ដោយគង់ សូរិយា
ភ្នំពេញៈ លោកអភិបាលរាជធានីភ្នំពេញ លោកឃួង ស្រេងបាន ណែនាំដល់មន្ទីរជំនាញ ត្រូវលុបបំបាត់កន្លែងលក់ហ្គាសបែបអាណាធិបតេយ្យ ឱ្យអស់ពីក្នុងភូមិសាស្រ្តរាជធានីភ្នំពេញ ដើម្បីកាត់បន្ថយហានិភ័យគ្រោះថ្នាក់ដល់ប្រជាពលរដ្ឋ។
អភិបាលរាជធានីបញ្ជាឲ្យអាជ្ញាធរលុបបំបាត់កន្លែងលក់ហ្គាសអាណាធិបតេយ្យ
លោកបានថ្លែងក្នុងកិច្ចប្រជុំក្រុមប្រឹក្សារាជធានី នាព្រឹកថ្ងៃទី៦ សីហានេះ ដោយបានជំរុញឲ្យ មន្ទីរជំនាញពាក់ព័ន្ធត្រូវសហការគ្នា ជាមួយនឹងអាជ្ញាធរខណ្ឌទំាង១៤ ដើម្បីចុះត្រួតពិនិត្យកន្លែងលក់ហ្គាសនានា ស្វែងយល់ពីទិដ្ឋភាពច្បាប់ សម្ភារៈបច្ចេកទេសស្តង់ដារ និងឧបករណ៍ការពារ ដើម្បីធានាថាអាជីវកម្មនេះគ្មានផលរំខានឬបង្កគ្រោះថ្នាក់ដល់ប្រជាពលរដ្ឋ និងបរិស្ថាន។
កាលពីខែកក្ដដាកន្លងទៅនេះ មានករណីផ្ទុះឆេះធុងហ្គ្រាស នៅផ្ទះលក់ហ្គ្រាសមួយកន្លែងក្នុងខណ្ឌដូនពេញ ដែលបានបណ្ដាលឱ្យស្លាប់មនុស្ស៤នាក់ និងរងរបួសធ្ងន់និងស្រាល៥នាក់ ដោយសារការលក់ហ្គ្រាសគ្មានបច្ចេសទេស។
លោកឃួងស្រេងបានបន្តថាបច្ចុប្បន្ននេះនៅរាជធានីភ្នំពេញមានកន្លែងលក់ ហ្គាសនិងបញ្ជូលហ្គាសជាច្រើន ហើយកន្លែងខ្លះគ្មានស្តង់ដារបច្ចេកទេស បើប្រាស់ធុង ហ្គាសចាស់ៗគ្មានគុណភាព ឬធុងស្តើង ដែលងាយបង្កហានិភ័យគ្រោះថ្នាក់ទំាងអ្នកបញ្ជូលនិងអ្នកប្រើប្រាស់។
លោកអភិបាលរាជធានីភ្នំពេញក៏បានអំពាវនាវដល់ក្រុមអាជីវករលក់ហ្គាសទំាងអស់ត្រូវបញ្ឈប់ការទិញធុងហ្គាសចាស់ៗពីប្រទេសដទៃហើយយកមកបាញ់ថ្នំាដើម្បីប្រើប្រាស់បន្តដែលនេះគឺជាហានិភ័យគ្រោះថ្នាក់ខ្ពស់អាចបង្កឱ្យផ្ទុះធុងហ្គាសនិងអគ្គិភ័យឆាប់ឆេះផ្ទះសម្បែងជាដើម។
លោកឃួង ស្រេងបានបញ្ជាក់ទៀតថា នៅរាជធានីភ្នំពេញសព្វថ្ងៃនេះ កន្លែងលក់ហ្គាសពុំមែនតែកន្លែងលក់ហ្គាសទេ គឺមានទំាងផលិតហ្គាសថែមទៀត ព្រោះពេលចុះទៅកន្លែងផ្ទុះហ្គាសគឺឃើញថ្មស្អុយដែលជា សារធាតុ ផលិតហ្គាស។ កិច្ចការងារនេះគឺជាសន្តិសុខសុវត្ថិភាពប្រជាពលរដ្ឋនៅមូលដ្ឋាន ហើយបើកាលណាបង្ក ឱ្យមានកន្លែងលក់ហ្គាសអានាធិបតេយ្យកាន់តែច្រើន ហានិភ័យកាន់តែខ្ពស់ចំពោះយើង ហើយយើង ពិបាកឡានដែលរត់ទៅសង្គ្រោះ ក៏មានការចង្អៀតដោយសារបញ្ហាចរាចរណ៍ ដែលចំណុចនេះត្រូវតែយក ចិត្តទុកដាក់អោយបានខ្ពស់៕
