ដោយៈវឌ្ឍនៈ
ភ្នំពេញៈ ការកែប្រែសក្ដានុពលតំបន់ណាមួយ គឺតែងតែមានការប្រែប្រួលទៅលើតម្លៃដីធ្លីនៅក្នុងតំបន់ជាក់ស្ដែង តំបន់មួយដែលកែប្រែពីតំបន់ឧស្សាហកម្ម ទៅលំនៅឋាន ឬតំបន់ពាណិជ្ជកម្ម វានឹងធ្វើឱ្យតម្លៃដីធ្លីនៅក្នុងតំបន់ស្ទុះងើបមួយកកម្រិតទៀត។
អ្នកជំនាញៈការកែប្រែសក្ដានុពលតំបន់ណាមួយនឹងធ្វើឱ្យប្រែប្រួលតម្លៃដីធ្លី ក្នុងតំបន់នោះយ៉ាងដូចម្តេច?
ជាការកត់សម្គាល់តំបន់មួយចំនួននៅរាជធានីភ្នំពេញ ដែលបានកែប្រែសក្ដានុពលពីតំបន់រោងចក្រឧស្សាហកម្ម ទៅជាតំបន់ពាណិជ្ជកម្មឬក៏តំបន់លំនៅឋាន តម្លៃដីធ្លីមានការប្រែប្រួល និងពិបាកក្នុងការស្វែងរកទិញដីសម្រាប់អភិវឌ្ឍន៍ផងដែរ ។
លោកប៉ូ អ៊ាវគង់ ប្រធានក្រុមហ៊ុនអចលនទ្រព្យAdvance បានឱ្យដឹងថា ជាការពិតណាស់ នៅពេលតំបន់ណាមួយ កែប្រែសក្ដានុពលពីវិស័យមួយ ទៅវិស័យមួយទៀតនឹងធ្វើឱ្យតំបន់នោះ មានការប្រែប្រួលតម្លៃ ក្នុងនោះយើងឃើញថា តំបន់ដែលមានសក្ដានុពលទៅលើកសិកម្ម ហើយផ្លាស់ប្តូរទៅជាឧស្សាហកម្ម ឬក៏លំនៅឋានបុរីជាដើម វាក៏ចាប់ផ្ដើមធ្វើឱ្យតំបន់នោះ មានការប្រែប្រួលតម្លៃកើនឡើង ហើយតំបន់ឧស្សាហកម្មដែលប្រែទៅជាតំបន់ពាណិជ្ជកម្ម ឬក៏លំនៅឋានវាក៏នឹងធ្វើឱ្យតម្លៃប្រែប្រួលខុសពីមុនផងដែរ។
លោកបន្តថា “សម្រាប់នៅរាជធានីភ្នំពេញ តំបន់ជាយក្រុងតំបន់ឧស្សាហម្មពីមុននោះ ក៏បានចាប់ផ្ដើមកែប្រែទៅជាតំបន់លំនៅឋាន និងពាណិជ្ជកម្មជាបន្តបន្ទាប់ហើយយើងក៏ឃើញថាតម្លៃដីធ្លីតំបន់ទាំងនោះ ក៏មានការកើនឡើងជាបន្តបន្ទាប់ផងដែរ”។
លោកសំ សុខនឿនប្រធានសមាគមអចលនទ្រព្យសកលបានឱ្យដឹងផងដែរថា ដីជុំវិញរាជធានីភ្នំពេញក្រោម៥០គីឡូម៉ែត្រ គឺមានតម្លៃមិនក្រោម១០០ដុល្លារអាមេរិកទេ ក្នុងមួយម៉ែត្រការ៉េ ហើយតំបន់កាន់តែជិតក្រុងតម្លៃកាន់តែខ្ពស់។ ដូច្នេះអ្នកវិនិយោគដែលចង់បានតម្លៃទាបគួរតែងាកទៅតំបន់ជាយក្រុង ។
លោកបន្តថា “បច្ចុប្បន្ននេះតំបន់ខាងលិចរាជធានីភ្នំពេញ រហូតដល់ខេត្តកំពង់ស្ពឺតម្លៃដ៏នៅតែមានតម្លៃល្អ ហើយសក្ដានុពលតំបន់នោះ ក៏កាន់តែទាក់ទាញដល់ការវិនិយោគរបស់វិនិយោគិន ទៅលើការអភិវឌ្ឍជាឧស្សាហកម្ម និងមានរោងចក្រនៅភ្នំពេញជាច្រើនបានរើទៅកាន់តំបន់ខាងលិច ពោលគឺទៅកាន់តំបន់ផ្លូវ៥១នៃខេត្តកំពង់ស្ពឺ”៕
