ដោយៈ ជេស៊ីកា
ភ្នំពេញៈ រដ្ឋាភិបាល តាមរយៈទីស្តីការគណៈរដ្ឋមន្រ្តីបានអនុញ្ញាត្តឲ្យក្រុមហ៊ុនតាព្រហ្ម អ៉ីនវេសមិន ឯ កវិនិយោគលើកោះតាព្រហ្ម ដែលមានទំហំជាង១០០ហិកតា ធ្វើជាតំបន់អភិវឌ្ឍន៍លំនៅដ្ឋាន និងមជ្ឈមណ្ឌលពាណិជ្ជកម្មចម្រុះ។
កោះតាព្រហ្ម មានទំហំផ្ទៃដីប្រមាណ១១៦ហិកតា ស្ថិតនៅក្នុងសង្កាត់ព្រែកឯង ខណ្ឌច្បារអំពៅ រាជធានីភ្នំពេញ។ នេះបើតាមលិខិតលេខ ៨២១ សជណ.មយ ចុះថ្ងៃទី២៣ ខែកញ្ញា ឆ្នាំ២០២២។
ក្រុមហ៊ុននេះ នឹងអភិវឌ្ឍកោះតាព្រហ្ម ឱ្យទៅជាតំបន់សេដ្ឋកិច្ចចម្រុះ តំបន់លំនៅឋាន និងប្រែក្លាយទៅជាទីក្រុងរណបមួយផងដែរ។
យោងតាមស ជ ណ ដែលបានចេញផ្សាយដោយទីស្តីការគណៈរដ្ឋមន្រ្តីបានឲ្យដឹងថា រដ្ឋបាលរាជធានីភ្នំពេញ ជាតំណាងរាជរដ្ឋាភិបាលកកម្ពុជា ដើម្បីចុះកិច្ចសន្យាស្តីពីការអភិវឌ្ឍតំបន់កោះតាព្រហ្ម ជាក្រុមហ៊ុនតាព្រហ្ម អ៊ិនវេសមិន ឯ.ក។
ទោះជាយ៉ាងណាប្រភពព៌តមាន មិនបញ្ជាក់ពីពេលវេលានៃការចាប់ ផ្តើមគំរោងវិនិយោគនេះ និងទំហំទឹកប្រាក់ប៉ុន្មានពាន់លានដុល្លារ នឹងត្រូវយកទៅអភិវឌ្ឍន៍កោះនេះនៅឡើយទេ៕
