ដោយៈ គង់ សូរិយា
ភ្នំពេញៈ រាជរដ្ឋាភិបាលកម្ពុជា តាមរយៈក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា នៅក្នុងរយៈពេល៥ឆ្នាំចុងក្រោយនេះ ការវិនិយោគនៅក្នុងវិស័យសំណង់ សម្រេចបាន១៩,៣២២ គម្រោងដែលមានទុនវិនិយោគជាង៣១ពាន់លានដុល្លារ។
យោងតាមរបាយការណ៍ស្ដីពី សមិទ្ធផលសម្រេចបានរយៈពេល៥ឆ្នាំកន្លងមករបស់ក្រសួងរៀបចំដែនដី នគរូបនីយកម្ម និងសំណង់បានឲ្យដឹងកាលពីចុងខែសីហាកន្លងមកថា ការវិនិយោគវិស័យសំណង់ទាំងក្នុងស្រុក និងពីក្រៅប្រទេសមានសម្ទុះខ្លាំងក្លា និងបានរួមចំណែកដ៏សំខាន់ក្នុងការជំរុញកំណើនសេដ្ឋកិច្ចជាតិ។ ជាក់ស្តែងរយៈពេល ៥ ឆ្នាំចុងក្រោយនេះ ការវិនិយោគក្នុងវិស័យសំណង់ សម្រេចបាន ១៩,៣២២ គម្រោង ដែលស្មើទុនវិនិយោគ៣១,៤៨៤លានដុល្លារ។
ជាមួយគ្នានេះ ក្នុងរយៈពេល៦ខែ ឆ្នាំ ២០២២ ការវិនិយោគក្នុងវិស័យសំណង់មានចំនួន២,០០០គម្រោង និងមានទុនវិនិយោគ១,២០៦លានដុល្លារ។
លោកលី រស្មីរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានមានប្រសាសន៍ឲ្យដឹង ក្នុងសន្និសីទសារព័ត៌មានស្ដីពី សមិទ្ធផលសម្រេចបានរយៈពេល ៥ ឆ្នាំកន្លងមក របស់ក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី២៤ ខែសីហាកន្លងមកថា ប្រទេសដែលនាំមុខគេក្នុងការវិនិយោគ ក្នុងវិស័យសំណង់ និងអចលនទ្រព្យនៅកម្ពុជា រួមមានប្រទេសចិន កូរ៉េខាងត្បូង ជប៉ុន និងប្រទេសថៃ។
លោកបានថ្លែងថា “វិស័យសំណង់ គឺជាផ្នែកមួយដែលមានសារៈសំខាន់ ដែលបានរួមចំណែកក្នុងការអភិវឌ្ឍសេដ្ឋកិច្ចជាតិ ដោយបំពេញនូវគោលបំណងជាមូលដ្ឋាន និងបង្កើតនូវឱកាសការងារជាច្រើន ព្រមទាំងបង្កើនប្រាក់ចំណូលខ្ពស់ដល់សង្គម និងបានចូលរួមដ៏សកម្មក្នុងកំណើននៃសេដ្ឋកិច្ចជាតិ ពិសេសពាក់ព័ន្ធទៅនឹងការវិនិយោគ លើវិស័យនេះដោយផ្ទាល់”។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកច្រឹក សុខនីមបានមានប្រសាសន៍ឲ្យដឹងផងដែរថា ក្រៅពីចិន និងជប៉ុន ដែលបានចូលរួមវិនិយោគច្រើន ក្នុងវិស័យសំណង់នៅកម្ពុជា វិនិយោគិននៅតំបន់អឺរ៉ុប ក៏មានការវិនិយោគច្រើនគួរឱ្យកត់សម្គាល់ដែរ។
លោកបន្ថែមថា “ទុនវិនិយោគដែលហូរចូលមកប្រទេសកម្ពុជា តាមរយៈវិស័យសំណង់ បានចូលរួមចំណែកយ៉ាងច្រើន ក្នុងការពង្រីកសក្តានុពលសេដ្ឋកិច្ចជាតិ ព្រោះអ្នកវិនិយោគទាំងនេះ បាននាំយកទុនពីបរទេសមកចាក់ចូលនៅក្នុងចរន្តសេដ្ឋកិច្ចកម្ពុជា”។
យោងតាមរបាយការណ៍ពីក្រសួងរៀបចំដែនដី នគរូបនីយកម្ម និងសំណង់ ក្នុងរយៈពេលជិត២២ ឆ្នាំមកនេះ ក្រសួងបានចេញលិខិតអនុញ្ញាតសាងសង់ នៅទូទាំងប្រទេសចំនួន៥៧,៥៩០គម្រោង និងទុនវិនិយោគ ៦៦,២០៥លានដុល្លារ។ ក្នុងនោះគម្រោងអគារខ្ពស់ៗចាប់ពី ៥ ជាន់ឡើងនៅទូទាំងប្រទេសមាន២,៤៧២អគារ គម្រោងបុរីលំនៅឋាន និងលំនៅឋានមានលក្ខណៈជាបុរីមានចំនួន៤៨២គម្រោង៕
