ដោយវុត្ថា
ភ្នំពេញ៖ ទស្សនាវដ្តីដែលល្បីល្បាញលើពិភពលោកForbes ដែលជំនាញខាងផ្សព្វផ្សាយ និងស៊ើបអង្កេតទ្រព្យសម្បត្តិមហាសេដ្ឋីនានាលើពិភពលោក បានចុះផ្សាយឧកញ៉ាកម្ពុជាចំនួន៥រូប ដែលមានទ្រព្យសម្បត្តិ និងកាន់ជំនួញច្រើនជាងគេនៅក្នុងប្រទេសកម្ពុជាក្នុងចំណោមឧកញ៉ាដែលមានឥទ្ឋិពលចំនួន១០រូបផ្សេងទៀត។
តើឧកញ៉ាណាខ្លះដែលមានជាងគេ?
បើតាមទស្សនាវដ្តី Forbes បានឲ្យដឹងថា អ្នកឧកញ៉ា គិត ម៉េង បានឈរនៅលេខរៀងទី១ ក្នុងចំណោមឧកញ៉ាទាំង១០រូបនៅក្នុងប្រទេសកម្ពុជា ដែលមានលុយប្រហែល១,៦ពាន់លានដុល្លារសហរដ្ឋអាមេរិក ។ លោកឧកញ៉ា គិតម៉េង ជាអ្នកជំនួញកម្ពុជាដ៏ល្បីល្បាញបំផុត និងជាប្រធានក្រុមហ៊ុនThe Royal Group ដោយក្នុងនោះមានភាគហ៊ុន ៤៥ភាគរយនៃធនាគារ ANZ Royal Bank, កាន់កាប់បណ្តាញទូរស័ព្ទចល័ត Mobitel និងកាន់កាប់ភាគហ៊ុន៤៥ភាគរយនៃក្រុមហ៊ុនដឹកជញ្ជូនផ្លូវដែក Toll Royal Railways។
ឧកញ៉ារូបនេះក៏មានក្រុមហ៊ុនជាច្រើនទៀតផងដែរ ដូចជា ក្រុមហ៊ុនប្រព័ន្ឋផ្សព្វផ្សាយCBS, ក្រុមហ៊ុនធានារ៉ាប់រងINFINITY, និងក្រុមហ៊ុនជាច្រើនទៀត។
លោកឧកញ៉ា លី យ៉ុងផាត់ កាន់ដំណែងទី២ ដែលមានលុយចំនួន១ពាន់លានដុល្លារ ក្នុងចំណោមឧកញ៉ាទាំង១០ក្នុងប្រទេសកម្ពុជាក្នុងឆ្នាំ២០១៨ ។
លោកឧកញ៉ាលី យ៉ុងផាត់ ជាកូនកាត់ខ្មែរ-ថៃ បានកាន់កាប់ជំនួញជាច្រើនប្រភេទក្នុងប្រទេសកម្ពុជា រួមមាននាំចេញ និងចូលបារី វិនិយោគអគ្គិសនី កាស៊ីណូ រមណីយដ្ឋាន និងជាស្តេចជំនួញប្រចាំខេត្តកោះកុងជាប់ព្រុំប្រទេសថៃ។
ឧកញ៉ាដ៏ល្បីល្បាញរូបនេះ មានទំនាក់ទំនងល្អជាមួយរដ្ឋាភិបាលកម្ពុជានិងថៃ។ មិនត្រឹមតែប៉ុណ្ណោះ មានទំនាក់ទំនងយ៉ាងជិតស្និតបំផុតជាមួយ លោកទៀ បាញ់ រដ្ឋមន្ត្រីក្រសួងការពារជាតិ លោកទៀ វិញ អគ្គមេបញ្ជាការជើងទឹក និង លោកយុទ្ធ ភូថង អតីតអភិបាលខេត្តកោះកុង។
លោកឧកញ៉ាម៉ុង ឬទ្ធី ជាអ្នកជំនួញដ៏ល្បីល្បាញ និងមានឥទ្ធិពលក្នុងប្រទេសកម្ពុជាកាន់ដំណែងទី៣ ដែលមានលុយប្រហែលចំនួន៩០០លានដុល្លារ។ ឧកញ៉ារូបនេះបានបង្កើតក្រុមហ៊ុនMongrithy Group Co,.Ltd ដែលបាននាំចេញកៅស៊ូទៅកាន់ប្រទេសសឹង្ហបុរី ម៉ាឡេស៊ី ចិន និងប្រទេសមួយចំនួនទៀតនៅក្នុងតំបន់អាស៊ាន។ បន្ថែមពីនេះ លោក ឧកញ៉ាម៉ុង ឬទ្ធីបានវិនិយោគទៅលើវិស័យកសិកម្មជាច្រើនប្រភេទផងដែរ។
លោកឧកញ៉ាស៊ី គង់ ទ្រីវមានលុយចំនួន ៨៤០ លានដុល្លារដែលបានកាត់ដំណែងទី៤ ជាឧកញ៉ាមានលុយច្រើននៅក្នុងប្រទេសកម្ពុជា ។ លោកឧកញ៉ាគង់ ទ្រីវ ជាប្រធានក្រុមហ៊ុន KT Pacific Group ដែលជាក្រុមហ៊ុនដ៏ធំ ក្នុងការចែកចាយសេវាគ្រឿងសង្ហារឹមនៅទូទាំងប្រទេស។
បន្ថែមពីនេះលោកឧកញ៉ា ក៏បានកាន់ក៏មានជំនួញជាច្រើនប្រភេទផងដែរ រួមមាន ក្រុមហ៊ុនចែកចាយគ្រឿងអគ្គិសនីយ៍ KTE Mitsubishi និង កាន់កាប់ក្រុមហ៊ុនមជ្ឈមណ្ឌលម៉ុងឌីយ៉ាល់ ដែលជាកន្លែងរៀងចំពិធីមង្គលការដ៏ធំក្នុងរាជធានីភ្នំពេញ។
លោកឧកញ៉ាកុក អាន ដែលមានលុយចំនួន៧៥០លានដុល្លារ បានឈរនៅលំដាប់លេខរៀងទី៥ ដែលមានលុយច្រើនក្នុងប្រទេសកម្ពុជាក្នុងឆ្នាំ២០១៨នេះ។
បើតាមទស្សនាវដ្តី Forbes ចុះផ្សាយថា ដំបូងឡើយ លោក កុក អាន ជាអ្នកជំនួញលើវិស័យជលផល និង ឧស្សាហកម្មបារី។ ក្រោយមកទៀតលោក ឧកញ៉ា បានពង្រីកទៅលើមុខជំនួញផ្សេងទៀត រួមមាន បង្កើតកាស៊ីណូ Grown Resorts Casino នៅក្នុងក្រុងប៉ោយប៉ែត និងកសាងទំនប់វារីអគ្គិសនី។
លោកឧកញ៉ា ក៏ជាអ្នកគ្រប់គ្រង់ក្រុមហ៊ុន Anco Brothers Company Ltd ជាក្រុមហ៊ុនចែកចាយថ្នាំជក់ក្នុងប្រទេសកម្ពុជា និងជាក្រុមហ៊ុនបុត្រសម្ព័ន្ធរបស់ក្រុមហ៊ុន Singapura United Tobaco Ltd. និងក្រុមហ៊ុន British America Tobacco ប្រចាំនៅក្នុងប្រទេសកម្ពុជា៕
