ដោយ: សុផារី
ពោធិ៍សាត់: រោងចក្រផ្គុំ និងតម្លើងគ្រឿងបរិក្ខាអគ្គិសនី របស់ក្រុមហ៊ុន ស្នេថេក ឈីន ឯ.ក (SchneiTec CHINT Co.,Ltd) ស្ថិតក្នុងភូមិអន្សក្តាម ឃុំស្នាអន្សារ ស្រុកក្រគរ ខេត្តពោធិ៍សាត់ ដែលមានតម្លៃប្រមាណ២,៥លានដុល្លារ ត្រូវបានធ្វើពិធីសម្ពោធ ដាក់ឱ្យដំណើរការជាផ្លូវការ នាថ្ងៃទី២៨ ខែកុម្ភៈ ឆ្នាំ២០២២។
ពិធីនេះបានការអញ្ជើញចូលរួម ក្រោមអធិបតីភាពលោកស៊ុយ សែម រដ្ឋមន្ត្រីក្រសួងរ៉ែ និងថាមពល លោក កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកអគ្គីសនីកម្ពុជា និងលោក ជាវ តាយអភិបាលខេត្តពោធិ៍សាត់។
រោងចក្រផ្គុំដំឡើងគ្រឿងសម្ភារៈអគ្គិសនី SCHNEITEC CHINT CO.,LTD ត្រូវបានបង្កើតឡើងនៅខែមីនា ឆ្នាំ២០២១ ក្រោមការផ្ដួចផ្ដើម និងកិច្ចសហការរវាងក្រុមហ៊ុន SchneiTec Group និង CHINT Group។
រោងចក្រនេះ មានទីតាំងនៅភូមិអន្សាក្ដាម ឃុំស្នាអន្សា ស្រុកក្រគរ ខេត្តពោធិ៍សាត់ ដែលបង្កើតឡើងក្នុងគោលបំណងផ្តោត ទៅលើការផលិត គ្រឿងសម្ភារៈអគ្គិសនី កម្រិតតង់ស្យុងមធ្យម(MV) ដែលមានដូចជា ទូ Switchgear ទូ RMU ត្រង់ស្វូរ(MV Distribution Transformer) កុងដង់សាទ័រ(Capacitor Bank) ដើម្បីអាចផ្គត់ផ្គង់ទីផ្សារក្នុងស្រុកជាមួយនឹងផលិតផលដែលមានគុណភាព សុវត្ថិភាព និងទទួលបានស្ដង់ដារត្រឹមត្រូវតាមបច្ចេកទេសទាំងក្នុងស្រុក និងអន្តរជាតិ។
រោងចក្រនេះ គ្របដណ្ដប់លើផ្ទៃដីប្រមាណ៣ម៉ឺនម៉ែត្រការ៉េ ដែលក្នុងនោះទំហំ៣ពាន់ម៉ែត្រការ៉េជាកន្លែងផលិតកម្ម និង៥០០ម៉ែត្រការ៉េជាកន្លែងការិយាល័យ។
ក្រុមហ៊ុនបានសម្តែងសុទិដ្ឋិនិយមថា រោងចក្រដ៏ធំក្នុងទឹកដីខេត្តពោធិ៍សាត់នេះគឺជាជោគជ័យដ៏មានតម្លៃ ក្នុងការចូលរួមលើកស្ទួយចំណែកនៃការអភិវឌ្ឍន៍សេដ្ឋកិច្ច លើវិស័យអគ្គិសនីនៅក្នុងប្រទេសកម្ពុជា៕
