ដោយ៖ លក្ខិណា
ភ្នំពេញ៖ ចំណូលពីទិដ្ឋការភ្ញៀវបរទេសចូលមកកម្ពុជា គឺជាចំណូលមិនមែនសារពើពន្ធ និងជាចំណូលសំខាន់មួយសម្រាប់ទ្រទ្រង់ដល់ការចំណាយរបស់ជាតិ ហើយក្នុងមួយឆ្នាំៗ ចំណូលពីទិដ្ឋការបរទេសចូលកម្ពុជា ក្នុងមួយឆ្នាំៗ មានប្រមាណ១៨០លានដុល្លារអាមេរិក។ នេះយោងតាមការបញ្ជាក់ពីសម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
សម្ដេចតេជោមានប្រសាសន៍កាលពីព្រឹកថ្ងៃទី១ ខែកុម្ភៈ ឆ្នាំ២០២០១នេះថា ក្នុងមួយឆ្នាំៗ កម្ពុជារកចំណូលពីទិដ្ឋការបរទេសបានរហូតដល់១៨០លានដុល្លារអាមេរិក និងជាចំណូលដ៏សំខាន់មួយសម្រាប់ចាក់បញ្ចូលក្នុងសេដ្ឋកិច្ចជាតិ ដូច្នេះកម្ពុជានឹងមិនមានផែនការលុបចោលការយកថ្លៃសេវាទិដ្ឋការពីភ្ញៀវទេសចរបរទេសនោះឡើយ។
សម្ដេចតេចោធ្លាប់បានលើឡើងថា គ្រាន់តែភ្ញៀវទេសចរចិនមកលេងកម្ពុជា កាលមុនកូវីដ១៩ ក៏ធ្វើឱ្យកម្ពុជារកបានចំណូលពី ទិដ្ឋការនេះប្រមាណ៣០លានដុល្លារអាមេរិកដែរ ព្រោះក្នុងភ្ញៀវម្នាក់ត្រូវចំណាយលើទិដ្ឋការប្រមាណ៣០ដុល្លារអាមេរិក។
យ៉ាងណាក្ដីសម្រាប់ឆ្នាំ២០២០កន្លងទៅនេះ បើទោះបីជារដ្ឋាភិបាលមិនបង្ហាញពីចំណូលបានមកពីទិដ្ឋការភ្ញៀវទេសចរចូលមកកម្ពុជាក៏អាចដឹងថា ចំណូលសម្រាប់ឆ្នាំ២០២០នេះ ពិតជាធ្លាក់ចុះខ្លាំង ព្រោះក្នុងឆ្នាំ២០២០ពេញ មានភ្ញៀវបរទេសចូលមកកាន់ប្រទេសកម្ពុជាប្រមាណតែជាងមួយលាននាក់ប៉ុណ្ណោះ។
ប្រតិបត្តិករទេសចរកម្ពុជាជាច្រើនបានស្នើ និងអំពាវនាវឱ្យរដ្ឋាភិបាលលុបចោលឬបន្ធូរបន្ថយ សម្រាប់ថ្លៃសេវាទិដ្ឋការភ្ញៀវបរទេសចូលមកក្នុងប្រទេសកម្ពុជា ព្រោះថាបើធៀបនឹងបណ្ដាប្រទេសផ្សេងៗ ថ្លៃទិដ្ឋការភ្ញៀវបរទេសចូលមកកម្ពុជាមានតម្លៃខ្ពស់នៅឡើយ ដែលធ្វើឱ្យភ្ញៀវបរទេសហាក់មានសតិអារម្មណ៍ថាថ្លៃ៕
