ដោយវុត្ថា
ភ្នំពេញៈ ក្រុមហ៊ុន Grant Thornton International Ltd ដែលមានមូលដ្ឋាននៅក្នុងចក្រភពអង់គ្លេស បានប្រកាសដាក់ឱ្យដំណើរការសេវាកម្ម លក់រាយរបស់របស់ខ្លួន ដែលមានឈ្មោះថា “Retail: Navigating the Impact of Covid-19” ក្នុងការជួយក្រុមហ៊ុននានាដែលមានបំណងផ្លាស់ប្តូរ ទីតាំងមកកាន់ប្រទេសកម្ពុជា និងប្រទេសមួយចំនួននៅក្នុងតំបន់អាស៊ាន។
លោកស្រី Marivic Espano ប្រធានក្រុមប្រឹក្សាភិបាល និងជាអគ្គនាយិកាក្រុមហ៊ុន P&A Grant Thornton បានឱ្យដឹងនៅថ្ងៃទី១ ខែកញ្ញា ឆ្នាំ ២០២០កន្លងមកថា មូលហេតុដែលក្រុមហ៊ុនពង្រីកសេវាកម្ម កម្មវិធីមកកាន់កម្ពុជា និងប្រទេសមួយចំនួននៅក្នុងតំបន់អាស៊ាននាពេលនេះ ឆ្លើយតបទៅនឹងតម្រូវការទីផ្សារកើនឡើងក្នុងតំបន់អាស៊ាន។
លោកស្រីបន្តថា “ក្រុមហ៊ុនផ្លាស់ប្តូរប្រតិបត្តិការសេវារបស់ខ្លួនមកកាន់កម្ពុជា និងតំបន់អាស៊ានាពេលនេះ បន្ទាប់ពីមានការរីករាលដាលនៃជំងឺកូវីដ១៩ និងភាពតានតឹងពាណិជ្ជកម្មរវាងសហរដ្ឋអាមេរិក និងចិន” ។
លោកស្រីបន្តថា សេវាកម្មនេះ ផ្តោតលើសហគ្រាសធុនមធ្យម និងសហគ្រាសធុនធំ ដែលកំពុងសម្លឹងមើលការពង្រីកទូតាំង ឬធ្វើពិពិធកម្មអាជីវកម្មរបស់ពួកគេមកកាន់តំបន់ តាមរយៈសមាជិក ក្រុមហ៊ុន Grant Thornton នៅក្នុងប្រទេសអាស៊ានចំនួន៧ រួមមានម៉ាឡេស៊ី ឥណ្ឌូនេស៊ី ហ្វីលីពីន សិង្ហបុរី ថៃ វៀតណាម និងកម្ពុជា។
លោកស្រីបន្ថែមថា ក្រុមហ៊ុន Grant Thornton International Ltd អាចផ្តល់ឱ្យសហគ្រាសធុនមធ្យម ដល់សហគ្រាសធុនធំនូវទស្សនវិស័យអាជីវកម្ម និងទស្សនវិស័យយុទ្ធសាស្ត្រ វាយតម្លៃពីបញ្ហាប្រឈមអាជីវកម្ម និងគាំទ្រតម្រូវការរបស់ពួកគេក្នុងការជំរុញកំណើនក្នុងស្រុកឬតំបន់ តាមរយៈការគ្រប់គ្រងហានិភ័យ ឬការគ្រប់គ្រងថ្លៃដើម។
លោកស្រី Espano បានថ្លែងថា“ យើងផ្តល់ជូននូវសេវាកម្មឆ្លងកាត់ព្រំដែន សម្រាប់សហគ្រាសធុនមធ្យម និងសហគ្រាសធុនធំ ដើម្បីស្វែងរកឱកាសពង្រីកអាជីវកម្មលក់រាយរបស់ពួកគេនៅទូទាំងតំបន់អាស៊ាន និងមកកម្ពុជា” ។
លោកស្រីបានកត់សម្គាល់ថា ឧស្សាហកម្មលក់រាយ ត្រូវបានរងផលប៉ះពាល់យ៉ាងធ្ងន់ធ្ងរ ក្នុងកំឡុងពេលនៃការផ្ទុះឡើងនៃ COVID-១៩ ហើយបច្ចុប្បន្នកំពុងប្រឈមមុខនឹងបញ្ហាទីផ្សារហិរញ្ញវត្ថុប្រជាជន និងបញ្ហាប្រតិបត្តិការរបស់ខ្លួន។
ក្រុមហ៊ុន Grant Thornton International Ltd បានសម្ពោធដាក់ឱ្យដំណើរការ កម្មវិធី ‘Retail: Navigating the Impact of COVID-19’ ក្នុងគោលបំណងជួយដល់ក្រុមហ៊ុនផ្សេងទៀត នៅក្នុងឧស្សាហកម្មលក់រាយមកកាន់កម្ពុជា និងប្រទេសនៅក្នុងតំបន់អាស៊ាន ក្នុងអំឡុងពេលមានរោគរាតត្បាតនៃជំងឺកូវីដ១។
ក្រុមហ៊ុន Grant Thornton International គឺជាក្រុមហ៊ុនធំជាងគេទី៧ លើពិភពលោកដែលរកបានប្រាក់ចំណូល និងធំលំដាប់ទី៦ ដែលផ្តល់នូវសេវាកម្មប្រកបវិជ្ជាជីវៈ គណនេយ្យភាព ឯករាជ្យ និងជាក្រុមហ៊ុនប្រឹក្សាយោបល់ ដែលផ្តល់សេវាកម្មធានាពន្ធ និងសេវាប្រឹក្សាដល់អាជីវកម្ម ដែលកាន់កាប់ដោយឯកជន និងអង្គភាពសាធារណៈ។
ក្រុមហ៊ុន Grant Thornton International មានទីស្នាក់ការកណ្តាលនៅក្នុងទីក្រុងអង់គ្លេស ដែលធ្វើប្រតិបត្តិការជាង១៣០ប្រទេស និងមានបុគ្គលិកជាង៥៦.០០០នាក់ ដែលមានប្រាក់ចំណូលចំនួន៥,៧២ ពាន់លានដុល្លារអាមេរិក៕
