ដោយៈ តារា
ភ្នំពេញៈ មុខជំនួញដែលគ្មានហានិភ័យ គ្មាននៅលើលោកនេះទេ ចុះផ្សារហ៊ុនមានហានិភ័យដែរឬទេ? ចម្លើយបានប្រាប់តាំងពីឃ្លាដំបូងរួចហើយ។
តើអ្វីជាហានិភ័យដែលអ្នកគួរស្វែងយល់មុនវិនិយោគលើផ្សារហ៊ុន?
ការជួញដូរភាគហ៊ុនអាចជួបនូវហានិភ័យមួយចំនួន ដែលធ្វើឱ្យថ្លៃនៃភាគហ៊ុនធ្លាក់ចុះ ឬមានការប្រែប្រួលខ្លាំង។
យើងអាចចាត់ថ្នាក់ហានិភ័យទាំងនោះ ជាបីប្រភេទចម្បងៗ ដូចតទៅ៖
ហានិភ័យជាប្រព័ន្ធ ឬហានិភ័យទីផ្សារ
ជាភាពមិនច្បាស់លាស់ ដែលកើតមានឡើង ចំពោះទីផ្សារទាំងមូល និងមិនអាចចៀសវាងបានតាមការធ្វើពិពិធកម្ម ដូចជា ហានិភ័យនៃការធ្លាក់ចុះសេដ្ឋកិច្ច ហានិភ័យអតិផរណា ហានិភ័យអស្ថេរភាពនយោបាយ ហានិភ័យនៃការកើនឡើងអត្រាការប្រាក់ ជាដើម។
ហានិភ័យមិនមែនជាប្រព័ន្ធ
ជាភាពមិនច្បាស់លាស់ ដែលកើតមានចំពោះក្រុមហ៊ុន ឬវិស័យណាមួយ ដែលអាចកាត់បន្ថយបានដោយការធ្វើពិពិធកម្ម។ ហានិភ័យទាំងនោះរួមមាន អសាធនីយភាពនៃក្រុមហ៊ុន ការកេងបន្លំផ្ទៃក្នុងនៃបញ្ជីគណនេយ្យ សកម្មភាពជួញដូរផ្ទៃក្នុង ជាដើម។
ហានិភ័យសន្ទនីយភាព
សំដៅដល់ហានិភ័យ ដែលអ្នកទិញ និងអ្នកលក់មិនអាចរកគ្នាឃើញ ដើម្បីជួញដូរនៅពេលត្រូវការ និងនៅថ្លៃសមស្របមួយ ដោយសារកង្វះសន្ទនីយភាពក្នុងទីផ្សារ៕
