ដោយៈគង់ សូរិយា
ភ្នំពេញៈ អ្នកជំនាញបានអះអាងស្រដៀងគ្នាថា អចលនទ្រព្យនៅតំបន់អរិយក្សត្រនៅតែមានភាពល្អប្រសើរ ហើយសកម្មភាពនៃការទិញលក់បានចាប់ផ្តើមកំរើកឡើងវិញបណ្តើរៗហើយ។
ប្រធានសមាគមអចលនទ្រព្យសកល លោក សំ សុខនឿនបានមានប្រសាសន៍ថា ចលនានៃការទិញ លក់អចលនទ្រព្យនៅតំបន់អរិយក្សត្រ បានចាប់ផ្តើមកម្រើកឡើងវិញជាបណ្តើរៗហើយ ក្រោយពីថមថយល្បឿនបន្តិចក្នុងឆ្នាំ ២០២០។ ការកម្រើកឡើងវិញនេះ អាចបណ្តាលមកពីកត្តាធំៗចំនួន២ គឺការប្រកាសផ្តល់ថវិកាសាងសង់ស្ពានរបស់រដ្ឋាភិបាលកូរ៉េ និងការសម្លឹងឃើញរយៈពេលវែងរបស់អ្នកវិនិយោគ។
លោកបន្តថា “អរិយក្សត្រជាតំបន់ដ៏មានសក្តានុពល ដែលមិនអាចមើលរំលង ព្រោះនៅពេលមានស្ពានឆ្លងទន្លេ ទីនោះប្រៀបដូចតំបន់ជ្រោយចង្វារនាពេលនេះ”។
ដីនៅអរិយក្សត្រតាមផ្លូវលេខ ៣៨០ (ជាប់មាត់ទន្លេ) មានតម្លៃជាមធ្យម ១ ០០០ ដុល្លារក្នុង១ម៉ែត្រការ៉េ ដីមានចម្ងាយពី១-២ គីឡូម៉ែត្រពីមាត់ទន្លេ តម្លៃពី១០០-២០០ ដុល្លារ និងចាប់ពីចម្ងាយ៥គីឡូម៉ែត្រការ៉េ អាចមានតម្លៃក្នុងរង្វង់ពី ២០-១០០ដុល្លារ។
ជាមួយគ្នានេះ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានប្រាប់ថា ទីផ្សារអចលនទ្រព្យតំបន់អរិយក្សត្រ នៅតែរក្សាបានភាពល្អប្រសើរ បើទោះជំងឺកូវីដ១៩ កំពុងបន្តរីករាលដាល ហើយគម្រោងសាងសង់ស្ពាននៅមិនទាន់ចាប់ផ្តើម។
លោកបន្ថែមថា “ការរក្សាបាននូវភាពវិជ្ជមាននេះ គឺដោយសារអរិយក្សត្រជាតំបន់ដែលនឹងមានសក្តានុពលខ្ពស់ លើគ្រប់វិស័យនៅពេលអនាគត”។លោកបន្ថែមថា “អរិយក្សត្រគឺជាទីតាំង ដែលមានលក្ខណៈអំណោយផល សម្រាប់ការវិនិយោគលើគ្រប់វិស័យ”។
ឯកអគ្គរាជទូតកម្ពុជាប្រចាំនៅប្រទេសកូរ៉េខាងត្បូង ដែលជិតផុតអាណត្តិនាពេលឆាប់ៗនេះ លោក ឡុង ឌីម៉ង់បានមានប្រសាសន៍ថា ភាពល្អប្រសើរនៃកិច្ចសហប្រតិបត្តិការការទូត និងពាណិជ្ជកម្ម បានជំរុញឱ្យប្រទេសកូរ៉េផ្តល់ជំនួយ និងកម្ចីជាបន្តបន្ទាប់យកមកអភិវឌ្ឍប្រទេសកម្ពុជា ពិសេសការកសាងហេដ្ឋារចនាសម្ព័ន្ធផ្លូវថ្នល់។
លោកបន្តថា “ជាមួយនឹងភាពល្អប្រសើរនៃកំណើនពាណិជ្ជកម្មទ្វេភាគី នៃប្រទេសទាំង២ ក៏កំពុងត្រៀមចុះហត្ថលេខាលើកិច្ច ព្រមព្រៀងពាណិជ្ជកម្មសេរីទ្វេភាគីជាមួយគ្នាក្នុងពេលឆាប់ៗនេះផងដែរ”៕
