ដោយគង់ សូរិយា
ភ្នំពេញៈ រដ្ឋបាលខេត្តសៀមរាប សហការជាមួយសហភាពសហព័ន្ធយុវជនកម្ពុជាខេត្ត បានរៀបចំពិធីប្រកួតមាន់អាំងឆ្ងាញ់ តាមបណ្តាក្រុង–ស្រុកទាំង១២ ដើមី្បបង្ហាញជូនដល់ភ្ញៀវជាតិ អន្តរជាតិ ដែលមកទស្សនានិងកម្សាន្តកម្មវិធីសម្រាកសៀមរាប។
រដ្ឋបាលខេត្តសៀមរាបរៀបចំពិធីប្រកួតមាន់អាំងឆ្ងាញ់ តាមបណ្តាក្រុង-ស្រុកទាំង១២របស់ខេត្ត
ពិធីប្រកួតមាន់អាំងឆ្ងាញ់ អញ្ជើញចូលរួមជាអធិបតីភាពសម្តេចពិជ័យ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តសៀមរាប។
លោកភឿន គឹមលី ប្រធានមន្ទីរពាណិជ្ជកម្មខេត្ត បានឲ្យដឹងអំពីលក្ខខ័ណ្ឌនៃការប្រកួតមាន់អាំងនេះ ដោយមានរៀបចំគណៈកម្មការត្រួតពិនិត្យ ដាក់ពិន្ទុ និងភ្លក់រស់ជាតិផងដែរ។ នៅក្នុងលក្ខខ័ណ្ឌប្រកួតនោះ បានផ្តោតទៅលើសោភណ្ឌភាព អនាម័យ របៀបផ្សំគ្រឿង ប្រភពនៃមាន់ (មាន់ស្រែ ឬ កសិកម្ម ) និងរសជាតិទៀតផង។
លោកបានបន្តថា “កម្មវិធីសម្រាកសៀមរាបនាពេលនេះ ជាការផ្តល់ឱកាសក្នុងការលើកកម្ពស់ និងជម្រុញនូវផលិតផលក្នុងស្រុក ក៏ដូចជាការជម្រុញលើកកំពស់ជីវភាពរស់នៅរបស់ប្រជាពលរដ្ឋនៅក្នុងខេត្តសៀមរាប”។
កម្មវិធីប្រកួតពានរង្វាន់មាន់អាំងឆ្ងាញ់ជាងគេនៅក្នុងខេត្តសៀមរាបដែលរៀបចំឡើងដោយសមាគមចុងភៅកម្ពុជាខេត្តសៀមរាបដោយមានការអញ្ជើញចូលរួមប្រកួតយ៉ាងច្រើនកុះករពីសំណាក់បងប្អូនប្រជាពលរដ្ឋក៏ដូចជាចុងភៅចំណានៗជាច្រើនរូបផងដែរ។
ការរៀបចំកម្មវិធីប្រកួតពានរង្វាន់មាន់អាំងឆ្ងាញ់ ជាងគេខេត្តសៀមរាបនាពេលនេះ រៀបចំឡើងក្នុងគោលបំណង បង្ហាញនូវស្នាដៃ នៃការអាំងមាន់ របស់ចុងភៅគ្រប់តំបន់ ក៏ដូចជារូបមន្តពិសេសខុសៗគ្នាជាច្រើនទៀត ព្រមទាំងបានដាក់តាំងបង្ហាញ សម្រាប់ឲ្យបងប្អូនប្រជាពលរដ្ឋខ្មែរគ្រប់ស្រទាប់វណ្ណៈ បានចូលរួមទស្សនា និង ភ្លក់នូវរស់ជាតិដ៏ឈ្ងុញឆ្ងាញ់ពិសា នូវមាន់អាំងពីគ្រប់តំបន់ក្នុងខេត្តសៀមរាប។
គណៈកម្មការត្រួតពិនិត្យ និង ធ្វើការដាក់ពិន្ទុ ដល់បងប្អូនជាបេក្ខជនមានអាជីពអ្នកអាំងមាន់លក់ មកពីបណ្តាក្រុង ស្រុកទាំង១២ លទ្ធផលនៃការប្រកួតមាន់អាំងឆ្ងាញ់នៅខេត្តសៀមរាប ជ័យលាភីលេខ១ បានទៅស្រុកបន្ទាយស្រី ,ជ័យលាភីលេខ២ បានទៅស្រុកសូទ្រនិគម និង ជ័យលាភីលេខ៣ បានទៅក្រុងសៀមរាប៕
