ដោយ: លាងហួរ
ហាណូយ: លោក Le Hoang Chau ប្រធានសមាគមអចលនទ្រព្យទីក្រុងហូជីមិញ (HoREA)បាននិយាយថា ក្រុមហ៊ុនអភិវឌ្ឍន៍អចលនទ្រព្យវៀតណាមជាច្រើន កំពុងកាត់បន្ថយអាជីវកម្មរបស់ពួកគេ ដូចដែលយើងអាចមើលឃើញរួមមានការផ្អាកការវិនិយោគ ឬការពន្យារពេលសាងសង់គម្រោងនានា។
លោកបានបន្ថែមថា ពួកគេក៏បានបញ្ឈប់ ការដាក់ចេញនូវគម្រោងថ្មីៗ និងការចេញភាគហ៊ុនថ្មី ហើយសកម្មភាពបែបនេះ នឹងជះឥទ្ធិពលដល់ការងើបឡើងវិញនៃសេដ្ឋកិច្ច និងកាត់បន្ថយប្រាក់ចំណូលរបស់រដ្ឋាភិបាល។
លោក Chau បាននិយាយថា “បណ្តាក្រុមហ៊ុនអភិវឌ្ឍន៍អចលនទ្រព្យជាច្រើន បាននឹងកំពុងកាត់បន្ថយកម្លាំងពលកម្ម របស់ពួកគេខ្លះរហូតដល់ទៅ៥០ភាគរយ”។
ជាមួយនឹងកូតាឥណទានរបស់ធនាគារពេញលេញ និងការគ្រប់គ្រងកាន់តែតឹងរ៉ឹង លើទីផ្សារមូលបត្របំណុល ក្រុមអ្នកអភិវឌ្ឍន៍អចលនទ្រព្យត្រូវការដើមទុន ហើយត្រូវតែខ្ចីពីអ្នកឱ្យខ្ចីក្រៅផ្លូវការ ក្នុងអត្រាការប្រាក់ខ្ពស់ (រហូតដល់៤០ ទៅ៥០ភាគរយនៃតម្លៃកិច្ចសន្យា) ដែលមានន័យថាគម្រោងនាពេលអនាគតមានហានិភ័យខ្ពស់។
លោកបានបន្ថែមថា ស្របពេលមានការធ្លាក់ចុះ នៃសេដ្ឋកិច្ចពិភពលោក និងការរំខានដល់ខ្សែសង្វាក់ផ្គត់ផ្គង់ ដែលត្រូវបានរំពឹងទុកថា អាចនឹងកើតឡើងនៅឆ្នាំក្រោយ ទីផ្សារអចលនទ្រព្យរបស់វៀតណាម អាចនឹងរងផលប៉ះពាល់យ៉ាងធ្ងន់ធ្ងរជាងនេះទៅទៀត៕
