្តល់នូវជំនួយឥតសំណងថ្មីចំនួនពីរ ដែលមានទឹកប្រាក់ប្រមាណ ជាង ៦ លានដុល្លារអូស្ត្រាលី ជួយដល់ប្រទេសកម្ពុជាក្នុងការប្រយុទ្ធប្រឆាំងជំងឺកូវីដ១៩។
ស្ថានទូតអូស្ត្រាលីប្រចាំកម្ពុជាបានអោយដឹងនៅថ្ងៃទី១៥ ឧសភា ២០២០ម្សិលមិញនេះថា ជំនួយឥតសំណងទាំងនេះ រួមមានជំនួយទីមួយដែលមានទឹកប្រាក់ចនួន ០២ លានដុល្លាអូស្រ្តាលី តាមរយះ អង្គការភី អេស អាយ (Population Services International) ដើម្បីគាំទ្រប្រតិបត្តិការភាពអាសន្នសុខភាពសាធារណ:នៅកម្ពុជា ក្នុងនោះរួមមានជំងឺកូវី១៩។
ជំនួយទីពីរដែលមានទឹកប្រាក់ចំនួន ៤ ៤០០០០០ (បួនលានបួនសែន)ដុល្លាអូស្ត្រាលីតាមរយះ Mérieux Foundation ដើម្បីពង្រឹងមន្ទីពិសោធន៍វិភាគវត្ថុសំណាកមនុស្ស និងសត្វ នៅប្រទេសកម្ពុជា ទ្បាវ និងមីយ៉ាន់ម៉ា។
ប្រទេសអូស្ត្រាលីបានបង្កើតមជ្ឈមណ្ឌលសន្តិសុខសុខភាពនៃតំបន់ឥណ្ឌូប៉ាស៊ីភិចនេះនាឆ្នាំ២០១៧ដើម្បីបន្តការបង្ការនិងទប់ស្កាត់ជំងឺឆ្លងផ្សេងៗ ដូចជាជំងឺកូវីដ១៩ ។ជាមួយគ្នានេះ សូមបន្តតាមដានបច្ចុប្បន្នភាពអំពីរបៀបដែលប្រជាជនអូស្ត្រាលីនឹងប្រជាជនកម្ពុជាកំពុងធ្វើការជាមួយគ្នាក្នុងការប្រយុទ្ធប្រឆាំងនឹងជំងឺកូវីត១៩នៅក្នងតំបន់របស់យើង ៕
