ដោយៈ សុផារី
ក្រចេះ៖ ខេត្តក្រចេះមានការរីកចម្រើនគួរឱ្យកត់សម្គាល់ ទាំងផ្នែកហេដ្ឋារចនាសម្ព័ន្ធនិងរូបវ័ន្តផ្សេងៗ ដែលបានចូលរួមប្រែក្លាយមុខមាត់ ខេត្តឱ្យកាន់តែល្អប្រសើរឡើង ជាពិសេសបានចូលរួមលើកកម្ពស់ ជីវភាពរស់នៅរបស់ប្រជាពលរដ្ឋ និងសេដ្ឋកិច្ចក្នុងខេត្តទាំងមូល។
ផ្លូវជាតិលេខ៧ ដែលទើបតែដាក់សម្ពោធឱ្យប្រើប្រាស់ កាលពីពេលថ្មីៗ បានជំរុញចរន្តទិញលក់អចលនទ្រព្យនៅក្នុងខេត្តក្រចេះ ឱ្យបន្តមានសកម្មភាពល្អប្រសើរជាធម្មតា។
លោក ឡុង សារិន ប្រធានផ្នែកលក់អចលនទ្រព្យលំនៅឋាន នៃក្រុមហ៊ុន Kratie Real Estate បានមានប្រសាសន៍ប្រាប់ Property Area Asia នៅព្រឹកថ្ងៃទី១ ខែធ្នូនេះថា ចរន្តទិញលក់អចលនទ្រព្យ នៅក្នុងខេត្តក្រចេះមានសកម្មភាពទិញ លក់ និងជួលល្អប្រសើរច្រើន នៅក្នុងត្រីមាសទី៣ និងទី៤ ឆ្នាំ២០២២នេះ។ នៅក្នុងទីរួមខេត្តក្រចេះ តែម្តងមានការសាងសង់ប្រភេទផ្ទះសម្រាប់ជួល និងបន្ទប់ជួលច្រើន។
លោកបានបន្តថា “រដ្ឋបាលខេត្តក៏បានយកចិត្តទុកដាក់ លើការអភិវ ឌ្ឍហេដ្ឋារចនាសម្ព័ន្ធ ផ្លូវថ្នល់ ទឹក ភ្លើង ច្រើនជាងមុន។ ម្យ៉ាងទៀត គម្រោងកំណាត់ផ្លូវជាតិលេខ៧ ដែលទើបតែត្រូវបានដាក់សម្ពោធ ឱ្យប្រើប្រាស់ជាផ្លូវការ កាលពីដើមខែកុម្ភៈ ឆ្នាំ២០២២កន្លងមក ក៏កាន់តែជំរុញសកម្មភាពអចលនទ្រព្យបន្ថែមមួយកម្រិតទៀតផងដែរ”។
កំណាត់ផ្លូវជាតិលេខ៧ គឺជាខ្សែផ្លូវដ៏មានសក្ដានុពលមួយ តភ្ជាប់ពីរាជធានីភ្នំពេញ ឆ្លងកាត់ខេត្តសំខាន់ៗ ដូចជា ខេត្តកំពង់ចាម ត្បូងឃ្មុំ ក្រចេះ ស្ទឹងត្រែង និងឆ្ពោះទៅតំបន់ប៉ូលសេដ្ឋកិច្ចទី៤ របស់កម្ពុជា ស្ថិតនៅភូមិភាគឥសាន្ត សម្រាប់បម្រើឱ្យចរាចរណ៍ ក្នុងសកម្មភាពផ្លាស់ប្តូរសេដ្ឋកិច្ច ពាណិជ្ជកម្ម និងទេសចរណ៍នៅក្នុងប្រទេស។
បើយោងតាមលោកសារិន នៅតាមតំបន់តាមបណ្តោយផ្លូវជាតិលេខ៧ ចាប់ពីរង្វង់មូលខ្លាស្ទុះ មកដល់ទីរួមខេត្ត សង្កេតឃើញមានសកម្មភាពទិញលក់ច្រើនជាងគេ។
