ដោយវុត្ថា
ភ្នំពេញៈ ធនាគារអភិវឌ្ឍន៍ហុល្លង់ (FMO) គ្រោងនឹងទំលាក់មូលនិធិលើកទី២ប្រមាណ១,៤ ដុល្លារអាមេរិកបន្ថែមទៀត នៅក្នុងកម្ពុជានិងប្រទេសពីរផ្សេងទៀតក្នុងតំបន់សម្រាប់គម្រោង Emerging Markets Investment Advisers ក្នុងចលនាដើម្បីពង្រីកផលប័ត្ររបស់ខ្លួន នៅចំពោះមុខក្នុងក្របខ័ណ្ឌដំណាក់កាលទី៤ ។
តាមការចុះផ្សាយរបស់សារព័ត៌មាន NIKEI បានឱ្យដឹងថា ធនាគារ FMO រំពឹងថា ការដំឡើងមូលនិធិនេះ នឹងជួយដល់ការស្រងស្រងដើមទុននាពេលខាងមុខ លើប្រតិបត្តិការការងារនៅក្នុងអំឡុងពេលមានវិបត្តិសេដ្ឋកិច្ចសកល។
ប្រភពពីធនាគារ FMO ឱ្យដឹងថា ដើមទុននេះត្រូវបានគេរំពឹងថា នឹងគាំទ្រដល់ក្រុមហ៊ុនផលប័ត្រចំនួន១៣ របស់នៅក្នុងបណ្តាប្រទសសមាជិក CLMDFII ក្នុងអំឡុងពេល និងក្រោយពេលមានវិបត្តិសេដ្ឋកិច្ច។ ធនាគារ FMO បានបន្ថែមថា “ការកើនឡើងនូវការ ប្តេជ្ញាចិត្តនឹងជួយឱ្យមូលនិធិ សម្រេចនូវគោលបំណងបង្កើតតម្លៃ និងគាំទ្រដល់វិនិយោគិន ក្នុងការសម្រេចគោលដៅកំណើនដំបូងរបស់ខ្លួន។
កន្លងមក FMO បានសន្យាផ្តល់ប្រាក់១០០លានដុល្លារ ដល់ការបិទទ្វារលើកដំបូងដល់ CLMDF II នៅឆ្នាំ២០១៥ ។ មូលនិធិនេះបានបិទនៅត្រឹម ៦៤.៥ លានដុល្លារជាមួយនឹងការវិនិយោគនៅក្នុងក្រុមហ៊ុនចំនួន ១៣ ដែលភាគច្រើននៅកម្ពុជា។ ក្រុមហ៊ុនចំនួន ៤ នៅប្រទេសមីយ៉ាន់ម៉ា និង៣ក្រុមហ៊ុននៅប្រទេសឡាវក៏បានទទួលថវិកាផងដែរ។
លោក Joshua Morris នាយកប្រតិបត្តិគម្រោង Emerging Markets Investment Advisers បានឱ្យដឹងថា គម្រោងនេះនឹងគ្របដណ្តប់លើទំហំវិនិយោគ យ៉ាងទូលំទូលាយនៅក្នុងមូលនិធិថ្មី ខណៈពេលដែលយើងទុកប្រាក់បម្រុងបន្ត ដើម្បីគាំទ្រកំណើនបន្ទាប់ពីការវិនិយោគដំបូងរបស់យើង។
លោកបន្តថា ដៃគូមានកំណត់នៅក្នុងមូលនិធិរបស់ EMIA ក៏រួមបញ្ចូលផងដែរនូវសាជីវកម្មហិរញ្ញវត្ថុអន្តរជាតិ និងស្ថាប័នអភិវឌ្ឍន៍អឺរ៉ុបផ្សេងទៀតដូចជា Norfund, Finnfund និងមូលនិធិវិនិយោគរបស់ប្រទេសស្វីស។
នាយកប្រតិបត្តិរូបនេះ បានឱ្យដឹងទៀតថាមូលនិធិដំបូង១៩,៦៥លានដុល្លាររបស់ EMIA ត្រូវបានវិនិយោគតែនៅក្នុងប្រទេសកម្ពុជា និងឡាវប៉ុណ្ណោះ ប៉ុន្តែក្រោយមកបានបោះទុនវិនិយោគពីប្រទេសទាំងពីរទៀត៕
