ដោយវុត្ថា
ភ្នំពេញៈ ប្រតិបត្តិករវិស័យឯកជន បានបង្ហាញក្តីសង្ឃឹមជាថ្មី លើវិស័យទេសចរណ៍កម្ពុជានឹងមានសន្ទុះឡើងវិញ បន្ទាប់ពីប្រមុខរដ្ឋាភិបាល បានបញ្ជាទិញវ៉ាក់សាំងប្រឆាំងទៅនឹងជំងឺកូវីដ១៩ កាលពីពេលថ្មីៗនេះ ខណៈដែលវិស័យអាទិភាពរបស់កម្ពុជាមួយនេះ ទទួលរងនូវផលប៉ះពាល់យ៉ាងខ្លាំង។
លោកហូ វណ្ឌី អគ្គលេខាធិការសម្ព័ន្ធទេសចរណ៏ជាតិកម្ពុជា កាលពីថ្ងៃទី១៧ ខែធ្នូម្សិលមិញនេះ បានសម្តែងកាស្វាគមន៍ ចំពោះការបញ្ជាទិញវាក់ប្រឆាំងនឹងជំងឺកូវីដ ១៩ ពីសំណាក់រាជរដ្ឋាភិបាល ដែលនេះគឺជាការផ្តល់នូវទំនុកចិត្តមួយ និងការងើបឡើងវិញនូវិស័យទេសចរណ៍កម្ពុជា មិនតែប៉ុណ្ណោះអ្វីៗផ្សេងទៀត ក៏នឹងមានប្រក្រតីភាពឡើងវិញ ។
លោកបន្តថា “បើវិស័យទេសចរណ៍មិនងើបឡើងវិញទេ វិស័យផ្សេងៗទៀត ក៏មិនអាចងើបវិញដែរ” ។ លោកបន្តថា “ក្នុងន័យនេះទេសចរណ៍ នៅក្នុងស្រុកនឹងងើបឡើងវិញជាបណ្តើរ ហើយសេវាកម្មផ្សេងៗ ក៏នឹងងើបឡើងវិញស្របជាមួយគ្នា” ។
លោកពន្យល់ថា អ្នកដែលផ្គត់ផ្គង់សេវាកម្មនៅក្នុងស្រុក នឹងមានក្តីសង្ឃឹមខ្លាំង នៅពេលមានវាក់សាំងនេះមកដល់កម្ពុជា។
លោកវណ្ឌីបានបន្ថែមា “បន្ទាប់នេះនៅពេល ដែលមានការបង្ហាញជាក់លាក់ពី ប្រសិទ្ធិភាពខ្ពស់នោះ ការធ្វើដំណើរតាមផ្លូវអាកាស និងឆ្លងកាត់ព្រំដែននានា បើកចំហរនៃប្រទេសនានា នឹងធ្វើឱ្យមានការងើបឡើងវិញនូវកទេសចរមកពីក្រៅប្រទេស។ លោករំពឹងថា “វិស័យទេសចរណ៍កម្ពុជា និងសកលលោកនឹងមានសង្ឃឹមឡើងវិញ នៅពាក់កណ្តាលឆ្នាំក្រោយនេះ (២០២១) ទើបមានស្ថានភាពល្អឡើងវិញ” ។
ជាមួយគ្នានេះ លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជាបានអោយដឹងផងដែរថា វិស័យទេសចរណ៍នូវតែទទួលផលប៉ះពាល់បើជំងឺកូវីដ១៩ នៅតែមាន ដោយសារពលរដ្ឋមានការភ័យខ្លាច ក្នុងការធ្វើដំណើរទៅកម្សាន្តនៅតំបន់នានា នៅទូទាំងប្រទេស។ ប៉ុន្តែអាស្រ័យលើការគ្រប់គ្រង និងមិនមានការរីករាលដាលជាថ្មី និងការបញ្ជាទិញវ៉ាក់សាំងពីរដ្ឋាភិបាលកាលពីពេលថ្មីៗនេះ។
លោកស្រីបន្តថា “យើងរំពឹងថាបើសិនការបញ្ជាទិញបានវ៉ាក់សាំង នៅដើមឆ្នាំក្រោយនេះ (២០២១) វិស័យទេសចរណ៍កម្ពុជានឹងងើបឡើងវិញជាបណ្តើរៗ ជាពិសេសនឹងភ្ញៀវបរទេសមកលេងនៅចុងឆ្នាំក្រោយ” ។ លោកស្រីបន្ថែថា “បើទោះបីមិនមានភ្ញៀវបរទេស ក៏មានសកម្មភាពទេសចរណ៍នៅក្នុងស្រុក ដែលនេះនឹងជួយដល់សេដ្ឋកិច្ចកម្ពុជាឱ្យមានការីកចំរើនផងដែរ” ។
សម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា បានបញ្ជាទិញវ៉ាក់សាំងប្រឆាំងទៅនឹងជំងឺកូវីដ ១៩ ចំនួន១លានដូស សម្រាប់ចាក់ជូនប្រជាពលរដ្ឋដោយឥតថ្លៃ ប្រមាណ៥០ម៉ឺននាក់ក្នុងដំណាក់កាលដំបូង សម្រាប់អ្នកដែលធ្វើការនៅកន្លែងដែលមានហានិភ័យខ្ពស់៕