លោកបញ្ជាក់ថា “តំបន់នេះ ពេញនិយមសម្រាប់ការសាងសង់ផ្ទះសម្រាប់ជួល ផ្ទះល្វែងទំហំល្មមៗសម្រាប់ប្រកបអាជីវកម្ម ឬខ្លះទៀតអភិវឌ្ឍន៍ជាប្រភេទផ្ទះធំៗសម្រាប់ជួលឱ្យក្រុមហ៊ុន ឬធនាគារ”។
ទេសរដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា ផ្លូវជាតិលេខ៧នេះ ជាផ្នែកមួយនៃផ្លូវអាស៊ានហាយវ៉េយលេខ១១ ឬរបៀងកណ្តាលរបស់មហាអនុតំបន់មេគង្គ ដែលតភ្ជាប់ពីទីក្រុងគុនមីង នៅភាគខាងត្បូង នៃប្រទេសចិន ឆ្លងកាត់ទីក្រុងវៀងច័ន្ទ ប្រទេសឡាវ កាត់រាជធានីភ្នំពេញ និងឆ្ពោះទៅកំពង់ផែ ក្រុងព្រះសីហនុ។
ផ្លូវនេះក៏មានសក្តានុពល ក្នុងការប្រែក្លាយខេត្តត្បូងឃ្មុំ ក្រចេះ ស្ទឹងត្រែង រតនគិរី និងមណ្ឌលគិរី ឱ្យទៅប៉ូលសេដ្ឋកិច្ចទីបួន នៃការអភិវឌ្ឍបែបកសិ-ឧស្សាហកម្ម និងធនធានរ៉ែ របស់កម្ពុជា។
ជាមួយគ្នានេះ លោក វ៉ា ថន អភិបាលនៃគណ:អភិបាលខេត្តក្រចេះ បានមានប្រសាសន៍នៅថ្ងៃទី៣០ ខែវិច្ឆិកាម្សិលមិញថា បច្ចុប្បន្នខេត្តក្រចេះបានទទួលការអភិវឌ្ឍលើគ្រប់វិស័យ ខណៈខេត្តក្រចេះក៏ជាប៉ូលសេដ្ឋកិច្ចទី៤នៃប្រទេសកម្ពុជាថែមទៀតផង។
លោកបានមានប្រសាសន៍ថា “ខេត្តក្រចេះមានការអភិវឌ្ឍគួរឱ្យកត់សម្គាល់ លើវិស័យហេដ្ឋារចនាសម្ព័ន្ធយើងមានផ្លូវជាតិ ផ្លូវខេត្ត មានស្ពានបេតុង ស្ពានដែក ស្ពានឈើ ផ្លូវលំជនបទប្រទាក់ក្រឡាគ្នា ពីទីប្រជុំជនរហូតដល់ជនបទ ដោយបម្រើឱ្យទំនាក់ទំនងការដឹកជញ្ជូនទំនិញ គ្រប់ប្រភេទបានឆាប់រហ័ស”។
លោកបន្តថា លើសពីនោះ ខេត្តក្រចេះឈរលើសក្តានុពលសម្បូរបែប ក៏ពិតជាបាននាំមកនូវអ្នកវិនិយោគទុនជាច្រើន បានចូលមកធ្វើការវិនិយោគ យ៉ាងច្រើនផងដែរ នោះគឺវិស័យទេសចរណ៍ កសិកម្ម កសិឧស្សាហកម្ម និង វិស័យរ៉ែនិងថាមពល។
លោកមានប្រសាសន៍បន្តថា កត្តាដែលនាំឱ្យខេត្តមានការអភិវឌ្ឍយ៉ាងឆាប់រហ័ស ក្នុងរយៈពេល៥ឆ្នាំចុងក្រោយ ដោយសារតែកម្ពុជាមានសុខសន្តិភាព មានស្ថិរភាពនយោបាយមួយប្រកប ដោយការជឿជាក់លើការដឹកនាំរបស់ប្រមុខនៃរាជរដ្ឋាភិបាល ពិសេសរដ្ឋបាលខេត្តបានខិតខំប្រឹងប្រែងអនុវត្តន៍ផែនការសំខាន់ៗ ឱ្យសម្រេចបានតាមការគ្រោងទុក៕