ដោយៈ សុផារី
ភ្នំពេញៈ អ្នកជំនាញអចលនទ្រព្យ ជាសមាជិកនៃសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាប្រមាណ១០រូបបាន និងកំពុងធ្វើដំណើរទៅចូលរួមកិច្ចប្រជុំ NAR NXT ប្រចាំឆ្នាំ២០២២ នៅក្នុងសហរដ្ឋអាមេរិក ដើម្បីនាំយកនូវបទពិសោធន៍ល្អៗ ពីទីផ្សារអចលនទ្រព្យសហរដ្ឋអាមេរិក មកកាន់ប្រទេសកម្ពុជា។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍ប្រាប់ Property Area Asia នៅថ្ងៃទី៩ ខែវិច្ឆិកានេះថា កិច្ចប្រជុំរបស់សមាគមអ្នកវាយតម្លៃ និងភ្នាក់ងារអចលនវត្ថុសហរដ្ឋអាមេរិក តែងតែធ្វើឡើងជារៀងរាល់ឆ្នាំ ប៉ុន្តែត្រូវបានផ្អាកក្នុងកំឡុងវិបត្តិកូវីដ១៩ ហើយទើបតែត្រូវបានបើកដំណើរការកិច្ចប្រជុំជាថ្មី នៅក្នុងឆ្នាំ២០២២នេះ។
-->
កិច្ចប្រជុំប្រចាំឆ្នាំរបស់សមាគម នៃសហរដ្ឋអាមេរិកនេះ នឹងប្រព្រឹត្តិទៅនៅក្នុងទីក្រុង Orlando នៃរដ្ឋ Florida។
លោកបានឱ្យដឹងថា “កិច្ចប្រជុំរវាងសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងសហរដ្ឋអាមេរិកនេះ មានគោលបំណងក្នុងការនាំយកបទពិសោធន៍ ពាក់ព័ន្ធជាមួយនឹងការធ្វើអាជីវកម្ម ក្នុងវិស័យអចលនទ្រព្យនៅក្នុងសហរដ្ឋអាមេរិក ហើយសមាគម CVEA នឹងនាំយកមកចែករំលែកនៅក្នុងប្រទេសកម្ពុជា”។
លោកបញ្ជាក់បន្ថែមថា ក្នុងកិច្ចប្រជុំនេះផងដែរ អ្នកដែលមានបទពិសោធន៍អំពីបច្ចេកវិទ្យា របៀបរបបនៃការជួញដូរអចលនទ្រព្យ និងរបៀបរបបការប្រើប្រាស់ហិរញ្ញវត្ថុ ក្នុងទីផ្សារអន្តរជាតិ ដើម្បីទទួលបានប្រសិទ្ធិភាព ក្នុងការជួញដូរក្នុងទីផ្សារអចលនទ្រព្យកម្ពុជា។
កិច្ចប្រជុំ 2022 NAR NXT, The Realtor® Experience នេះមានការចូលរួមពីសំណាក់ ក្រុមអ្នកវាយតម្លៃវិជ្ជាជីវៈពីទូទាំងពិភពលោក ដែលនឹងចាប់ផ្តើមពីថ្ងៃទី១១ ដល់ថ្ងៃទី១៣ ខែវិច្ឆិកា ឆ្នាំ២០២២នេះ ក្រោមប្រធានបទ “ត្រៀមខ្លួន កំណត់ រីកចម្រើន” ។
ព្រឹត្តិការណ៍សមាគមពាណិជ្ជកម្មដ៏ធំបំផុតមួយនេះ មានការចូលរួមពីសំណាក់អ្នកជំនាញអចលនទ្រព្យ និងអ្នកពាក់ព័ន្ធ មកពីរដ្ឋទាំង៥០នៃទឹកដីអាមេរិក និងចំនួន៦០ប្រទេសទូទាំងពិភពលោកជាង១២.០០០នាក់៕
