ដោយ ប៊ី
ភ្នំពេញៈ ប្រធាន និងនាយកប្រតិបត្តិក្រុមហ៊ុនANA Holdings លោក Shinya Katanozaka បានព្យាយាមធានាដល់ម្ចាស់ភាគហ៊ុន ក្នុងអំឡុងពេលកិច្ចប្រជុំភាគទុនិកប្រចាំឆ្នាំរបស់ក្រុមហ៊ុនកាលពីថ្ងៃចន្ទនេះ ដោយនិយាយថា ក្រុមហ៊ុនអាកាសចរណ៍ជប៉ុនមិនមានបញ្ហាអ្វីទាក់ទង នឹងស្ថានភាពហិរញ្ញវត្ថុសម្រាប់ពេលនេះទេ។
ក្រុមហ៊ុននេបានត្រៀមថវិកាសរុបចំនួន១ទ្រីលានយ៉េន (៩,៣៤ ពាន់លានដុល្លារ) ក្នុងប្រាក់កម្ចី និងបណ្តាញឥណទាន។
ក្រុមហ៊ុនANA ដែលជាក្រុមហ៊ុនមេរបស់ក្រុមហ៊ុនអាកាសចរណ៍ All Nippon Airways ដែលជាក្រុមហ៊ុនអាកាសចរណ៍ធំជាងគេរបស់ជប៉ុន បានមើលឃើញពីការធ្លាក់ចុះគួរឱ្យកត់សម្គាល់ នៅពេលដែលជំងឺរាតត្បាតឆ្លងរាល បានដាលយ៉ាងខ្លាំងបានបិទព្រំដែនអន្តរជាតិ ដែលធ្វើឱ្យឧស្សាហកម្មនេះជាប់គាំងនៅទូទាំងពិភពលោក។
លោក Katanozaka បាននិយាយថា ក្រុមហ៊ុនបានប្រមូលថវិកាចំនួន៥៣៥ពាន់លានយ៉េនក្នុងរយៈពេល៣ខែ គិតត្រឹមខែមិថុនា ហើយក៏បានសង្កត់ធ្ងន់ផងដែរថា ខ្លួនទទួលបានទឹកប្រាក់៥០០ពាន់លានយ៉េនក្នុងបណ្តាញឥណទាន។
ទោះបីមានការលើកឡើងរបស់នាយកប្រតិបត្តិ ដើម្បីលួងលោមម្ចាស់ភាគហ៊ុនក៏ដោយ ក៏ពួកគេមានសំណួរជាច្រើនអំពីលំហូរសាច់ប្រាក់របស់ក្រុមហ៊ុន ANA ។
ម្ចាស់ភាគហ៊ុនម្នាក់បានសួរថា តើផែនការហិរញ្ញប្បទានរយៈពេលវែងកំពុងត្រូវបានពិចារណាយ៉ាងដូចម្តេច?។ ប្រធានផ្នែកហិរញ្ញវត្ថុរបស់ក្រុមហ៊ុនលោក Ichiro Fukuzawa បានឆ្លើយតបថា “ដំបូងយើងនឹងប្រឹងប្រែងឱ្យអស់ពីសមត្ថភាព ដើម្បីគ្រប់គ្រងលំហូរសាច់ប្រាក់របស់យើង។ លោកបន្ថែមទៀតថា “បន្ទាប់ពីការខិតខំប្រឹងប្រែងរបស់យើងផ្ទាល់ យើងចង់ពិគ្រោះជាមួយស្ថាប័នហិរញ្ញវត្ថុ អំពីរបៀបដើម្បីធានាឱ្យមានហិរញ្ញប្បទានរលូន”។
