ដោយវុត្ថា
ភ្នំពេញៈ រដ្ឋាភិបាលកម្ពុជាបាន និងកំពុងត្រៀមបើកកិច្ចចរចាពាណិជ្ជកម្មសេរីជាមួយបណ្តាប្រទេសមួយចំនួន៩បន្ថែមទៀត នៅលើពិភពលោក ដើម្បីជំរុញការបើកចំហរទីផ្សាររបស់កម្ពុជា ឱ្យបានកាន់តែទំលំទូលាយ។
លោកសុខ សុភ័ក្រ្ដ រដ្ឋលេខាធិការក្រសួងពាណិជ្ជកម្ម នៅក្នុងសន្និសីទសារព័ត៌មានស្តីពី «លទ្ធផលបញ្ចប់នៃកិច្ចចរចាបង្កើតកិច្ចព្រមព្រៀងពាណិជ្ជកម្មសេរីកម្ពុជា ចិន FTA»នៅថ្ងៃទី ២៨ ខែកក្កដាឆ្នាំ ២០២០នេះឱ្យដឹងថា កម្ពុជាមិនមែនគ្រាន់តែមានមហិច្ឆតា ចរចាពាណិជ្ជកម្មសេរីជាមួយប្រទេសកូរ៉េនោះទេ ពោលគឺកម្ពុជានឹងបើកកិច្ចចរចារជាមួយកូរ៉េខាងត្បូង ជប៉ុន ឥណ្ឌា អូស្រ្តលី ញូវហ្សេលែន អាមេរិក កាណាដារ និងអង់គ្លេស។
លោកបន្តថា “នេះជាមហិច្ចតារបស់កម្ពុជា ដែលដាក់ចេញគោលនយោបាយក្នុងការបើកកិច្ចចរចារ តែសម្រាប់ប្រទេសកូរ៉េ បានប្រកាសបើកកិច្ចចរចារួចហើយ កាលពីកន្លងមកនេះ”។ លោកបន្តថា “តាមផែនការនឹងកិច្ចចរចាជាមួយកូរ៉េ នឹងបញ្ចប់ផ្នែកសំខាន់ៗនៅចុងឆ្នាំនេះ ហើយបន្តការសិក្សាលើការចចាជាមួយប្រទេសមួយចំនួន”។
លោកបន្តថា ការចរចាកិច្ចព្រៀមពាណិជ្ជកម្មសេរីនេះ ដោយសារតែរដ្ឋាភិបាលមើលឃើញពីផលប្រយោជន៍រៀងៗខ្លួន យើងនាំទៅគាត់(ប្រទេស) ទទួលបានផលចំណេញ ហើយគាត់មកវិនិយោគ ឬការនាំចេញមលកាន់កម្ពុជាយើង(កម្ពុជា) ក៏មានផលចំណេញ ពោលគឺបំពេញចន្លោះឱ្យគ្នាទៅវិញទៅមក នៅក្នុងចំណុចខ្វះខាតណាមួយ។
លោកសុខ សុភ័ក្រ្តបានបន្ថែមទៀត សម្រាប់ប្រទេសកម្ពុជាបាននឹងកំពុងសិក្សាជាមួយប្រទេសឥណ្ឌា បើផលចំណេញច្រើនដល់ប្រទេស និងប្រជាជនយើងនឹងអាចនឹងចាប់ផ្តើមបើកកិច្ចចរចានៅក្នុងឆ្នាំក្រោយ បន្ទាប់មកទៀត អាចជប៉ុន អាមេរិក អង់គ្លេស និងប្រទេសផ្សេងទៀត ជាបន្តបន្ទាប់ទៀត។
បើតាម មន្ត្រីជាន់ខ្ពស់នៃក្រសួងពាណិជ្ជកម្មរូបនេះ ការចរចារពាណិជ្ជកម្មសេរីជាមួយប្រទេសចិន ក៏ដូចជាបណ្តាប្រទេសមួយចំនួនទៀត ត្រូវពឹងផ្អែកតាមបទប្បញ្ញត្តិរបស់អង្គការពាណិជ្ជកម្មពិភពលោក (WTO) ។ ម្យ៉ាងទៀត ការចរចានេះ ធ្វើឡើងលើទម្រង់ និងវិធីសាស្ត្រ បើកច្រកទីផ្សារ ការធ្វើសេរីភាវូបនីយកម្មសេវា ការកំណត់លក្ខខណ្ឌ និងសម្រួលនិតិវិធីសម្រាប់ពាណិជ្ជកម្ម ការកំណត់វិធានដើមកំណើតទំនិញ ការជំរុញនិងសម្រួលវិនិយោគ កិច្ចសម្រួលពាណិជ្ជកម្ម សម្រួលដល់និតិវិធីអនាម័យ កម្រិតរបាំងបច្ចេកទេសលើការធ្វើពាណិជ្ជកម្ម កិច្ចសហប្រតិបត្តិការ និងការដោះស្រាយវិវាទ ត្រូវបានលើកយកមកពិភាក្សា និងកំណត់នៅក្នុងអត្ថបទនៃកិច្ចព្រមព្រៀងពាណិជ្ជកម្មសេរី៕
