ដោយៈ គង់ សូរិយា
ភ្នំពេញៈ លោកឆាយ ថនរដ្ឋមន្រ្តីក្តសួងផែនការបានអះអាងថា កម្ពុជាកំពុងស្ថិតក្នុងបរិបទប្រជាសាស្ត្រមួយ ដែលប្រជាជនក្នុងវ័យធ្វើការអាយុពី ១៥ ឆ្នាំដល់៥៩ឆ្នាំ មានចំនួនជាង៦២% នៃប្រជាជនសរុបជិត១៧លាននាក់។
លោកបានចាត់ទុកទិន្ន័យនេះ ជាបរិបទប្រជាសាស្ត្រ អំណោយផលដល់ការអភិវឌ្ឍសេដ្ឋកិច្ចដែលហៅថា “ភាគលាភប្រជាសាស្ត្រ” ពីព្រោះប្រជាជន ក្នុងវ័យធ្វើការមានចំនួនច្រើនលើសលប់ និងផលធៀបអ្នកក្នុងបន្ទុកមានចំនួនតិច។
លោកឆាយ ថន ទេសរដ្ឋមន្ដ្រី និងជារដ្ឋមន្ដ្រីក្រសួងផែនការថ្លែងបែបនេះ ពេលធ្វើជាអធិបតីក្នុងពិធី បើកទិវាប្រជាជនពិភពលោក១១ កក្កដា លើកទី៣៣ កាលពីថ្ងៃទី ១១ ខែកក្កដាថា កម្ពុជាកំពុងស្ថិតក្នុងបរិបទប្រជាសាស្ត្រមួយ ដែលប្រជាជនក្នុងវ័យធ្វើការអាយុពី១៥ឆ្នាំ ដល់៥៩ ឆ្នាំមានចំនួនជាង៣ភាគ៥ (៣/៥) ឬ ៦២% នៃប្រជាជនសរុបនៅឆ្នាំ ២០១៩(ជំរឿនឆ្នាំ ២០១៩ ប្រជាជនកម្ពុជាមាន១៥,៦ លាននាក់)។
លោកថ្លែងថា “នេះគឺជាបរិបទប្រជាសាស្ត្រមួយ ដែលកំពុងអំណោយផលដល់ការអភិវឌ្ឍសេដ្ឋកិច្ច ដែលហៅថា ភាគលាភប្រជាសាស្ត្រ ពីព្រោះប្រជាជន ក្នុងវ័យធ្វើការមានចំនួនច្រើនលើសលប់ និងផលធៀបអ្នកក្នុងបន្ទុកមានចំនួនតិច”។
ទោះជាយ៉ាងណា លោក ឆាយ ថន បានព្រមានថា ដើម្បីចាប់យកឱកាសនៃភាគលាភ ប្រជាសាស្ត្រដែលកំពុងមាន ហើយភាគលាភប្រជាសាស្ត្រនេះ នឹងអស់ជាបណ្តើរៗចាប់ពីឆ្នាំ២០៣៨តទៅ ចាំបាច់ត្រូវការការយកចិត្តទុកដាក់ដោះស្រាយបញ្ហាប្រឈមពាក់ព័ន្ធនានា ដូចជា សុខភាពបន្តពូជរបស់យុវវ័យ និងក្មេងស្រីទេសន្តរប្រវេសន៍ និងនគរូបនីយកម្ម យុវជន និងការអប់រំ ការងារ និងកម្លាំងពលកម្ម ការកើនឡើងនៃប្រជាជនវ័យចាស់នាពេលខាងមុខ យេនឌ័រ សិទ្ធិក្នុងការចូលរួម និងការទទួលបានជាដើម។
លោកថ្លែងថា បញ្ហាទាំងនេះទាមទារនូវការធ្វើអន្តរាគមន៍ ឱ្យបានទាន់ពេល និងចំគោលដៅ តាមរយៈការដាក់ចេញនូវគោលនយោបាយ និងវិធានការសមស្រប ដើម្បីកាត់បន្ថយផលប៉ះពាល់អវិជ្ជមាន បណ្តាលមកលើការអភិវឌ្ឍសង្គមសេដ្ឋកិច្ច និងដើម្បីជំរុញការអភិវឌ្ឍ ធនធានមនុស្សឱ្យមានប្រសិទ្ធភាព និងប្រសិទ្ធផលក្នុងការអភិវឌ្ឍសង្គម-សេដ្ឋកិច្ច។
ទិវាប្រជាជនពិភពលោក១១ កក្កដា ឆ្នាំនេះ ធ្វើឡើងក្រោមប្រធានបទ “ពិភពលោកមួយដែលមានប្រជាជន៨ ប៊ីលាននាក់ឆ្ពោះទៅរកអនាគតដែលមានភាពធន់ ដើម្បីចាប់យកឱកាស និងធានាសិទ្ធិ និងជាជម្រើសសម្រាប់ទាំងអស់គ្នា”។
យោងតាមទិន្នន័យជំរឿនឆ្នាំ ២០១៩ ប្រជាជនកម្ពុជាក៏មាននិន្នាការកើនឡើងផងដែរក្នុងអត្រាកំណើន១,៤% ក្នុង១ឆ្នាំ គិតពីឆ្នាំ ២០០៨ ដល់ ឆ្នាំ២០១៩ ពីប្រមាណ១៣,៤ លាននាក់នៅឆ្នាំ២០០៨ ដល់ប្រមាណ១៦ លាននាក់នៅឆ្នាំ២០១៩ ខណៈ ឆ្នាំ១៩៩៨ (១១,៤ លាននាក់) ដល់ឆ្នាំ ២០០៨ ក្នុងអត្រាកំណើនប្រចាំឆ្នាំ ១,៥%។
ការកើនឡើងនៃចំនួនប្រជាជនកម្ពុជា នា២ទសវត្សរ៍ចុងក្រោយនេះ បណ្តាលមកពីការធ្លាក់ចុះ នៃអត្រាមរណភាព ការកើនឡើងនៃអាយុសង្ឃឹមរស់ និងសម្ទុះកំណើន៕
