ដោយៈ សុខ ហេង
ភ្នំពេញៈ ការរកស៊ីទទួលទានក្នុងវិស័យដីធ្លីនៅតែមានភាពលេចធ្លោច្រើនជាងវិស័យផ្សេងៗទៀត ធៀបនឹងផ្នែកផ្សេងៗនៃវិស័យអចលនទ្រព្យ។ នេះបើយោងតាមការបញ្ជាក់របស់លោកប៉ូ អ៊ាវគង់អគ្គនាយកក្រុមហ៊ុនអ៊ែតវ៉ាន់ស៍រៀលអ៊ីស្ទេត នៅក្នុងបទសម្ភាសន៍ផ្តាច់មុខជាមួយគេហទំព័រ Property area.Asia កាលពីកាលពីថ្មីៗនេះ។
លោកបានថ្លែងថា ដំណាក់កាលទី១ មិនថាខុនដូ ឬការជួលអាគារ ហាក់ដូចជានៅទ្រឹងនៅឡើយ ព្រោះមិនទាន់មានតម្រូវការភ្លាមៗពិអ្នកទិញ បើទោះបីជារដ្ឋាភិបាលបានបើកឱ្យមានសកម្មភាពពចរាចរណ៍ឡើងវិញក៏ដោយ។
លោកបានថ្លែងបន្តថា ចំពោះខុនដូ ទីផ្សារភាគច្រើនជាជនបរទេស ហើយការធ្វើដំណើរឆ្លងកាត់ពីប្រទេសមួយទៅកាន់ប្រទេសមួយទៀតនៅមិនទាន់អាចដំណើរការបានដូចមុនបាន ព្រោះតែជំងឺកូវីដ១៩ ដោយឡែកសម្រាប់ប្រជាជនក្នុងស្រុកមិនទាន់មានតម្រូវការនៅឡើយ។
លោកបន្តថា ដំណាក់កាលទី២ ទាក់ទងនិងការជួលអាគារការិយាល័យ កត្តានេះទាមទារឱ្យមានការបង្កើតក្រុមហ៊ុន ឬក៏ការស្វែងរកទីតាំងរបស់ក្រុមហ៊ុនក្រៅស្រុកដែលចូលមកអភិវឌ្ឍន៍នៅក្នុងស្រុក។
លោកបានឱ្យដឹងទៀតថា ទាក់ទងជាមួយបញ្ហានេះដែរលោកអ៊ាវគង់បញ្ជាក់ខ្លីថា កម្រិតនៃការជួលនិងការផ្លាស់ទីលំនៅរបស់អ្នកជួលមិនសូវមានទេ ដោយសារអ្វី? ទី១ គាត់បង្ការហានិភ័យនៃការឆ្លងជំងឺដោយសារការផ្លាស់ប្តូរទីតាំង ទី២ ការិយាល័យក្រុមហ៊ុនៈ ក្រុមហ៊ុនមួយចំនួនដែលស្ថិតក្នុងស្ថានភាពបែបនេះ (កូវីដ) កំពុងសម្លឹងមើលអំពីឥរិយាបថនៃទីផ្សារក្រោយការបើកឡើងវិញនៃសកម្មភាពធ្វើដំណើររបស់ពលរដ្ឋក្នុងស្រុក។
ម្យ៉ាងបើទោះជាអាជីវកម្មមួយចំនួនបានបើកឡើងវិញក៏ពិតមែន ក៏ប៉ុន្តែព្រឹត្តិការណ៍២០កុម្ភៈ មិនទាន់អាចបិទបញ្ចប់បាននៅឡើយទេ ចំណែកអត្រាឆ្លងជំងឺដ៏កាចសាហាវមួយនេះនៅតែឡើង ចុះរាល់ថ្ងៃ ដែលអាចនិយាយបានថា ទាំងឆ្លង និងព្យាបាលជាមានចំនួនប្រហាក់ប្រហែលគ្នា (Balance) បើទោះបីរដ្ឋាភិបាលខិតខំពន្លឿនការចាក់វ៉ាក់យ៉ាងណាក្តី ចំណុចនេះហើយដែលលោក គិតថា សូម្បីអ្នកចង់បើកអាជីវកម្មមួយចំនួន នៅពិចារណានៅឡើយ។ ចំណែកការបើកអាគារការិយាល័យមួយចំនួនក៏មិនសូវមានដែរ។
លោកអ៊ាវគង់បានឱ្យដឹងថា “ក្រោយរដ្ឋាភិបាលបានបើកឲ្យមានសកម្មភាពឡើងវិញ អំឡុងជាមួយខែមុននេះឃើញថា មានអតិថិជន ក៏ដូចជាអ្នកវិនិយោគលើវិស័យដីធ្លី ចាប់ផ្តើមកម្រើកឡើងវិញបានមួយចំនួនដែរ ដោយសារពួកគេអាចធ្វើដំណើរបាន ហើយងាយស្រួលចេញចូល និងណាត់ជួបគ្នា ដោយអនុវត្តវិធានការរបស់ក្រសួងសុខាភិបាលផង និងអាចចុះទៅមើលដល់ទីតាំង ការដ្ឋាន ជាដើម ចំណុចទាំងនេះហើយដែលលោកគិតថា វិស័យដីធ្លីមានភាពលេចធ្លោជាងវិស័យផ្សេងៗទៀត នៃអចលនទ្រព្យរបស់កម្ពុជា”៕
