ដោយ ស៊ីវ ម៉េង
ភ្នំពេញ៖ មន្ត្រីជាន់ខ្ពស់នៃរាជដ្ឋាភិបាលកម្ពុជា បានសម្តែងសុទិដ្ឋិនិយមថា លំហូរទុនវិនិយោគផ្ទាល់ពីបរទេសមកម្ពុជា (FDI) នឹងកើនដល់៦ពាន់លានដុល្លារនៅឆ្នាំ២០១៩ខាងមុខនេះ។
ឧបនាយករដ្ឋមន្ត្រី ហោ ណាំហុង បានថ្លែងក្នុងពិធីបើកវេទិកាបូអាវនៅទីក្រុងភ្នំពេញ ដោយមានក្រុមហ៊ុនអន្តរជាតិចំនួន២០០០មកពីប្រទេសចំនួន២០ កាលពីថ្ងៃទី២៦ កញ្ញាកន្លងមកថា លំហូរទុនវិនិយោគដោយផ្ទាល់ពីបរទេសបានកើនឡើងដល់ទឹកប្រាក់ចំនួន ២១០០លានដុល្លារនៅក្នុងរយៈពេល៧ខែដើមឆ្នាំនេះ ហេតុនេះយើងរំពឹងថាទំហំទុនវិនិយោគនៅឆ្នាំ២០១៩ នឹងកើនឡើងដល់ចំនួនដែលយើងចង់បាន។
លោកបន្តថា “ជាមួយនឹងកត្តាសុខសន្តិភាព ស្ថិរភាពនយោបាយ កំនើនសេដ្ឋកិច្ចនិងបរិយាកាសវិនិយោគកាន់តែប្រសើរ កម្ពុជារំពឹងថានឹងទទួលបានទំហំទុនវិនិយោគដល់៦ពាន់លាននៅឆ្នាំក្រោយ និងកើនឡើងទ្វេរដងនៅឆ្នាំ២០២០ខាងមុខនេះ។
វេទិកាបូអាវអាស៊ីឆ្នាំនេះប្រារពធ្វើឡើងក្រោមប្រធានបទ “ការស្វែងរកការអភិវឌ្ឍនិងភាពឈ្នះ ឈ្នះរួមគ្នានិងកិច្ចប្រឹងប្រែងរួមគ្នា ក្នុងការនាំមកនូវកិច្ចសហប្រតិបត្តិការសេដ្ឋកិច្ច ពាណិជ្ជកម្មរវាងកម្ពុជា ចិនក្នុងយុគសម័យថ្មី។
វេទិកានេះបានចាប់ផ្តើមរយៈពេលពីរថ្ងៃនៅទីក្រុងភ្នំពេញ ដោយចាប់ផ្តើមពីថ្ងៃទី២៦ដល់២៧កញ្ញានេះ និងមានការចូលរួមពីឥស្សរជនជាន់ខ្ពស់ អ្នកជំនួញល្បីៗនៅកម្ពុជា និងក្នុងតំបន់ផងដែរ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានថ្លែងថា វេទិកានេះត្រូវបានរៀបចំដោយសភាពាណិជ្ជកម្មកម្ពុជា ដោយមានប្រទេសចំនួនជាង២០ចូលរួម និងមានការចូលរួមពីអតីតឧបនាយរដ្ឋមន្ត្រីថៃ ដែលជាសមាជិករបស់បូអាវផងដែរ។លោកឧកញ៉ាបានបន្តថា នេះជាលើកទី១ដែលកម្ពុជាមានកិត្តិយសបានធ្វើជាម្ចាស់ផ្ទះនៃវេទិកា ដែលបានរៀបចំរៀងរាល់២ឆ្នាំម្តងនេះ។
លោកឧកញ៉ាបានបន្តថា “គោលដៅនៃវេទិកានេះ ដើម្បីបង្កើនកិច្ចសហប្រតិបត្តិការឈ្នះ ឈ្នះរបស់ប្រទេសជាសមាជិក ដែលបច្ចុប្បន្នមានប្រទេសជាង២០ហើយបានចូលរួមក្នុងវេទិកាដ៏ធំនេះ”៕
