ដោយ៖ សុផារី
ភ្នំពេញ៖ ក្នុងរយៈពេល១០ខែ ក្នុងឆ្នាំ២០២២នេះ ប្រទេសកម្ពុជាទទួលបានចំនួនទេសចរថៃនិងវៀតណាមស្ថិតនៅក្នុងលំដាប់ទី១ និងទី២ ដែលលំហូរនៃកំណើនទេសចរនេះបានជំរុញឱ្យមានការងើបឡើងវិញផ្នែកខ្លះនៃទីផ្សារសណ្ឋាគារ។
បើតាមរបាយការណ៍របស់ក្រសួងទេសចរណ៍ ដែលចេញផ្សាយនៅថ្ងៃទី៣០ ខែវិច្ឆិកា ឆ្នាំ២០២២នេះ បានឱ្យដឹងថា ក្នុងរយៈពេល១០ខែនៃឆ្នាំ២០២២ ចាប់ពីខែមករា ដល់ខែតុលា កម្ពុជាទទួលបានភ្ញៀវទេសចរអន្តរជាតិជាង១លាន៥៧ម៉ឺននាក់ កើនឡើងជិត១ម៉ឺនភាគរយ។
របាយការណ៍របស់ក្រសួងទេសចរណ៍បានបន្ថែមទៀតថា ទីផ្សារទេសចរកំពូលទាំង១០ដែលមានភ្ញៀវមកទស្សនាប្រទេសកម្ពុជាច្រើនជាងគេ រួមមាន ប្រទេសថៃ៥៩០.៩៨៤នាក់ វៀតណាម៣៤១.៩៥៣នាក់ ចិន៧៥.៩១៥នាក់ សហរដ្ឋអាមេរិក៦០.៩០៣នាក់ ឡាវ៥៩.៣៦៨នាក់ ឥណ្ឌូណេស៊ី៥៩.១២២នាក់ កូរ៉េខាងត្បូង៤៣.១៧៨នាក់។
នាយកគ្រប់គ្រង CBRE Cambodia លោក Lawrence Lennon បានមានប្រសាសន៍ថា លំហូរចូលនៃទេសចរមកពីបណ្តាប្រទេសថៃ វៀតណាម បាននាំឱ្យមានការរីកលូតលាស់នៅក្នុងទីផ្សារសណ្ឋាគារ និងផ្ទះសំណាក់កម្រិតទាប ដោយទីផ្សារស្នាក់នៅខ្លះរាយការណ៍ថា មានការកាន់កាប់រហូតដល់១០០ភាគរយ។
ជាមួយគ្នានេះ Knight Frank បានឱ្យដឹងតាមរយៈរបាយការណ៍មួយកាលពីពេលថ្មីៗនេះថា ទីផ្សារសណ្ឋាគារនៅក្នុងប្រទេសកម្ពុជា ជាប្រភេទកម្រិតមធ្យមមានចំនួន៤៨ភាគរយ សណ្ឋាគារប្រភេទ Upscale & Upper Midscaleចំនួន២៧ភាគរយ និង ២៧ភាគរយទៀតជាប្រភេទប្រណីត។
របាយការណ៍នេះឱ្យដឹងទៀតថា ចំនួនភ្ញៀវទេសចរកម្ពុជា ដែលបានធ្វើដំណើរចេញក្រៅប្រទេសមានចំនួន៦៦១.០៧៣នាក់ កើនឡើង៣២៧៦,៣ភាគរយ ក្នុងរយៈពេល១០ខែនៃឆ្នាំ២០២២ដូចគ្នានេះ៕