ម្ចាស់ភាគហ៊ុនម្នាក់អាយុ៥៥ឆ្នាំ ដែលបានចូលរួមក្នុងកិច្ចប្រជុំនេះ បានប្រាប់សារព៌តមានNikkeiថា “ខ្ញុំគិតថាការគ្រប់គ្រងកំពុងព្យាយាមអស់ពីសមត្ថភាព ប៉ុន្តែខ្ញុំមានការព្រួយបារម្ភអំពីហិរញ្ញវត្ថុរបស់ក្រុមហ៊ុន ព្រោះវាមិនទាន់ច្បាស់ថាតើជំងឺឆ្លងនឹងត្រូវបញ្ចប់នៅពេលណា”។
ការប្រជុំនេះមានរយៈពេលប្រហែល៩០នាទី។ ម្ចាស់ភាគហ៊ុនសរុបចំនួន ៥៨៥ នាក់បានចូលរួម ដែលជាការធ្លាក់ចុះយ៉ាងខ្លាំង ដែលពីឆ្នាំមុនដល់ឆ្នាំអ្នករួមមានចំនួន ១,៩៧២ ប៉ុន្តែក្រុមហ៊ុនANA បានលើកទឹកចិត្តឱ្យមានអ្នកចូលរួមចំនួនទាប ដោយសារជំងឺរាតត្បាត។ ម្ចាស់ភាគហ៊ុន ដែលបានចូលរួមត្រូវបានស្នើសុំឱ្យមានការត្រួតពិនិត្យសីតុណ្ហភាពនៅច្រកចូល។
សំណើពីរ ដែលមួយសម្រាប់ជ្រើសរើសក្រុមប្រឹក្សាភិបាល និងមួយទៀតលើការជ្រើសរើសសមាជិកសវនកម្មសាជីវកម្ម ត្រូវបានអនុម័តក្នុងអំឡុងពេលព្រឹត្តិការណ៍នេះ។
កាលពីពេលថ្មីៗនេះ សមាគមធុរកិច្ចជប៉ុននៅកម្ពុជា និងសភាពាណិជ្ជកម្មក្ពុជាគ្រោងចុះញ្ញាតិរួមគ្នា ដើម្បីស្នើសុំឱ្យក្រុមហ៊ុនអាកាសចរណ៍ANA របស់ជប៉ុន បន្តប្រតិបត្តិការនៃជើងហោះហើរត្រង់មកកាន់កម្ពុជា ដែលនឹងផ្ដល់អត្ថប្រយោជន៍យ៉ាងខ្លាំង ដល់វិស័យទេសចរណ៍ វប្បធម៌ និងធុរកិច្ចរវាងប្រទេសកម្ពុជា-ជប៉ុន។
គម្រោងស្នើសុំនេះ ត្រូវបានធ្វើឡើងនៅក្នុងជំនួបពិភាក្សាការងាររវាង អ្នកឧកញ៉ា គិត ម៉េងប្រធានសភាពាណិជ្ជកម្មកម្ពុជា និងលោកកាន់ដា យូហ្គោ ប្រធានសមាគមធុរកិច្ចជប៉ុននៅកម្ពុជា និងក្រុមការងារ នាថ្ងៃទី២៦ ខែមិថុនា ឆ្នាំ ២០២០នេះ។
សមាគមធុរកិច្ចជប៉ុននៅកម្ពុជាកាលពីពេលថ្មីៗនេះ បានចេញសេចក្តីអំពាវនាវ និងសំណូមពរសុំការគាំទ្រ ពីសំណាក់សមាជិករបស់ខ្លួននៅកម្ពុជា ស្នើដល់ក្រុមហ៊ុនអាកាសចរណ៍ជប៉ុន ANA បន្តធ្វើការហោះហើរត្រង់រវាងភ្នំពេញ-ណារីតាឡើងវិញ មុនពេលកំណត់ បន្ទាប់ពីក្រុមហ៊ុនមួយនេះបានប្រកាសផ្អាកដំណើរការ រហូតដល់ដំណាច់ខែកក្កដា ឆ្នាំ២០២០ខាងមុខនេះ៕
