ការញ័ររង្គើរអគារខ្ពស់កប់ពពកនៅប្រទេសចិន ធ្វើឲ្យមនុស្សផ្អើលរត់ជាន់គ្នាបណ្ដាលឱ្យ អាមេរិកចេញការព្រមានភ្លាមៗ

ដោយៈសុខុម
សៀងហៃ: ស្ថានកុងស៊ុលអាមេរិក ប្រចាំនៅប្រទេសចិន បានចេញការព្រមានជុំវិញអគារខ្ពស់កប់ពពកមួយនៅក្រុងស៊ឹនជិន (Shenzhen) ដែលនៅសុខៗស្រាប់តែរង្គើយ៉ាងចម្លែកបង្កការភ្ញាក់ផ្អើលរត់ជាន់គ្នា ហើយបានជំរុញឱ្យពលរដ្ឋអាមេរិក ចៀសវាងកុំចូលអគារនេះ។ នេះបើយោងតាមការចុះផ្សាយរបស់សារព័ត៌មាន The Edge Markets។

ស្ថានកុងស៊ុលនៅក្រុងគ័ងចូវ (Guangzhou) នេះបានចេញសេចក្តីថ្លែងការណ៍កាលពីថ្ងៃពុធ ទី១៩ ឧសភាថា ការព្រមានទាក់ទិនអគារ SEG Plaza នឹងនៅជាធរមានរហូតដល់មានការជូនដំណឹងជាថ្មី។ ស្ថានកុងស៊ុលដដែលបានបន្ថែមទៀតថា ពលរដ្ឋអាមេរិក ក៏ត្រូវជៀសវាងតំបន់ជុំវិញអគារនេះផងដែរ។

ជាការឆ្លើយតបជុំវិញករណីបង្កការភ្ញាក់ផ្អើលនេះ ក្រុមហ៊ុនShenzhen Electronics Group Co ដែលជាម្ចាស់អគារនេះបានចេញមុខបកស្រាយថា អ្នកជួលនៅក្នុងអគារនេះមានអារម្មណ៍ថា អគារនេះរញ្ជួយនៅម៉ោង១២ និង៣១នាទីថ្ងៃត្រង់កាលពីថ្ងៃអង្គារ ទី១៨ឧសភា ហើយការគណៈគ្រប់គ្រងអគារ ក៏បានរៀបចំការជម្លៀសមនុស្សចេញភ្លាមៗ។

សេចក្តីថ្លែងការណ៍មួយបង្ហោះលើគេហទំព័ររបស់ខ្លួន ក្រុមហ៊ុនខាងលើបានបញ្ជាក់ថា ក្រុមការងារត្រួតពិនិត្យរកមិនឃើញមានស្នាមដីប្រេះ ឬប្រេះជញ្ជាំងអគារឡើយ។