ដោយៈវឌ្ឍនៈ
ភ្នំពេញៈ តើប្រទេសណាខ្លះបានជាប់លេខរៀង Top Ten នៅកម្ពុជា? គិតត្រឹមឆ្នាំ២០២១នេះ? និងប្រទេសនិមួយៗវិនិយោគលើទឹកប្រាក់ទំហំប៉ុន្មាន?។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ចេញផ្សាយដោយធនាគារជាតិនៃកម្ពុជានៅថ្ងៃទី ២៧ វិច្ឆិកា២០២១នេះ ឱ្យដឹងថា គិតត្រឹមចុងឆមាសទី១នៃឆ្នាំ២០២១នេះ កម្ពុជាទទួលបានទុនវិនិយោគ ពីបរទេសចនួន៣៩ពាន់លានដុល្លារអាមេរិក ក្នុងនោះមានប្រទេសចំនួន១០ ដែលបានដាក់ទុនវិនិយោគច្រើនជាងគេ។
បណ្តាប្រទេសទាំងនោះមានដូចជា
១.ប្រទេសចិនដាក់ទុនវិនិយោគសរុប ប្រមាណ១៧,៣ពាន់លានដុល្លារ ឬប្រមាណជា ៤៤,២ភាគរយ នៃទុនវិនិយោគរបស់វិនិយោគិនបរទេសសរុបនៅកម្ពុជា។
២.ប្រទេសកូរ៉េខាងត្បូង បានដាក់ទុនិវិនិយោគសរុបប្រមាណ ៤,១ពាន់លានដុល្លារអាមេរិក ឬប្រមាណជាង១០,៦ភាគរយ។
៣. ប្រទេសវៀតណាម បានដាក់ទុនវិនិយោគប្រមាណ២,៥ពាន់លានដុល្លារអាមេរិក មានចំណែកប្រមាណ៦,៣ភាគរយ។
៤. ប្រទេសសិង្ហបុរី បានដាក់ទុនវិនិយោគ ប្រមាណ២,៤ពាន់លានដុល្លារអាមេរិក មានចំណែកប្រមាណជាង៦,២ភាគរយ។
៥. ប្រទេសជប៉ុន បានដាក់ទុនវិនិយោគប្រមាណ២,៣ពាន់លានដុល្លារអាមេរិក មានចំណែកប្រមាណ៥,៨ភាគរយ។
៦. ប្រទេសម៉ាឡេស៊ី បានដាក់ទុនវិនិយោគប្រមាណជា១,៨ពាន់លានដុល្លារអាមេរិក មានចំណែកប្រមាណជា៤,៧ភាគរយ។
៧. ប្រទេសថៃ បានដាក់ទុនវិនិយោគប្រមាណ១,៨ពាន់លានដុល្លារអាមេរិក មានចំណែកប្រមាណជាង៤,៦ភាគរយ។
៨. ចក្រភពអង់គ្លេសបានដាក់ទុន ប្រមាណ១,៣ពាន់លានដុល្លារអាមេរិក មានចំណែកប្រមាណជា៣,៤ភាគរយ។
៩.ប្រទេសកាណាដា បានដាក់ទុនវិនិយោគនៅកម្ពុជារយៈពេល៦ខែដំបូងនៃឆ្នាំ២០២១នេះ ប្រមាណជា១ពាន់លានដុល្លារអាមេរិក និងមានចំណែកប្រមាណ២,៤ភាគរយ។
១០.សហរដ្ឋអាមេរិក ក៏បានដាក់ទុនវិនិយោគ ប្រមាណ៨០០លានដុល្លារអាមេរិកផងដែរ ក្នុងរយៈពេល៦ខែដើមឆ្នាំ២០២១នេះ មានចំណែកប្រមាណ២ភាគរយ នៃទុនវិនិយោគសរុប។
បើតាមរបាយការណ៍ដដែលបានបញ្ជាក់ថា មានវិស័យចំនួន៧សំខាន់ ដែលស្រូបបានទុនវិនិយោគច្រើនជាងគេ រួមមាន វិស័យហិរញ្ញវត្ថុ ២១,៩ភាគរយ វិស័យកម្មសាល ២០,៨ភាគរយ វិស័យអចលនទ្រព្យ១២,២ភាគរយ វិស័យសណ្ឋាគារ និងភោជនីយដ្ឋាន១១ភាគរយ កសិកម្ម ១០,៧ភាគរយ អគ្គិសនី ៦,៣ភាគរយ សំណង់៣,៧ភាគរយ និងវិស័យផ្សេងៗទៀតមាន១៣,៤ភាគរយ ៕
